Varāhamihira: Yogayātrā

yasminn udayati vikasati kamalam ivāstaṃ prayāti saṃkucati/
sacarācaraṃ tribhuvanaṃ sa jayati kiraṇālayaḥ savitā// BY_1.1

yakṣeśamedhena vijitya dhātrīm ity evam abhyudyamino nṛpasya/
vinighnato vighnakarān na pāpaṃ kriyāt krameṇaiva paśūn makheṣu// BY_1.2

utsāhamantraprabhuśaktiyukto dhīmān vinītendriyabhṛtyavargaḥ/
prajānurakto dhṛtimān sahiṣṇur vṛddhopasevī vijigīṣur iṣṭaḥ// BY_1.3

sāmvatsaras tasya vinītaveṣo dhīmān svatantrāṅgapaṭuḥ kulīnaḥ/
dakṣaḥ pragalbho 'vikalo vinītas tādṛg vidhastasya purohito 'pi// BY_1.4

tasya daivanarakārasametāṃ varṇayanti kavayaḥ phalasiddhim/
tatra kecid avadhūya nṛkāraṃ daivam eva phaladāyakam āhuḥ// BY_1.5

labdhavyāny eva labhyate gantavyāny eva gacchati/
prāptavyāny eva prāproti duḥkhāni ca sukhāni ca// BY_1.6

utthānāc ced bhavet siddhir na kaścit prāpnuyāt phalam/
ahorātraṃ viceṣṭanto dṛśyante vṛttikarśitāḥ// BY_1.7

vihaṅga iva vadho hi(syāt) nipatyāryamanīśvaraḥ/
vidhānavihito 'deśyo nānyeṣāṃ nātmanaḥ prabhuḥ// BY_1.8

tasmād daivaṃ pradhānaṃ hi na kuryāt karma mānuṣam/
niśceṣṭam api loke 'smin bhajate bhuktir uttamā// BY_1.9

āghātadurjayanayaṃ paribhūya daivam ātmābhimānacapalāḥ pracaranti ye 'rīn/
teṣāṃ cirād api kṛtāntamahāpaśūnāṃ hastagrahaṃ na samupaiti jitāpi lakṣmī// BY_1.10

tathā pare nāpeksyaiva daivaṃ dairyāvalambinaḥ/
pratyekṣinaḥ kriyāsiddhau kevalaṃ jagur udyamam// BY_1.11

utthānahīno rājā hi buddhimān api sarvadā/
pradharṣanīyaḥ śatrūṇāṃ bhujaṅga iva nirviṣaḥ// BY_1.12

utthānadhīraḥ puruṣo vāgdhīrān adhitiṣṭhati/
utthānadhīraṃ vāgdhīrā ramayanta upāsyante// BY_1.13

vidhānagaṇanājaḍaḥ puruṣakārasuptādaro
manorathapariśramair na paricumbati śrīmukham/
parākramaviniścitaikasunayo hi sadyaḥ śrutaṃ
harir madasuvāsitaṃ pibati kuṃjarāśruṃ madhu// BY_1.14

kṛṣivṛṣṭisamānugā dṛśyante phalasiddhayaḥ/
asminn arthe śṛṇu ślokān dvipāyanamukhodgatān// BY_1.15

na vinā mānuṣaṃ daivaṃ daivaṃ vā mānuṣaṃ vinā/
naikaṃ nirvartayaty artham ekāraṇirivānalam// BY_1.16

siddhyante sarva ārambhāḥ saṃyogāt karmaṇo 'rddhyoḥ/
daivāt purusakārāc ca na tv ekasmāt kathājcana// BY_1.17

anuśāsti naraṃ daivam ihāsyety anuśāsakaḥ/
iha nāsya bhaviṣyāmi kutaḥ phalamanīhitam// BY_1.18

yatnena sampadya manuṣyakāraṃ yatnāvakāśe puruṣo niruddhaḥ/
pratīkṣate daivamataṃ dvitīyas tam āpado nātmakṛtāḥ spṛśanti// BY_1.19

sattvārjitaṃ karmaphalaṃ sukhena vipakṣyate rājasamudyame[na]/
kṛcchreṇa śeṣaṃ mahatā yato 'to bhājyāni mṛgyāṇi nṛbhir nṛkāraiḥ//E20 BY_1.20

chap.2 tithiguṇa

yātrākālam ataḥ paraṃ munimatāny ālokya saṃkhyāpayā-
(mya)bhyuddhuṣya pṛthūktam akṣaragurau sampannnam īśaṃ bhuvaḥ/
jñāte janmani tasya yānasamayaṃ vāṃchanti horāvidas
tv ajñāte 'py aphaleṣu nākṣaram iva prāhātra ratnāvalim// BY_2.1

vidite horārāśau sthānabalaparigrahe grahāṇāṃ ca/
āyuṣi ca parijñāte śubham aśubhaṃ vā phalaṃ vācyam// BY_2.2

anye vadanty avidite (tva)pi janmakāle
yogyaḥ prayāṇasamayo manujeśvarāṇām/
praśnodayodbhavaphal(ānvita)siddhibhāgyas
tattvārthavinniga(da)ti sma vaco vaśiṣṭhaḥ// BY_2.3

apṛcchataḥ pṛcchato vā yiyāsor yasya kasya cit/
horākendratrikoṇebhyas tasya vindyāc chubhāśubham// BY_2.4

daivajñasya hi daivena sadasatphalavāṃchataḥ/
avaśo gocaraṃ martyaḥ sarvaḥ samupanīyate// BY_2.5

aśrauṣīc ca purā viṣṇor jñānārthaṃ samupasthitaḥ/
vacanaṃ lokanāthasya niḥsṛtaṃ mukhapaṅkajāt// BY_2.6

yat sāraṃ pṛcchataḥ puṃso graharā(śyā)śritaṃ phalam/
tatsāraṃ tasya janma syād ya(dya)py anyagṛhe bhavet// BY_2.7

budhvā śāstraṃ yathānyāyaṃ balābalavidhānataḥ/
yathoktaṃ jātake sarvaṃ tathaivātrāpi cintayet// BY_2.8

tasmān nṛpaḥ kusumaratnaphalāgrahastaḥ
prātaḥ praṇamya ravaye haridiṅmukhasthaḥ/
horāṅgaśāstrakuśalān hitakāriṇaś ca
saṃhṛtya daivagaṇakān sakṛd eva pṛccheta// BY_2.9

atha nṛpatisamīpe daivavit pṛṣṭamātrah
phalam udyanimittais tarkayec chāstradṛṣṭyā/
sad iti sadasi vācyaṃ yady api syād asat tat
sphuṭam pai kathanīyaṃ bhūbhuje mantriṇe vā// BY_2.10

sumadhuraphalapuṣpakṣīravṛkṣāvṛtāyāṃ
caraṇagatisukhāyāṃ gośakṛtpeyavatyām/
salilakusumavatyāṃ snānino bhadramūrdhvaṃ
grahabhagaṇagatijñaḥ prādiśet pṛcchakasya// BY_2.11

stanacaraṇatalauṣṭhāṅguṣṭhahastoparāṅgaṃ
śravaṇavadananāsāguhyarandhrāṇi bhūpaḥ/
spṛśati yadi karāgrair gaṇḍakaṭyaṃsakaṃ vā
pravadati śubhaśabdaṃ vāhinī śāsti śatrūn// BY_2.12

udayam udayapaṃ vā janmabhaṃ janmapaṃ vā
tad upacayagṛhaṃ vā vīkṣya lagne yiyāsoḥ/
vinihatam aripakṣaṃ viddhi śatror idaṃ vā
yadi hibukasametaṃ pṛcchato 'stasthitaṃ vā// BY_2.13

pārṣṇigrāhaḥ pṛṣṭhato bhāskarasya prāg yātavyastigmaraśmeś ca yānaḥ/
ākrandārkāt saptame yaḥ sthitaś ca tattulyāste śaktitaś cintayīyāḥ// BY_2.14

jīvajñārkasitāparaiḥ sutasuhṛdduścitkalagnāyagaiḥ
siddhārtho 'rigaṇān vijitya na cirāt praṣṭā sametyālayam/
lagne vā kujamandayoḥ sutagate jīve ravau karmage
lābhe karmaṇi vā sitendusutayoḥ praṣṭur jayo niścitaḥ// BY_2.15

tasminn eva bhaved yoge yadi śukro 'ṣṭam āśritaḥ/
praṣṭāram udyamād eva hataśaktir viśasty ariḥ// BY_2.16

gurvarkaśaśibhiḥ siddhir lagnāridaśamasthitaiḥ/
tadval lagnārirandhrasthairjīvaśukradivākaraiḥ// BY_2.17

sacivāptir gurāvāye karmaṇy asitavakrayoḥ/
caturthe jñe 'ṣṭame candre jāyāsthe ca site jayaḥ// BY_2.18

karmaṇy āre ravāvāye tṛtīyasthe 'rkanandane/
candre ṣaṣṭhe vilagnasthaiḥ śeṣaiḥ praṣṭurdhruvo jayaḥ// BY_2.19

sahaje 'rkārkibhūputraiḥ saumyair lagnagatair jayaḥ/
gurau vā lagnage pāpair lābhe karmaṇi vā sthitaiḥ// BY_2.20

māheyama(nda)yoḥ ṣaṣṭhe lagne guruśaśāṅkayoḥ/
sitacandrajayor ante jayaḥ karmaṇi tīkṣṇagau// BY_2.21

ity yogāḥ śubhāḥ proktāḥ praśnakāle jayāśritāḥ/
aśubhās tu bhavanty atra tān pravakṣyāmy ataḥ param// BY_2.22

yuddhe bhaṅgo yamendvārair navamātmajalagnagaiḥ/
śaśāṅkayamayor lagne mṛtyur bhūsutadṛṣṭayoḥ// BY_2.23

savakre nidhane mande mṛtyur lagne divākare/
candre 'smin tryāyamṛtyusthe sasūrye vā vaded vadham// BY_2.24

vakrajñaśaśibhir dyūne praṣṭur nāśo 'pi gacchataḥ/
kṣunmārāśatruvṛddhiś ca lagne māheyaśukrayoḥ// BY_2.25

candrāvanījayor mūrtau ṣaṣṭhe śaśijaśukrayoḥ/
nidhanasthe sahasrāṃśau vijñeyo mantriṇo vadhaḥ// BY_2.26

tanayasya vadhaḥ praṣṭuḥ pāpair udayaputragaiḥ/
sacandre rudhire lagne bhaṅgaḥ sūryātmajekṣite// BY_2.27

dyūnanaidhanage candre lagnaṃ yāte divākare/
viparyaye vā yātasya trāsabhaṅgavadhāgamaḥ// BY_2.28

dvitrikendrasthitaiḥ pāpaiḥ saumyaiś ca balavarjitaiḥ/
aṣṭamasthe niśānāthe praṣṭur bandhavadhātyayāḥ// BY_2.29

kujacandramasor dyūne svabhedo 'rkabudhodaye/
tadvan mandārayor yuddhe bhaṅgaḥ saumyārkayos tathā// BY_2.30

sarvais tu navame rājā hanti mantripurohitān/
yoge 'sminn udaye candre sutasthapatideśikān// BY_2.31

arkārkasutayor lagne dṛṣṭayoḥ kṣitisūnunā/
candre 'ste vibalaiḥ saumyaiḥ praṣṭuḥ senāpater vadhaḥ// BY_2.32

vidhane vakrayamayoścandre 'ste lagnage ravau/
jñe tṛtīye ca vikramya samantrī hanyate nṛpaḥ// BY_2.33

mūrghodayaṃ śubhasuhṛdyutavīkṣitaṃ vā
lagnaṃ śubhāś ca balinaḥ śubhavargalagne/
siddhipradaṃ bhavati neṣṭam ato 'nyathā taj
janmaprayāṇaphalayuktibhir anyad udyam// BY_2.34

nidhanahibukahorāsaptamārtheṣu pāpā
na śubhaphalakarāḥ syuḥ pṛcchatāṃ mānavānām/
daśamabhavanayukteṣv eṣu saumyāḥ praśastāḥ
sadasad idam aśeṣaṃ yānakāle 'pi cintyam//E35 BY_2.35

chap.3 titiguṇa

nandā bhadrā vijayāś cātha riktāḥ pūrṇāś caitāḥ phalam evaṃ vidadhyuḥ/
neṣṭā madhyā pravarāś ceti śukle kṛṇṇe cintyās tithayas tāḥ pratīpāḥ// BY_3.1

sarvāḥ śastās tithayaḥ śuklapakṣe hitvā tryṃśaṃ bahule 'ntyaṃ ca kaiścit/
ṣaṣṭhyaṣṭamyor vasulabdhāpi yātā dvādaśyāṃ vā nāśam āśu prayāti// BY_3.2

pratipadi phalam eke pañcadaśyāṃ ca neṣṭaṃ jagur idam iti tajjñair yāpyam evāvadhāryam/
kim api kim api nūnaṃ taiḥ samīkṣyoktam etat samavacanavighāte yuktatā kena cintyā//E3 BY_3.3

chap.4 nakṣatrabala

diśi diśi bahulādyāḥ saptakāḥ prākpravṛttāḥ
pavanadahanadiksthas tiryag atyugradaṇḍaḥ/
surapatir api kṛcchraṃ yāti taṃ laṃghayitvā
nanu bhavati virodho dikṣu daṇḍaikagāsu// BY_4.1

prāgdvārikair analadiṅ na virodham eti śeṣāḥ pradakṣiṇagatāḥ vidiśaḥ prakalpyāḥ/
ullaṃghya daṇḍam api kāmam iyān narendraḥ śūlaṃ vihāya yadi diṅmukhalagnaśuddhiḥ// BY_4.2

jyeṣṭhāyāṃ puruhūtadiṅmukhagataḥ prāpto balir bandhanaṃ
yāmyām ājapade muraś calitavān yāto murārer vaśam/
rohiṇyāṃ namuciḥ pratīcy abhigataḥ pūrtiṃ gato vajriṇā
saumyām aryamadaivate ca gatavān mṛtyor vaśaṃ śambaraḥ// BY_4.3

puṣyo 'tha hastaḥ śravaṇaḥ śraviṣṭhā prācyādimukhyāny udag aśviyuk ca/
naiśākaraṃ tvāṣṭram athānurādhā pauṣṇaṃ ca madhyāni tathāhur eke// BY_4.4

sarvadvārikasaṃjñitāni gurubhaṃ hastāśvimaitrāṇi ca
śreṣṭhāny aindavapauṣṇaviṣṇuvasubhāny ādyaiḥ sahāṣṭau sadā/
raudrājāhiyamānilānalamaghāśāktāgnibhir ninditaṃ
yānaṃ tvaṣṭranilāntare 'gniyamayoḥ pitryoraje cāntare// BY_4.5

sve sve karmaṇi pūjitāni munibhiḥ śuddhāni sarvāṇy api
tyaktvārkodayam ānale 'riviṣayaṃ yātrā dighakṣoḥ śubhā/
rohiṇyāṃ triṣu cottareṣu vijayo yātur viśākhāsu ca
tyaktvā vāsarapūrvabhāgam avadad gargo 'dhirājyārthinaḥ// BY_4.6

mūlendūragaśaṅkareṣv arivadhe yāyād dinārdhaṃ vinā
bhṛtyarthaṃ pavanāśvisūryagurubheṣv ahno 'parārdhaṃ vinā/
rātryādau tu na pauṣṇamaitraśaśibhatvāṣṭreṣu vāṃchan dyutiṃ
rātrer madhyam apāsya pūrvabharaṇīpitryeṣu hantuṃ parāḥ// BY_4.7

niśāntabhāge triṣu vaiṣṇavādyeṣv iyād dhanārthī na punarvasau ca/
niṣedhayanty ambupasaṃjñakasya madhyāhnam eke saniśāntabhāgam// BY_4.8

yatheṣṭavelāgamanaṃ praśastaṃ hastaindavopendrasurejyabheṣu/
kṛtvā prayāṇaṃ śravaṇe śriyo 'rthī viśen na jātuḥ kṣitipaḥ svasīmni// BY_4.9

saumye gatvādhyuṣya raudre 'ditīśe saṃprasthātā bādhate śatrusaṃghān/
maitre gatvā pauruhūte samuṣya? mūle yāyāc chatrunāśāya bhūpaḥ// BY_4.10

haste gatvā svāticitre samuṣya śakrāgnyṛkṣe prasthito bādhate 'rīn/
tiṣye pauṣṇe vāsave caikarātraṃ sīmni sthitvā bhūtim āpnoti yātā// BY_4.11

ṛkṣe pāpaiḥ saṃyute 'ntaḥ prakopo lakṣmībhraṃśo rāhuṇārkeṇa rogaḥ/
ketūlkābhyāṃ pīḍite deśanāśaḥ kleśaḥ saure soṣṇaraśmyātmaje ca// BY_4.12

diṅm(ārga)dhūpapariveśavikampapāṃsuyukteṣv athānayagadaśramarogapīḍāḥ/
bhinne graheṇa vaśatām upayāti śatroḥ sandhyārātre 'śanihate 'javighāta uktaḥ// BY_4.13

janmādi karma tato dṛśan na(va)maṃ saṃghātikaṃ coḍubhāgam/
samudayam (ā)dyād daśa(maṃ) bhramavināśasaṃjñaṃ ca trayorviṃśam// BY_4.14

ādyāt tu paṃcaviṃśaṃ mānasametaṃ naraḥ ṣaḍṛkṣaḥ syāt/
mānavanakṣatro nṛpatir ādyāt tad evābhiṣekarkṣam// BY_4.15

nāmānurūpam eṣāṃ sadasatphalam iṣṭapāpaguṇadoṣaiḥ/
janmarkṣādiviśuddhau yātā śatrūn jayaty acirāt// BY_4.16

janmabhakarmādhānoditās tu sampadvipatkarāḥ kṣemāḥ/
pratyarisādhakavaināśikāḥ syur mitrātimitre ca// BY_4.17

mitrātimitrasādhakasampadaḥ kṣemeṣu karmabhe yathā/
prāpnoti nāvaśeṣeṣv abhiṣekapurastād yātas tu// BY_4.18

sitasiddhārthakaśālipriyaṅgumadayantikāmbubhiḥ puṣye/
snātvā yāyāt prācīṃ saumye sahasramaṇitoyaiḥ// BY_4.19

gośṛṅgāpyanadīgirivalmīkataḍāgamṛtsamāyuktaiḥ/
toyaiḥ snātvā nṛpatir yāyād yāmyāṃ diśaṃ haste// BY_4.20

saridabhyākulamṛḍbhiḥ snātvā (ca)caitre prāgdiśaṃ yāyāt/
śravaṇe tu nadīsaṅgamamṛtsalilaiḥ paccimām eva// BY_4.21

madhubhadradārusahitaiḥ snātvā toyair udak śraviṣṭhāsu/
gogajaviṣāṇakośair madhughṛtapūrṇair udak pauṣṇe// BY_4.22

udag vai vaiśvadeve snātvā madhupūthikāpūrtasalilaiḥ/
naksatradevamantraiś cāgniṃ hutvā jayaṃ labhate// BY_4.23

akṣatamāṣāḥ khinnās tilasahitās taṇḍulā dadhi ca gavyam/
vṛṣabhapiśitaṃ mṛgasya ca pañcānām āśvinādīnām// BY_4.24

rudhiravilāyanapāyasabhujaṅgamāṃsāni śāṅkarādīnām/
pitrye tilaudanaṃ ṣaṣṭikānnam ṛkṣadvaye parataḥ// BY_4.25

prāśyāḥ priyaṅgucitrāṇḍajāḥ phalaṃ yāvakaṃ kulatthāś ca/
madhusarpiṣī ca hastān mūlāny ambūni saktavo mūlāt// BY_4.26

śravaṇādīnām adyāc chāliṃ śākaṃ biḍālamāṃsaṃ ca/
ājyaṃ yatheṣṭamāṃsaṃ ca saktavo māṣasaṃyuktāḥ// BY_4.27

prāśyādi ghṛtaṃ tilaudanaṃ matsyāḥ kṣīram iti pradakṣiṇam/
adyān nṛpatir yathādiśaṃ nakṣatrābhihitaṃ ca siddhaye// BY_4.28

asvādu cyutakacamakṣikānuviddhaṃ durgandhi kṣayakṛd abhūri yac ca dagdham/
susvinnaṃ mudu ruciraṃ manonukūlaṃ svādvannaṃ bahu vijayāya yānakāle// BY_4.29

guṇavati tithāv ṛkṣe 'niṣṭe divā gamanaṃ hitaṃ
niśi ca bhagane śastaṃ yānaṃ tithau guṇavarjite/
bhatithigaditān doṣān prāpnoty ataḥ pratilomago
guṇam api tayoḥ samyag yātur jagāda bhṛgur muniḥ//E30 BY_4.30

chap.5 vāraphala

udaranayanarogaśvāpadāraṇyavādhāḥ savitṛdivasayātāpyaśnute 'rthakṣayaṃ ca/
anilakaphajarogān śaktimānānnahāniṃ salilajanitapīḍāṃ cāhni yātā himāṃśoḥ// BY_5.1

jvalanavadhaviṣāsṛkpittaruk śatrupīḍām avanijadinayātā vādhyate śatrusaṃghaiḥ/
ahani savitṛsūnor dainyam āpnoti gacchan svajanadhanaviyogaṃ mṛtyubandhāmayāṃś ca// BY_5.2

budhadivasagato 'rīn bādhate mantraśaktyā sravaṇasukhakathāptiṃ śilpimitrāgamāṃś ca/
kṣitidhanajayaratnastrīpratāpapramodān atibalam acireṇa svīkaroty ahni sūreḥ// BY_5.3

pravarayuvatiśayyāvastragandhānnapānasmarasukhadhanaratrāny ahni bhuṃkte sitasya/
anupacayagato 'haḥ śastam apy apraśastaṃ śubham upacayasaṃsthaḥ pāpasaṃjño vidhatte//E4 BY_5.4

chap.6 muhūrta

garavaṇijaviṣṭiparivarjitāni karaṇāni yātur iṣṭāni/
garam api kaiś cic chastaṃ vaṇijaṃ ca vaṇikkriyāsv eva/ BY_6.1

śivabhujagamitrapitṛvasujalaviśvaviriñcipaṅkajaprabhavāḥ/
indrāgnīndraniśācaravaruṇāryamayonayaś cāhni// BY_6.2

rudrājāhirbudhnyāḥ pūṣā dasrāntakāgnidhātāraḥ/
indvaditiguruhariravitvaṣṭranilākhyāḥ kṣaṇā rātrau// BY_6.3

ahnaḥ pañcadaśāṃśo rātreś caivaṃ muhūrta iti saṃjñā//
sa ca vijñeyas tajjñaiś chāyāyantrāmbubhir yuktyā// BY_6.4

nakṣatravat kṣaṇānaṃ parighādi tadīśvaraiḥ samaṃ cintyaṃ/
phalam api tad eva dṛṣṭaṃ gargādyais tatra ca ślokāḥ// BY_6.5

ahorātraṃ ca sampūrṇaṃ candranakṣatrayojitam/
tannakṣatramuhūrtāś ca samakarmaguṇāḥ smṛtāḥ// BY_6.6

aṣṭame 'rdhadivase same śubho yo viriñcavibhusaṃjñitaḥ kṣaṇaḥ/
tena yānam apahāya dakṣiṇāṃ sarvadikṣv abhijitā praśasyate//E7 BY_6.7

chap.7 candrabala

satya āha gatikarmakalpahā janmagas tu himaguryiyāsataḥ/
tatra dehanavate 'vajāyate tena karmasu na sādhakaḥ smṛtaḥ// BY_7.1

tac ca tasya bahubhir viśodhitaṃ lagnam eva sutarāṃ yatas tanuḥ/
tulyadehanavatāṃ prapadya kiṃ sodayodayam uvāca śobhanam// BY_7.2

aṣṭavargapariśodhitaḥ śaśī śreṣṭhatāṃ samanuvartate yadā/
janmago 'pi hi tadā praśasyate yo 'ṣṭavargaśubhadaḥ sa śobhanaḥ// BY_7.3

saptamāyadaśaṣaṭtrijanmago neṣṭado dvinidhanopagair grahaiḥ/
bandhuriḥphanavapañcamasthitaiś ceṣṭado yadi vilomaveśmagaḥ// BY_7.4

yasya gocaraphalapramāṇatā tasya vedhaphalam iṣyate na vā/
prāyaśo na bahusaṃmataṃ tv idaṃ sthūlamārgaphalado hi gocaraḥ// BY_7.5

yasyotsṛjaty uḍupatiḥ puruṣo 'pasavyaṃ janmarkṣam āpadam upaiti sa bhūmipālaḥ/
yāyī tathetaragṛhopagate sitādau yāyītareś varajayo bahule kṣayaś ca// BY_7.6

horārāśāv upacayagṛhe janmabhe vā yiyāsor hānir hānāv uḍugaṇapatau vṛddhir āpūryamāṇe/
pakṣasy ādāv apacayagṛhe hānir āpūryamāṇe vṛddhis tūktā hrasati himagau kṛṣṇapakṣādisaṃsthe// BY_7.7

upacayagṛhayuktaḥ savyagaḥ śuklapakṣe śubham abhilaṣamāṇaḥ saumyamadhyasthito vā/
sakhivaśigṛhayuktaḥ kārakarkṣe 'pi cendur jayasukhaphaladātā tatprahartāny athātaḥ// BY_7.8

prakṣīṇe 'pya anupacayasthite 'pe yāyād viśrabdhaṃ yadi sakhivaśyakārakarkṣe/
naivaṃ ced udayagṛhāt svajanmabhād vā sampūrṇe 'py upacayage 'pi na prayāyāt// BY_7.9

bhṛgusutabudhabhinne ruk sureḍyena mṛtyur bhayam asitakujābhyāṃ ketunā strīpraṇāśaḥ/
apaṭukiraṇakāntau gacchataḥ śatruvṛddhiḥ savikṛtapariveṣe netranāśaḥ śaśāṅke//E10 BY_7.10

chap.8 lagnabala

dvipadavaśagāḥ sarve siṃhaṃ vihāya catuṣpadāḥ salilanilayābharkṣāvaśyāḥ sarīsṛpajātayaḥ/
mṛgapativaśe tiṣṭhanty ete vihāya sarīsṛpān na kathitagṛheṣūhyaṃ vaśyaṃ janavyavahārataḥ// BY_8.1

sthalajalajasarīsṛpāḥ svakānāṃ balam abhivīkṣya vidheyatāṃ bhajante/
viṣamagṛhavaśe samā dyusaṃsthā niśi viṣamā vaśavartinaḥ samānām// BY_8.2

śīrṣodaye samabhivāṃchitakāryasiddhiḥ pṛṣṭhodaye viphalatāṃ balavidravaś ca/
yātavyadiṅmukhagatasya sukhena siddhir vyarthaśramo bhavati dikpratilomalagen// BY_8.3

śastaṃ divā dinabale niśi naktavīrye rāśau viparyayabale gamanaṃ na śastam/
indvarkalagnasahiteṣu gamaścarādyeṣv anyasvakobhayamahīprativṛddhidātā// BY_8.4

mīnodaye pravasataḥ kuṭilaḥ sadoṣo mārge bhavaty akṛtakāryanivartanam ca/
anyāṃśakeṣv api jhaṣe phalam etad eva mīnāṃśakeṣu ca pararkṣasamāśriteṣu// BY_8.5

ripunidhane ripunidhanaṃ ripuṣaṣṭhe lagnage vadho yātuḥ/
satyānuśāsanam idaṃ vāsiṣṭhe nāyam ekāntaḥ// BY_8.6

śatroḥ prasūtisamaye yadi nidhanaṃ saṃyutaṃ grahaiḥ pāpaiḥ/
saumyayutaṃ vā ṣaṣṭhaṃ sadasatphalatā tatas tābhyām// BY_8.7

kleśād vinā phalam arikṣayam arthasiddhiṃ prāpnoti lagnasahite pravasan svalagne/
arthakṣayaṃ śramamanarthamato dvitīye kalyāṇasaukhyavibhavāgamam āhur eke// BY_8.8

bhṛtyārthavāhanasahāyajayās tṛtīye bandhārthanāśabhayasainyavadhāś caturthe/
mantropajāpavipadātmajabhe 'rivṛddhiḥ ṣaṣṭhe 'rivittabaladīptijayāgamāś ca// BY_8.9

dyūne 'dhvavāhanavipatkṣudatiśramārtir bandho vadhaḥ paribhavo nidhane rujaś ca/
dharme 'rthanāśagadakāryavipadbhayāni kāryaṃ vinā balabhayaṃ daśame kṣayaś ca// BY_8.10

kecid vadanty upacayopagṛhītam etat tasmāc chubhaṃ daśamabhe gamanaṃ vilagen/
arthāptidīptiśubhasiddhijayāś ca lābhe ripphe chalaṃ vyaaybhaye vijite 'pi bhedaḥ// BY_8.11

rogāj janmagṛhodaye sutavadho 'siddhiś ca tatpañcame
dyūne kleśam avāpya janmabhavanāt prāpnoti paścāt sukham/
mārgād eva nivartanaṃ navamabhe meṣūraṇe 'rthāgamaḥ
śeṣarkṣeṣu yathaiva lagnabhavanāt tadvat phalaṃ janmataḥ// BY_8.12

kṣuttṛṣṇārtimārganāśo 'kṣirogaḥ kleśāvāptis tigmagoḥ prāgvilagne/
śastā cāndre devatārthaṃ svadeśe kauje pittavyālaśastrāgnipīḍā// BY_8.13

baudhe tuṣṭir vāṃchitāptir yaśaś ca jaive 'thāptiḥ sthānamānārināśāḥ/
strīratnāptiḥ kāryasiddhiś ca śaukre mānde bandhavyādhinīcāvamānāḥ// BY_8.14

saumyo 'pi janmani na yaḥ śubhapuṣṭidātā sthānaṃ na tasya śubhadaṃ vrajato vilagen/
pāpo 'pi yaḥ śubhaphalaṃ prakaroti puṃsāṃ sthānaṃ vilagnagatam iṣṭam uśanti tasya// BY_8.15

avidheyaṃ bhavanaṃ yat svajanmalagnarkṣayoḥ prayātṛṇām/
apy anukūlaṃ lagnaṃ dhanakṣayāyāsadaṃ bhavati// BY_8.16

sakhivaśyatām upete svajanmalagnarkṣayor vilagnarkṣe/
apacayakare 'pi yātur jayadhanamānāgamāḥ kṣipram// BY_8.17

kecid vadanti yasmin graho niraṃśaṃ karoti tallagnam/
bhavanaṃ yātur aniṣṭaṃ bhayaśokodvegadaṃ yasmād// BY_8.18

vṛṣavṛścikakarkaṭair nṛṇām anukūlair api lagnam āśritaiḥ/
gamanaṃ pravadnay aśobhanaṃ munayo 'nyarkṣasamāśritair api// BY_8.19

veśirvilagnopagato yiyāsor vināpi yatnāt kurute phalāptim/
gauyānam iṣṭaṃ jalarāśilagne tad aṃśake cānyagṛhodaye 'pi//E20 BY_8.20

chap.9 lagnabheda

ūrdhvā tiryag vānatā syāc ca horā muktā krāntā nāgatārkā krameṇa/
ity etāḥ syur jīvaśarmopadeśe jñeyo rāśir brahmaṣaṇḍasya pakṣe// BY_9.1

ūrdhvā syād yā ṣaṭcarādyeṣu horā bhūyo bhūyo maṇḍale kaiścid uktā/
rāśau rāśau prāgvilagnopayātaiḥ drekkāṇais tu prāha horāṃ vasiṣṭhaḥ// BY_9.2

sarvaṃ pramāṇaṃ municoditatvāt kiṃ tv atra yojyaṃ dalam eva horā/
yasmin sahasrāṃśuravasthito 'rdhe tiryaṅmukhī sā gaṇaye tato 'nyāḥ// BY_9.3

dhatte vāṃchitakāryam ūrdhvavadanā kleśād vinā lagnagā
kleśāyāsaparikṣayāṃś ca kurute tiryaṅmukhī gacchataḥ/
sainyabhraṃśam adhomukhī prakurute kṛcchrād gṛhe cāgamaṃ
srvāḥ puṣṭaphalapradāḥ svapatinā dṛṣṭā na pāpagrahaiḥ// BY_9.4

grahadivasaphalaṃ yad eva yātur tad akhilam eva karoti tasya horā/
himasalilasṛjo vināha kaścid yuvatisamāśrayaratnadeti cāndrī// BY_9.5

drekkāṇākāraceṣṭāguṇasadṛśaphalaṃ yojayed vṛddhihetor
drekkāṇe saumyarūpe kusumaphalayute ratnabhāṇḍānvite ca/
saumyair dṛṣṭe jayaḥ syāt praharaṇasahite pāpadṛṣṭe ca bhaṅgaḥ
sāgnau dāho 'tha bandhaḥ sabhujaganigale pāśayukte ca yātuḥ// BY_9.6

nṛpabhūrtir lagnagate drekkāṇe mantriṇo dvitīye ca/
vaidyapurohitasāmbatsarās tṛtīye pare bhṛtyāḥ// BY_9.7

sthānaparākramacintā vyāpāraparākramau camūpabalam/
abhyavahāryaṃ śayanāsane ca tatpaṃcasu kramaśaḥ// BY_9.8

yānāsanaśayyāvāhanāni daśame 'pare 'nnapānāni/
vāhanayodhāḥ paratas trayodaśe bhavati yuvarājā// BY_9.9

jñeyaṃ balaṃ prayātur mantrasya viniścayaś ca tatparatah/
tarataḥ pañcadaśādye drekkāṇacatuṣṭaye ripavaḥ// BY_9.10

ekonaviṃśake sainikāmbuśayane dhanāni parato 'rthāḥ/
parato 'sya daṇḍanetā saimyasyopadravaḥ prarataḥ// BY_9.11

senācchidraṃ tasmāt senānetā bhavec caturviṃśe/
sainyārogyaṃ sainyaṃ catuṣpadaṃ ca kramāt tritaye// BY_9.12

kāryaṃ kośaḥ phalasiddhayas traye bhūmipās traye parataḥ/
dharmakriyātha yodhārcanaṃ ca yātrāsamāptiś ca// BY_9.13

ity udayādyā bhāvā drekkāṇair ye mayā samuddiṣṭāḥ/
sadasatphalam ādeśyaṃ sadasadyutavīkṣaṇāt teṣām// BY_9.14

navabhāge tigmāṃśorvāhananāśo vilagnasaṃprāpte/
kṛcchrāt svagṛhāgamanaṃ pratāpamṛdutā ca candrāṃśe// BY_9.15

kauje 'gnibhayaṃ baudhe mitraprāptir dhanāgamo jaive/
bhogavivṛddhiḥ śaukre bhṛtyavināśo ravisutāṃśe// BY_9.16

yad udayati phalaṃ grahe pradiṣṭaṃ janayati tasya navāṃśako vlagne/
subhabhavananavāṃśe sahāyo ripubalabhāgam upaiti yātur atra// BY_9.17

yat proktaṃ rāśy udaye dvādaśabhāge 'pi tat phalaṃ vācyam/
yac ca navāṃśakavihitaṃ triṃśāṃśasyodaye tat syāt//E18 BY_9.18

chap.10 grahasthānabala

santāpaśokagadavighnakṛd udgame 'rkaḥ kalyāṇamānabalahārdiharo dvitīye/
hemānnavidrumamaṇikṣitidas tṛtīye vairāgyabandhukalahāratidaś caturthe// BY_10.1

putrāpadaṃ sutagṛhe 'dhvani cārthasiddhiṃ ṣaṣṭhe 'bhivāṃchitaphalāptim arikṣayaṃ ca/
dyūne kalatrakalahaṃ dhanasaṃkṣayaṃ ca mṛtyuṃ karoti nidhane savitā rujaṃ ca// BY_10.2

dharmaṃ hinasti navame savitārthadaś ca hatvā viyatyaviditaṃ śramakarmadātā/
ratnāgamaṃ subahu lābhagataḥ karoti kṛtvā vyayaṃ vyayagataḥ kurute 'rtham alpam// BY_10.3

lagne śaśī kalahaśokakaro na pūrṇaḥ strīvājiratnasuhṛdātmajadaḥ kuṭumbe/
duścikyago yuvatiratnadhanapradātā bandhvāptidaḥ suhṛdi tatkṣayadaś ca kṛṣṇe// BY_10.4

arthapradas tanayagaḥ sutaśokakṛc ca mitrāritāṃ prakurute na sukhaṃ ca ṣaṣṭhe/
aste 'rthabhūyuvatido 'rthavināśado 'ṇuś candro 'ṣṭame nidhanaśokakaraḥ prayātuḥ// BY_10.5

pratyeti cāśu navame kurute ca kāryaṃ kṣīṇe kṣayo viyati vṛddhirato 'nyathāsthe/
aiśvaryasaukhyadhanalābham upaite lābhe kleśakṣayavyayabhayāni ca riṣphayāte// BY_10.6

lagne viṣāgnirudhirāgamaśastrabādhā bhindyād balaṃ dhanagato 'rthakaraś ca paścāt/
duścikyago yuvatiratnadhanāmbarāptiṃ bandhukṣayāribhayado hibuke mahījaḥ// BY_10.7

putāpadaṃ kṣitisutaḥ kurute sutasthaḥ śatrupraṇāśam acirād arigaḥ karoti/
arthakṣayāratigadārdanamastasaṃstho bandhārthahānigadamṛtyubhayāni mṛtyau// BY_10.8

dharmaṃ na sādhayati dharmagato mahījaḥ śasto 'mbare na śubhadaḥ kathito 'pariś ca/
lābhe 'rthasiddhivibhavāgamadaḥ prayātur vittakṣayaṃ bahu karoti gataś ca riṣphe// BY_10.9

lagne kīrtisukhārthabuddhivijayān prāpnoti vittaṃ dhane
sotkaṇṭhaṃ sa virāgameti sahaje kāmān labhetākhilān/
pātāle śayanānnapānavibhavān putrāgamaṃ pañcame
ṣaṣṭhe yāty aribādhyatāṃ śaśisute kleśaś ca yātur bhavet// BY_10.10

jāyāsthe pravarāṅganāmbaradhanaprāptir budhe 'rkācyute
kecit kleśam uśanti naidhanagate śaṃsanti kecic chubham/
dharme dharmavivṛddhir ambaragate siddhir bhaved īpsitā
vidyārthāptir ayatnataś ca parato riṣphe ca vācyo vyayaḥ// BY_10.11

kīrtir lagne 'rthāthasiddhir dvitīye duścikyasthe kṣucchramārtiḥ surejye/
pātālasthe dharmatatvābhimānā kāryaṃ sidhyaty ātmajasthe 'py asādhyam// BY_10.12

ṣaṣṭhe jīve śatrurāyāti vaśyaṃ kecit prāhur vaśyatāṃ yāti śatroḥ/
vindanty aste 'riṣṭayoṣāyaśāṃsi mṛtyau prāṇān hanty athānye jagur na// BY_10.13

putrotpattir dharmasiddhiś ca dharme jīve karmaṇy arthasiddhir yaśaś ca/
lābhe kāryaṃ vāñchitaṃ yāti siddhiḥ riṣphe prāpte kliśyate 'nekaduḥkhaiḥ// BY_10.14

veśyārthāmbaramālyabhojanasukhaprāptir vilagne bhṛgau
lābho 'rthe sahaje na sīdati gataḥ prāpnoti śreṣṭhāṃ śrutim/
pātāle suhṛdāgamaḥ sutagṛḥ sthānārthamānāgamaḥ
ṣaṣṭhe śatruparābhavāratiśucaṃ sthāne 'nyathā tajjaguḥ// BY_10.15

dattvā strīdhanam astagaḥ svaviṣayavyucchittido bhārgavaḥ
kāryaṃ sādhayate 'ṣṭame 'tha navame kṣipraṃ karotīpsitam/
yātuḥ karmagataḥ prabhūtadhanado lābhe jayārthaprado
vyarthaṃ dvādaśago vyayaṃ prakurute śasto 'parair dvādaśe// BY_10.16

bandhaṃ vadhaṃ cārkasute vilagne dhane arthahāniṃ labhate śubhaṃ ca/
śatror balaṃ hanti gatas tṛtīye caturthago bandhubhayaṃ parebhyaḥ// BY_10.17

nārthasya siddhiḥ sutage 'rkaputre ripūn ripusthe sṛjayaty ayatnāt/
utsāhabhaṅgo 'kṣirujaś ca dāre viṣāgniśastrādivadho 'ṣṭamasthe// BY_10.18

dharme na dharmaṃ labhate sukhañ ca yānāvṛtiṃ karmaphalaṃ ca svasthe/
ekādaśasthe jayavittalābhān mande 'ntyage nārtham upaiti yātā// BY_10.19

prāyo jaguḥ sahajaśatrudaśāyasaṃsthāḥ
pāpāḥ śubhāḥ savitṛjaṃ parihṛtya khastham/
sarvatragāḥ śubhaphalaṃ janayanti saumyās
tyaktvāstasaṃsthamamarāriguruṃ jigīṣoḥ// BY_10.20

kecit prāhur arivyayāstasahajasthānāni hitvā bhṛguḥ
śreṣṭhaś candrasuto 'ntyadharmasahajadyūnasthito netaraḥ/
candro lābhasutārthadharmasahajavyomasthitaḥ pūjito
jīvaḥ sarvagato maṇitthakathito neṣṭo 'ntyaṣaṭstryāśritaḥ// BY_10.21

ekīyapakṣe 'pi hi kaiścid ukto bhṛguḥ śubho 'ntyātmajalābhavarjam/
candrastriṣaṣṭhāyadaśāstasaṃstho budho 'stalagnāyasuhṛdvyayasthaḥ//E22 BY_10.22

chap.11 utsargāpavāda

saumyāsaumyeṣv etal lagnādstheṣu yat phalaṃ proktam/
tatsamakālagatānāṃ phalavaiṣamyād anekāntam// BY_11.1

horāvido jagur idaṃ sutāv abalo daśādhipāriś ca/
aśubhaphaladaś cāsāmpratam udaye saumyo 'pi neṣṭaphalaḥ// BY_11.2

sāmprataṃ śubhadaḥ sutau balanvito yo daśādhi(pa)mitraṃ ca/
pāpo 'piśubhaphalaḥ syāc chalokaḥ śāstroditaś cātra// BY_11.3

saumyo 'py atīvacirabhāviphalo na yojyaḥ
pāpo 'py asāmprataphalo ripunirjitaś ca/
pākādhipo ''tmasadanāṣṭakavargaśuddhaḥ
avalpo 'phalaś ca dinabhāṃśavidhis tathā syāt// BY_11.4

saumyaṃ daśādhipaṃ lagnasaṃsthamicchanti kecid ācāryāḥ/
pāpāṃ copacayasthaṃ na vilagne tatra ca ślokau// BY_11.5

saumyagraheṣu lagneṣu śubham ekāntaniścitam/
papagrahodaye yātur asaṃśayam aśobhanam// BY_11.6

tasmāt krūraṃ daśānāthaṃ yātur vīryaguṇānvitam/
kuryād upacayarkṣeṣu na vilagne kathaṃcana// BY_11.7

tac ca viruddhaṃ teṣāṃ katham anyadaśāsu dāsyate svaphalam/
evaṃ phalasya nāśo vrajati sarvasya phalali(lī)psoḥ// BY_11.8

tasmān naikānto 'yaṃ jātakam avalokya nirdiśet sadasat/
ślokau vṛttaṃ bhedaṃ prāha maṇittho vasiṣṭhaś ca// BY_11.9

rakṣakā vardhakāś caiva ye syur janmani nāyakāḥ/
tān pāpān api niḥśaṅko yātrālagneṣu yojayet// BY_11.10

śubhāśubhaphalā yogā jātake ye 'py udāhṛtāḥ/
tān sarvān avalokyaiva prayāṇeṣv api yojayet// BY_11.11

horāgataḥ svabhavane yadi sūryaputro meṣopago 'vanisutaḥ svagṛhe śaśāṅkaḥ/
śukras tulādharagato mithune budhaś ca siṃhe ravir yadi ca pārthivajanma vidyāt// BY_11.12

janmasamaye śaśāṅkodayopacayasaṃsthitā grahāḥ kecit/
te sarve nānākhyā krūrāḥ saumyaiḥ samāścintyāḥ// BY_11.13

yo yasya daśamagṛhagaḥ sa tasya vaśyas tu bhavati niyamena/
yaś cātha paṇapharasthaḥ sa bhavati rakṣopagas tadvat// BY_11.14

upacayagṛhopayātāḥ prasparaṃ kīrtits tu tānasamāḥ/
ādau prakīrṇakādhyāye coditāḥ kārakāś ca// BY_11.15

janmeśvaralagnapayor yaḥ śatrur lagnagaḥ sa saumyo 'pi/
kurute dehavipattiṃ krūro 'pi śubhaṃ tayor mitram// BY_11.16

bhaven na yaḥ kārakatānasaṃjñaḥ svajanmalagnādhipayoḥ śubho 'pi/
karoti lagnopagataḥ sa yātur bhayaṃ vināśaṃ ca bahuprakāram// BY_11.17

papo 'pe lagnopagato narāṇāṃ śubhapradaḥ kārakatānasaṃjñaḥ/
tasmāt praytnād idm eva cintyaṃ yiyāsatāṃ kārakatānayātam// BY_11.18

eko 'pi vakropagato narāṇāṃ śubho 'śubho vāpi catuṣṭayasthaḥ/
vargo 'pi vāsyodayago vināśaṃ bahuprakāraṃ kurute 'dhvagānām// BY_11.19

svasutasthāne sūryaḥ strījanaratnapramodado lagne/
avaśeṣasthānagato vadhabandhodvegadaḥ kṣipram// BY_11.20

uḍupatir udayaṃ prāptaḥ sarvasthānopagaḥ prayātṛṇām/
kurute ripupravṛddhiṃ dīptivināśaṃ vighātaṃ ca// BY_11.21

sthāne 'rkasutasya kujo lagnastho ripuvināśajayadātā/
śeṣasthānopagataḥ kṣitisuto ratnārthanāśakaraḥ// BY_11.22

raviśaśibhaumasthāneṣv anarthado lagnagaḥ śaśāṅkasutaḥ/
bhṛgusutagurumandānām abhiṣekajayārthadīptikaraḥ// BY_11.23

jīvo bhṛgucandramasoḥ sthāne dhanayodhanāśakaḥ proktaḥ/
tatpariśeṣasthāneṣv avanisuhṛdvittaṃjayadātā// BY_11.24

saumyasthāne śukro balahānikaro 'rthado 'rihantā ca/
sthāne pariśeṣāṇām anilajvaraśatrukopakaraḥ// BY_11.25

arkasthāne mando lagnasthaḥ prītisaukhyalābhakaraḥ/
neṣṭo 'nyasthānasthaḥ pratāpabalamānahānikaraḥ// BY_11.26

savitṛtanayaḥ svasthānastho dhanāṅgavināśakṛt
tuhimakiraṇaḥ strīratnāptiṃ nareśvaratāṃ raviḥ/
avanitanayaḥ sainyakṣobhaṃ priyaśravaṇaṃ budhaḥ
suragururatho bhogaprāptiṃ karoti jayaṃ sitaḥ// BY_11.27

yo 'staṃ yāty udayaṃ vā dakṣiṇamārgasthitaḥ sahastrāṃśoḥ/
kurute grahaḥ salagne yodhadhanāṅgakṣayaṃ yātuḥ// BY_11.28

tigmakarasyottarato darśanam āyāti yo graho 'staṃ vā/
madhye tu vā sa lagne yātuḥ kusumāmbarāśanadaḥ// BY_11.29

niyatagatidyutivarṇapramāṇavaikṛtyam ucyate vikṛtiḥ/
vikṛtistho galnagato na śubhaḥ śubhadaḥ svabhavanasthaḥ// BY_11.30

yāmye tamo jñaḥ śravaṇe ravis tu jāto viśākhāsu sitaś ca puṣye/
pauṣṇapyabhāgyoragakṛttikāsu mandāravāgīśaśiravīndujanmā// BY_11.31

trividhotpātābhihataṃ balavad grahapīḍitaṃ ca yasyarkṣaṃ/
yātrāyāṃ lagnagataḥ sa varjanīyo 'nukūlo 'pi// BY_11.32

pākeśvarādhimitre tadvarge vā vilagnage yātuḥ/
svayam arir upaiti vaśyaṃ praṇataśirāḥ sārvabhaumo 'pi// BY_11.33

pakeśvarārilagne varge vā tasya bhūpatir gacchan/
vinihataśūranarāśvaḥ śatror āyāti vaśyatvam/ BY_11.34

mūrtyarthayodhavāhanamantryarimārganaidhanamanāṃsi/
karmāgamavyayāścodayādayaḥ kīrtitā bhāvāḥ// BY_11.35

yātrāphalaṃ caturthe jāmitre śatravaḥ pramādaś ca/
śubhapāpagrahayogāc chubhāśubhaṃ nirdiśed eṣām// BY_11.36

satyācāryasya mate vibalaḥ śastaḥ śaśī prayāṇeṣu/
digvīryonaḥ kevalam induḥ śasta iti jagur anye// BY_11.37

yad eva yasyodayasaṃsthitasya phalaṃ prayāṇe sadasat pradiṣṭam/
tad eva tasyākhilam ahni yātur grahasya varge ca vilagnasaṃsthe//E38 BY_11.38

chap.12 miśraka

vyasanaṃ prāpno(ti) mahad vyatipāte nirgato 'thavā mṛtyum/
vaidhṛtigamane 'py evaṃ tryahnaspṛśi samupadiśānty eva// BY_12.1

nāvamarātre yāyād doṣas tatrādhimāsake vyasanam/
ṛtvayanayugasyāptau na vijayakāṅkṣī nṛpaḥ pravaset// BY_12.2

svarkṣeśadaśādhipayor mitrodāsīnaśatrubhāṃśabhavāḥ/
tatpākabhujaś coktā vijigīṣor mitramadhyaripavaḥ// BY_12.3

riktāniṣṭadaśo 'rir niyamād vijigīṣuṇā samucchedyaḥ/
avarohidaśaḥ pīḍyaḥ karṣayitavyas tathārohī// BY_12.4

na sadṛśadaśo 'bhiyojyaḥ sandhānaṃ tena bhūpater vyāsam/
aśubhaiṣyāsannadaśaḥ śubhaiṣyapākena sandadhyāt// BY_12.5

śreyān viparyaye vigrahas tathārohiṇy aśubhaiṣyadaśaḥ/
āsīta yadā śatruḥ śubhaiṣyapāke vidūrasthaḥ// BY_12.6

ārohiśubhaiṣyadaśaḥ pākapatau balayute ca bhūpālaḥ/
yāyāt tadviparītaṃ dvaidhībhāvaṃ tu miśradaśaḥ// BY_12.7

riktopahatadaśāyāṃ janmodayanāthaśatrupāke ca/
svadaśeśakārakadaśaḥ saṃśrayaṇīyo narādhipatiḥ// BY_12.8

upacayakartur vrajed diśaṃ balavati kaṇṭakage ca dikpatau/
manasāpi na digbalānvite digadhipatau ca lalāṭasaṃsthite// BY_12.9

janmodayapau balānvitāv upacayakaṇṭakagau śubhapradau/
krūrāv api nityam eva tau saumyair eva samāv udāhṛtau// BY_12.10

svadaśādhipajanmalagnapāḥ sandhyārkopagatā na śobhanāḥ/
parihṛtya sitārkanandanau madhyās tigmakarād viniḥsṛtāḥ// BY_12.11

parasparaṃ saurikujau ravīndū trikoṇagau bhārgavalohitau ca/
phalaṃ yad uktaṃ tad aśeṣam eva vināśya paścāt svadiśaṃ nayantām// BY_12.12

ripudivaso yasya bhavet saumyo 'pi sa lagnago na śubhadātā/
pāpo 'pīṣṭaṃ janayati mitraṃ svadine vilagnasthaḥ// BY_12.13

balinaḥ kaṇṭakasaṃsthā varṣādhipamāsadivasahoreśāḥ/
dviguṇaśubhāśubhaphaladā parataḥ parato grahā yātuḥ// BY_12.14

yātrājasiṃhaturagopagate variṣṭhā madhyā śanaiścarabudhośanasāṃ gṛheṣu/
bhānau kulīrajhaṣavṛścikage 'tidīrghā śastas tu devalamate 'dhvani pṛṣṭhato 'rkaḥ// BY_12.15

sakalaphaladadaśāḍhyake pravarā madhyāṣṭavargasaṃśuddhau/
nyūnaphalā tātkālikavilagnatithidivasakaraṇādyaiḥ// BY_12.16

uttamaphalā yātrā trikoṇatuṅgopaca(ye)ṣu saumyeṣu/
madhyā svamitrabhavanopageṣu nīcāribheṣv adhamā// BY_12.17

madhyādhamādhamottamasamamadhyādhodhamottamotkṛṣṭā/
madhyottamā ca ṣaṣṭhā yātrā yātrāvidāmiṣṭā// BY_12.18

digvargavilomage hate sandhyākaropagate vidīdhitau/
śukre pravasan narer vaśaṃ yāti budhe ca vilomasaṃsthite// BY_12.19

anulo(ma)gate śaśāṅkaje śukre caivam api vyavasthite/
yāyād aviśaṅkito 'paraiḥ kathito 'pyāṅgiraso yathendujaḥ// BY_12.20

ākrandasārī dinamadhyago 'rkaḥ pauraḥ purastād aparatra yāyī/
ākranda indur gurumandasaumyāḥ paurāḥ smṛtā yāyina ity ato 'nye// BY_12.21

yāyigrahair vīryajayopapannaiḥ ke 'riprayāṇaṃ pravadanti dhanyam/
satyaṃ tathā kiṃ tu viśeṣam āhus te bhūpateḥ satphaladā jigīṣoḥ// BY_12.22

dṛṣṭe sāmnāṃ karmaniṣṭaṃ surārau vaitālīyaṃ pādadambhau ca hitvā/
śasto rāhus tryāyakarmopayāto yātavyaś cāsannatāgaś ca ketuḥ// BY_12.23

sāmnāṃ śukrabṛhaspatī dinakaro vakraś ca daṇḍeśvarau
bhedasyendujarāhuketuravijā dānasya naktamcaraḥ/
ārkādāṭavikaṃ yamā(d) bhṛtabalaṃ(syu)r bhārgav(āc chreṇikaṃ)
jñān mantraṃ ripudeśamaulabalapālak(ābhaume)nduvāgīśvarāḥ// BY_12.24

yato 'pa(pa)nnadivasakaroḍunāthayos tato vrajed ripunadhanāya pārthiva/
athāyanena yugapad ekasaṃsthayor dyunaktayo raviśaśinor vrajet tadā//E25 BY_12.25

chap.13 dehaspandana

dakṣiṇapārśvaspandanam abhidhāsye tatphalakṣayo vāme/
pṛthivīlābhaḥ śirasi sthānavivṛddhir lalāṭe syāt/ BY_13.1

bhrūnāsikāntare priyasamāgamo bhṛtyalabdhir akṣiṇos tu/
dṛkparyante 'rthāptiḥ pūrve jñeyātra cotkaṇṭhā// BY_13.2

yoṣitsaukhyaṃ gaṇḍe dṛkcaramādhaś ca saṅgare vijayaḥ/
śravaṇe ca hitaśravaṇaṃ nāsāyāṃ prītisaukhyaṃ ca// BY_13.3

adharottarauṣṭhayoḥ priyasamāgamavijayau gale ca bhogāptiḥ/
aṃse bhogavivṛddhir vāhāviṣṭena saṃyogaḥ// BY_13.4

haste 'rthāptiḥ pṛṣṭhe parājayo vakṣasi smṛto vijayaḥ/
prītyutpattiḥ pārśve stane tv apūrvā viṣayalabdhiḥ// BY_13.5

kaṭyāṃ balapramodaḥ sthānabhraṃśaḥ prakīrtito nābhau/
haste kośavivṛddhiḥ kleśo hṛdaye 'rthaparyantaḥ// BY_13.6

vāhanalābhaḥ sphigyāyurvṛṣaṇe yoṣidāgamaḥ śiśne/
muṣke tanayotpattir vastāv antaḥpurābhyudayaḥ// BY_13.7

pṛṣṭhata ūrvor doṣaḥ purataś calane tu śacivahitalabdhiḥ/
pracalati ca jānusandhāv arisandhānaṃ balavad uktam// BY_13.8

deśaikadeśanāśo jaṃghāyāṃ sthānalabdhiraṃdhry upari/
adhvāgamanam alābhaṃ caraṇatale spandamāne tu// BY_13.9

vraṇapiṭakatilakalāṃchanamaśakādāyas tv eva nirdiṣṭāḥ (syuḥ)/
kaṇḍūyanaṃ narapater dakṣiṇapāṇau jayāyaiti//E10 BY_13.10

chap.14 cittaśuddhir

pṛṣṭavyo daivavidā viśrabdham upahvare narādhipatiḥ/
ripunidhanapraṇidhānaṃ prati bhavataḥ kiṃ manaḥ kurute// BY_14.1

brūyāt sa cen mama manaḥ protsahate harṣayet tataś caivam/
cittānukūlatā siddhilakṣaṇaṃ tatra ca ślokāḥ// BY_14.2

śubhāśubhāni sarvāṇi nimittāni syur ekataḥ/
ekataś ca manaśśuddhis tad dhi śuddhaṃ jayāvaham// BY_14.3

kiyac ciraṃ na labhyeta nimittaṃ gamanānugam/
na tv eva tu mano 'narthaṃ cireṇāpy anumanyate// BY_14.4

nimittānucaraṃ sūkṣmaṃ dehendriyamahattaram/
tejo hy etac charīrasthaṃ trikālaphaladaṃ nṛṇām// BY_14.5

prīyate na mano 'narthair nāsiddhāv abhinandati/
tasmāt sarvātmanā yātur anumeyaṃ sadā manaḥ//E6 BY_14.6

chap.15 guhyakānuṣṭhāna

yātrārvāk saptāhād guhyakasāhāyakaṃ tryahaṃ pūrvam/
tryaham atha vijayasnānaṃ gṛhayajñaṃ saptame divase// BY_15.1

pakvāmamāṃsadadhiphalakusumāsavapāyasapratisarobhiḥ/
mūlakabhakṣair gandhair guggulumukhyais tathā dhūpaiḥ// BY_15.2

sāṃvatsarasacivapurohitāptapuruṣāyudhīyaparicāraḥ/
yāyān nagaracatuṣpatham abhuktavastrottarīyāṅgaḥ// BY_15.3

ardhaniśāyām udayati saumye vakre 'thavā tadaṃśe vā/
dadyād baliṃ daśasv apy āśāsu purohitaḥ kramaśaḥ// BY_15.4

āvartayet purodhāḥ kṛtāñjalis tatra rudrasāvitrīm/
kūṣmāṇḍamahārauhiṇakuberahṛdayāny ataḥ prapaṭhet// BY_15.5

dvāratrikacatuṣkādripuraniṣkuṭavāsinaḥ/
mahāpathanadītīraguhāgāhvaravasinaḥ// BY_15.6

viśvarūpā mahāsattvā mahātmano mahāvratāḥ/
prathamāḥ pratigṛhnīdhvam upahāraṃ namo 'stu vaḥ// BY_15.7

suputrāmātyabhṛtyo 'yaṃ sadāraś caiva pārthivaḥ/
rakṣṇīyo hite cāsya prayatadhvaṃ samāhitāḥ// BY_15.8

evam uktvā tatas tv arghyaṃ pramathebhyaḥ pradāpayet/
sāvitryāḥ sthaṇḍile tasmin sūtastūpahared balim// BY_15.9

yamendravaruṇārtheśaviṣṇupāvakaśūlinām/
yakṣarakṣaḥpiśācānām asurāṇāṃ tathāiva ca// BY_15.10

ye syur bhūtagaṇās tebhyo namo 'stv ity anuyāntu ca/
sannaddhāḥ svaiḥ praharaṇair arisenāvadhā ināḥ// BY_15.11

camūsametā anuyāntu pṛṣṭhato vicitramālyābharanā madotkaṭāḥ/
vicitravastrā jaṭilāḥ kirīṭinaḥ karālalambodarakubjavāmanāḥ// BY_15.12

nivṛttayātraḥ punar apy ahaṃ hi vo vijitya śatrūn bhavatāṃ prasādataḥ/
ato viśiṣṭaṃ bahuvittam uttamaṃ baliṃ kariṣye vidhinopapāditam// BY_15.13

anarcitā ye nṛpatiṃ savāhanaṃ vināśayanti kṣapayanti vā camūn/
supūjitāḥ siddhikarā bhavanti te pravādhakāḥ śatrugaṇasya cāhave// BY_15.14

kṣaṇaṣaṣṭhibhāgamātraṃ prayato nṛpatir visarjayet pramathān/
daivajñapurodhobhyām āveditamaṅgalo yāyāt//E15 BY_15.15

chap.16 svapna

dukūlamuktāmaṇibhṛn narendraḥ samantridaivajñapurohito 'taḥ/
svadevatāgāram anupraviśya niveśayet tatra digīśvarārcām// BY_16.1

abhyarcya mantrais tu purohitas tān adhaś ca tasyāṃ bhuvi saṃskṛtāyām/
darbhais tu kṛtvāstaram akṣatais ca kiret samantāt sitasarṣapaiś ca// BY_16.2

brāhmīṃ sadūrvām atha nāgapuṣpīṃ kṛtvopadhānaṃ śirasi kṣitīśaḥ/
pūrṇān ghaṭān puṣpaphalābhidhānān āśāsu kuryāc caturaḥ krameṇa// BY_16.3

yaj jāgrato dūram upaiti daivam āvartya mantrāṃ kramaśas trir etam/
laghv ekabhug dakṣiṇapārśvaśāyī svapnaṃ parīkṣeta yathopadeśam// BY_16.4

namaḥ śambho trinetrāya rudrāya paramātmane/
vāmanāya virūpāya svapnādhipataye namaḥ// BY_16.5

bhagavan deva deveśa sūlabhṛd vṛṣavāhana/
iṣṭāniṣṭe mamācakṣva svapne suptasya śāśvatam// BY_16.6

ekavastre kuśāstīrṇe suptaḥ prayatamānasaḥ/
niśānte paśyati svapnaṃ śubhaṃ vā yadi vā 'śubham// BY_16.7

gataiṣyajātyantarasattvasaṅgaiḥ svapne 'py anūke gatije ca nityam/
yātuḥ prakopād anilātmakasya nagādrituṅgāmbaralaṅghanāni// BY_16.8

pittādhike kāñcanaratnamālyadivākarāgniprabhṛtīni paśyet/
śleṣmādhikaś cendubhaśubhrapuṣpasaritsarombhodhivilaṅghanāni// BY_16.9

jaghanyamadhyaprathame niśāṃśe prāvṛccharanmādhavasaṃjñate ca/
kāle marutpittakaphaprakopāt sādhāraṇaḥ syāt phalasannipātaḥ// BY_16.10

daśāsu coktaṃ grahapākajātaṃ cintā tu dṛṣā tu yathā tathaiva/
bībhatsasattvābhibhavo 'bhicāro vighnodbhavo guhyakajaḥ pradiṣṭaḥ// BY_16.11

anūkacintāgrahadoṣadṛṣṭāny atītakarṃāṇi ca niṣphalāni/
dyudṛṣṭapūrvāḥ kathitāś ca tadvad anyatra loke kathitā viśeṣāḥ// BY_16.12

pratyakṣavad bhavati yaḥ sphuratīva cāntaḥ
svapnasya tasya niyamāt sadasatphalāptiḥ/
svapnāḥ śubhāśubhakṛtāḥ phaladā narāṇām
uddeśamātram iha tān anuvarṇayāmi// BY_16.13

svāṅgaprajvalanaṃ paropagamanaṃ śakradhvajāliṅganaṃ
diksaṃvṛttanarendrakanyakatanor vikṣepaṇaṃ dikṣu ca//
bandho vā nigale grasec ca dahanaṃ nānāśirobāhutā
chatraṃ vā dvirado 'bhiṣicya bibhṛyād divyo 'thavā brāhmaṇaḥ// BY_16.14

uḍupadinakṛdgośṛṅgāgrasrutāmbvabhiṣecanaṃ
yadi ca mahiṣīsiṃhīvyāghrīgavāṃ sukhadohanaḥ/
jaṭharanisṛtaiś cāntrair grāmadrumādiniveṣṭanaṃ
viśati yadi vā suśliṣṭāṅgī tanuṃ pravarāṅganā// BY_16.15

manujahṛdayamūrdhnāṃ bhakṣaṇaṃ vā svadeha-
bhujagaturagasiṃhebhājamāṃsādanāni/
tṛṇatarukusumāmbhaḥprodgamo vā svanābhau
kṣititanuparivartonmūlane vādhirājyam// BY_16.16

dinakaraśaśitārābhakṣaṇasparśaṇāni
daraṇam api ca mūrdhnaḥ sapta pañca tridhā vā/
vṛṣabhagṛhanagendrāśvebhasiṃhādhiroho
grasanam udadhibhūmyoś cādhirājyapradāni// BY_16.17

vipularaṇavimardadyūtavādaiś ca jitvā
paśumṛgamanujānāṃ labdhir agryāsanaṃ vā/
viḍaśanaparilepo 'gamyanārīgamo vā
svamaraṇaśikhilābhaḥ sasyasandarśanaṃ ca// BY_16.18

sitasurabhimanojñālepamālyāmbarāṇāṃ
dvijasuragururājñāṃ darśanāny āsiṣaṃ ca/
maṇirajatasuvarṇāmbhojapātreṣu bhuṅkte
yadi dadhiparamānnaṃ śoṇite majjane vā// BY_16.19

sitaturagarathadhvajātapatravyajanasarojamaṇidvipendralābhāḥ/
abhaya jaya ca bhuṃkṣva ceti śabdāḥ pariṇatarājyaphalapradāḥ pradiṣṭāḥ// BY_16.20

pūrvajanmasu cābhyastā sattvarūpā gatis tadā/
(tada)nūkam iti proktam iha paścāt karoti yat// BY_16.21

mudrādiṣu yajñanīviṣu strīsaṃjñādiṣu cāṅganāptir uktā/
labdhe śayane 'tha darpaṇe bhṛṅārādiṣu codbhavaḥ (suta)sya// BY_16.22

kāminyāṃ dhanalabdhir ambutaraṇe śokasya nāśo bhaved
dharṣo roditaśocitādiṣu tathā dāhe vivṛddhir matā/
gośṛṅgidvijadevatāpitṛsuhṛdbhūpāś ca śaṃsanti yat
svapne tan niyamād bhavaty avitathaṃ neṣṭaṃ śubhaṃ vā phalam// BY_16.23

gobheranyatra gotre tṛṇatarukusumaprodbhavaḥ snehapānaṃ
krīḍāyānopabhogaḥ kharakapikarabhavyālarūpaiś ca sattvaiḥ/
kāyasyālepanaṃ vā kaluṣamalamaṣīgomayasnehapaṅkair
dṛgjihvādantabāhuprapatanam athavānarthaśokapradāni// BY_16.24

gītotkrīḍitabhūṣitaprahasitapr(āmoditā)khelitāni
arkendudhvajatārakānipatanaṃ strotovahāyā gamaḥ/
rajjucchedacitāprapātajananīgātrapraveśas tathā
svapne kāṃsyavicūrṇanaṃ ca śirasaḥ kleśāmayānarthadāḥ// BY_16.25

śmaśrukeśanakhadairghyakalpanā vānarīvikṛtanāryupāsanam/
raktavastramanujāṅgamardanaṃ rogamṛtyubhayaśokatāpadam// BY_16.26

sthalamṛgapaśukīṭānūpavaryandhajānāṃ
plavanamudakarāśau syād vivāhotsavo vā/
sarasijajatubhāṇḍakrīḍanaṃ nartanaṃ vā
malinavivasanatvaṃ cāśu rogapradāni// BY_16.27

svadravyanāśaḥ suhṛdāṃ viyogaśchedaś ca pāṇyoḥ kamalāpahāraḥ/
prāsādaveśmādriśirovatārāḥ svapneṣu neṣṭā iti saṃpradiṣṭāḥ// BY_16.28

mitrasyāptiḥ syādvikośāsilābhe vaśyaṃ gacched bhūpateḥ śāsanāptau/
sarpe karṇau nāsikāṃ vā praviṣṭe tacchedaḥ syād veṣṭane cāśu bandhaḥ// BY_16.29

ādye varṣād vatsarārdhād dvitīye yāme pāko varṣapādāt tṛtīye/
māsāt pākaḥ śarvarīpaścimāṃśe sadyaḥ pāko govisarge ca dṛṣṭe// BY_16.30

dṛṣṭvā svapnaṃ śobhanaṃ neha supyāt paścād dṛṣṭo yaḥ sa pākaṃ vidhatte/
śaṃsediṣṭaṃ tatra sādhudvijebhyas te tvāśibhiḥ pūjayeyur narendram// BY_16.31

bhūyaḥ prasvapanaṃ na cāsya kathanaṃ gaṅgābhiṣeko japaḥ
śāntiḥ svastyayanaṃ niṣevaṇam api prātargavāśvatthayoḥ/
viprebhyaś ca tilānnapānakusumaiḥ pūjā yathāśaktitaḥ
puṇyaṃ bhāratakīrtanaṃ ca kathitaṃ duḥsvapnavicchittaye//E32 BY_16.32

chap.17 vijayasnāna

kṣīraikatarunagārṇavatūlanadīsaṅgamāḥ saraḥ śoṣyam/
gosthānapaṭusurālayarucirāḥ snānapradeśāḥ syuḥ// BY_17.1

samagambhīrānūṣaraśāḍvalabhūmau pradakṣiṇajalāyām/
kāṣṭhāraśmipramitaṃ vāstu likhet sarvato bhadram// BY_17.2

sarvair dhānyais tilamudgamāṣacaṇakātasīpariśliṣṭam/
acchinnāgrair darbhaiḥ kuśaiḥ sa(mastā)t paristīrṇam// BY_17.3

rajatamaṇihemagarbhaiḥ sakṣīrapravālasitasūtrai(ś ca)/
kalaśaiḥ kālamūlaiś ca śobhitadvāraṃ (tanmadhye)// BY_17.4

tanmadhye brāhmī brahmā sāma dūrvāgraśaṃkhapuṣpāḥ syuḥ/
diṅmukham aratnituṅgaṃ sthāpyaṃ pīnaṃ sapraveṣṭam// BY_17.5

tasya grahānulomaṃ kālaṃ kecij jagur niṣeveta/
purogha ....... ṣāṣṭikayavapāyasāhāram// BY_17.6

abhimatadevakṛtamanāḥ pūrvadvāreṇa pārthivaḥ praviśet/
bhadrāsanaṃ pradakṣiṇam adhyāsitvātha tasya vidhiḥ// BY_17.7

priyaṅgusiddharthakanāgadānagorocanākṣair ghṛtaiḥ sametaiḥ/
prāg ātmarakṣā praticakrapūtaiḥ snānonmukhasyāvanipasya kāryā// BY_17.8

śvetasya babhror athavā vṛṣasya carmāstare vyāghramṛgendrayor vā/
tatsthasya kuryān manujeśvarasya jayābhiṣekaṃ vidhivat purodhāḥ// BY_17.9

kramān mahīrūpyasuvarṇakumbhaiḥ kṣīrasya dadhno haviṣaś ca pūrṇaiḥ/
snāyāc ca toyaiḥ saha saptamṛdbhiḥ paścāc ca sarvauṣadhigandhatoyaiḥ// BY_17.10

parijapya mahārauhiṇakuṣmāṇḍakuverahṛdayarudragaṇaiḥ//
abhiṣecayen narendraṃ purohito 'smin samṛdhdyā ca// BY_17.11

dvātriṃśatiṃ ṣoḍaśa vāthavāṣṭau ghaṭapramāṇaṃ munibhiḥ pradiṣṭam/
snātas tv alaṅkāram apāsya pūrvaṃ navaṃ vidadhyād dvijamantrapūrtam// BY_17.12

māgaghabandisuhṛddvijasūtair abhimatavākkṛtamaṅgalakuśalaḥ/
carmasu copaviśed abhiṣiktaḥ pṛṣatagajendraviḍālavṛkāṇām// BY_17.13

gṛhītadhūpāmbaramālyagandhas trir bhrāmayitvopari cauṣadhīṃś ca/
vāme 'sya pārśve 'grata āsthito vā pratīpapātaṃ juhuyād dhutāśam// BY_17.14

gorocanāhemaphalāni sarpirbrāhmīṃ sadūrvāṃ sitasarṣapāṃś ca/
āsevya sarvāṇi yathopadeśaṃ bhaktyā dvijān svasti ca vācayitvā// BY_17.15

saumyena yāyāt phalapuṣpapāṇir dvāreṇa paśyen na ca pauruhūtam/
prāg uddhared dakṣiṇapādam evaṃ kurvan nṛpaḥ sarvaripūn praśāsti//E16 BY_17.16

chap.18 grahayajña

grahayajñam ato vakṣye tatra nimittāni lakṣayed vedyām/[cited in bs 43.14]
bhaṅgo mānonāyāṃ digbhraṣṭāyām asiddhiś ca// BY_18.1

nagarapurohitadevīsenāpatipārthivakṣayaṃ kurute/[cited in bs 43.14]
prāgdakṣiṇāparottaramadhyamabhāgeṣu yā vikalā// BY_18.2

tatrārcā tāmramayī savituḥ pālāśikā susruksamidhaḥ/
ā kṛṣṇeti ca mantro raktā gandhāḥ sahāguraṇāḥ// BY_18.3

māṣātasītilāṃś cārkasamudgacaṇakān vihāya bhojyavidhiḥ/
vakulārkāgastyapalāśaśallakīkusumapūjā ca// BY_18.4

aṣṭaśatasaṃmitebhyo viprebhyo dakṣiṇāhitāgnibhyaḥ/
deyā vṛṣakanakamahī sahasrakiraṇaṃ (sa)muddiśya// (sūryaḥ) BY_18.5

nyagrodhāt sruksamidhaḥ sphaṭikād arcā ca śitagoḥ kāryā/
śaileyakanakhavarjyā gandhāḥ kusumāni ca sitāni// BY_18.6

godhūmaśāliyāvaravaṇḍagopayaḥ pūrvam aśanam atha mantraḥ/
āpyāyasveti bhavec cāturvedāya dadyāc ca// BY_18.7

maṇimuktākṣaumahiraṇyasaṃyutāṃ śvetatulyavatsāṅgām/
rajataśaphaviṣāṇāṃ kṣīriṇīṃ ca tu himāṃśum uddiśya//(candraḥ) BY_18.8

raktakaravīrasamidho raktā gandhāś ca candanāt pratimā/
mantraś cāgnir mūrdhety aśanaṃ guḍaṣaṣṭikaprāyam// BY_18.9

tāmrakanakapravālaurṇikāni deyāni dakṣiṇā cāsya/
uddiśya dharātanayaṃ chandogebhyo vratasthebhyaḥ//maṃ(galaḥ) BY_18.10

mantraś codbūdhyasvetyādi pratimā ca yuktilohamayī/
sruksamidhaś ca madhūkād atha vā cāndrer apāmārgāt// BY_18.11

yuktiprāyā gandhāḥ kālīyakakuṅkumapriyaṃgvādyāḥ/
kusumāni mālatīvakulatilakamadayantikādīni// BY_18.12

bhojyaṃ masuratilaśālimudgacaṇakādi dakṣiṇā svacchaś ca/
sarajatamaṇir vratibhyaś cāndrer ātharvaṇebhyaś ca//bu(dhaḥ) BY_18.13

aśvatthyarjunasamidhaḥ kanakārcā tv agnivarjitā gandhāḥ/
pītakusumāni ca guror bhojyaṃ tilamudgacaṇakāni// BY_18.14

bahvṛgbhya ekavarṇaṃ madhyamavayasaṃ turaṅgamaṃ dadyāt/
śṛṅgīsuvarṇayuktaṃ bṛhaspateś ceti guror mantraḥ//bṛ(haspatiḥ) BY_18.15

rajatārcā madanīyā gandhāḥ kusumāni citrasurabhīṇi/
panasodumbarasamidho bhojyaṃ vṛṣyaṃ ca bhṛgusūnoḥ// BY_18.16

annāt parisrutādyo mantraḥ strīkarkaśās tv alaṅkārāḥ/
adhvaryubhyo deyā dvātriṃśadbhyaḥ tadarhebhyaḥ//śu(kraḥ) BY_18.17

śālaśamīsruksamidhaḥ śanno devīti bhāskarer mantraḥ/
lohārcā śaileyakamustakaśuktyutkaṭā gandhāḥ// BY_18.18

girikarṇikātasīspandanāṃjanādīni kṛṣṇapuṣpāṇi/
aśanāni kṛṣṇatilamāṣacaṇakaniṣpāvamukhyāni// BY_18.19

preṣyām atītavayasāṃ trapvaṃjanasīsakṛṣṇalohayutām/
dadyād uddiśyārkiṃ vṛṣalīpativṛddhamūrkhebhyaḥ//śa(niḥ) BY_18.20

vaibhītasruksamidho rāhor home 'thavā bhaved dūrvā/
mantraś ca kayā naścitrapūrvako 'rcā ca nāgamayī// BY_18.21

uddiśya saiṃhikeyaṃ mahiṣaṃ pratipādayet suvṛddhebhyaḥ/
viprebhya iti yad anyat tat sarvaṃ sūryaputrasamam//(rāhuḥ) BY_18.22

ketoḥ kāṃsyapratimā ketuṃ kṛṇvann na ketave mantraḥ/
āraṇyakusumapūjā sruksamidhaḥ khadirakuśamayyaḥ// BY_18.23

māṃsaudanam ananaṃ 1brahmabandhuvargasya dakṣiṇā deyā/
praharaṇaphalgudravyāṇi caivaṃ ketuṃ samuddiśya//(ketuḥ)E24 BY_18.24

chap.19 agnilakṣaṇa

kṛtvaivaṃ grahapūjām ṛcā tataś cāgniliṅgayā juhuyāt/
ślokāṃś cāsminn arthe kāśyapamunicoditān vakṣye// BY_19.1

tato 'pratirathaṃ kṛtsnaṃ yātrāliṅgaṃ ca yad bhavet/
āyuṣyam abhayaṃ caiva sarvaṃ caivāparājitam// BY_19.2

śarmavarmagaṇaṃ caiva tathā svastyayanaṃ gaṇam/
etān pañcagaṇān hutvā saṃsthāpyāgniṃ yathāvidhi// BY_19.3

bhūta bhūteti ca gaṇaṃ yatte candras tathaiva ca/
aindro gaṇas tathā cāndro mantrāśīḥsūktam eva ca// BY_19.4

bhūyo bhūyas tathā jvālāṃ saṃspṛśyātha purohitaḥ/
spṛśec ca nṛpatiṃ mantrair uccair brūyāt punaḥ punaḥ// BY_19.5

cakṣurdaḥ prāṇadaś cāpi varcodaś ca bhava prabho/
anādhṛṣyatamaś cāsi yathā tvaṃ havyavāhana// BY_19.6

śātravāṇāṃ tathā rājāpy anādhṛṣyo bhavaty ayam/
hūyamāne nimittāni vakṣyāmy aham ataḥ param// BY_19.7

kampotkāsavijṛmbhaṇapracalanasvedāśrupātakṣudho-
dgārādyaṃ ca purodhasaḥ smṛtivipac cāniṣṭam anyac chubham/
ājyaṃ keśapipīlikāmalayutaṃ sattvāvalīḍhaṃ ca yat
tan neṣṭaṃ śubham anyathopakaraṇaṃ dravyāṇy anūnāni ca// BY_19.8

utthāya svayam ujjvalārcir analaḥ svāhāvasāne havir
bhukte dehasukhaḥ pradakṣiṇagatiḥ snigdho mahān saṃhataḥ/
nirdhūmaḥ surabhiḥ sphuliṅgarahito yātrānulomo mṛdur
muktendīvarakāñcanadyutidharo yātur jayaṃ śaṃsati// BY_19.9

iṣṭadravyaghaṭātapatraturagaśrīvṛkṣaśailākṛtir
bheryabdodadhidundubhībhaśakaṭasnigdhasvanaḥ pūjitaḥ/
neṣṭaḥ proktaviparyayo hutavahaḥ snigdho 'nyathāpīṣṭadaḥ
savye 'ṅge nṛpatiṃ dahann atihitaḥ śeṣaṃ ca lokād vadet//E10 BY_19.10

chap.20 prasthānika

vrajed digīśaṃ hṛdaye niveśya yathendra mainryām aparāś ca tadvat/
suśuklamālyāmbarabhṛn narendro visarjayed dakṣiṇapādam ādau// BY_20.1

sitātapatro maṇiratnaśobhaḥ pradhūyamānaiḥ sitacāmaraiś ca/
jayasvanāpūritarājamārgo dvijendramantrābhivivṛddhatejāḥ// BY_20.2

kanyāṇanāmasacivāptajanāyudhīyadaivajñaviprajanakaṃcukimadhyasaṃsthaḥ/
dvātriṃśataṃ samupagamya padāni bhūmau prāgādi nāgarathavājinraiḥ prayāyāt//E3 BY_20.3

chap.21 gajalakṣaṇeṅgita

mā bhūt prasaṅgād ativistaro 'tra gajāśvapuṃlakṣaṇadarśaneṣu/
nimittamātraṃ kathayāmy ato 'haṃ prayāṇakālopayikaṃ nṛpāṇām// BY_21.1

tāmrauṣṭhatāluvadanāḥ kalaviṅkanetrāḥ snigdhonnatāgradaśanāḥ pṛthulāyatāsyāḥ/
cāponnatāyatanigūḍhanimagnavaṃśās tanvekaromacitakūrmasamānakumbhāḥ// BY_21.2

vistīrṇakarṇahanunābhilalāṭaguhyāḥ kūrmonnatair\footnote{Bṣ 66.7b kūrmonnata-} dvinavaviṃśatibhir nakhaiś ca/
rekhātrayopacitavṛttakarāḥ sajalāmbhodaninādavṛṃhiṇaḥ\footnote{Bṣ 66.7d dhanyāḥ sugandhimadapuṣkaramārutāś ca}/ BY_21.3

dīrghāṅguliraktapuṣkarāḥ sajalāmbhodaninādavṛṃhiḥaḥ/
bṛhadāyatavṛttakaṃdharā dhanyā bhūmipater matāṅgajāḥ\footnote{Bṣ 66.8d mataṅgajāḥ}// BY_21.4

nirmadābhyadhikahīnanakhāṅgān kubjavāmanakameṣaviṣāṇām/
dṛśyakośaphalapuṣkarahīnān śyāvanīlaśavalasitatālūn// BY_21.5

svalpavaktraruhamatkuṇakhaṇḍān hastinīṃ ca gajalakṣaṇayuktām/
garbhiṇīṃ ca nṛpatiḥ paradeśaṃ prāpayed ativirūpaphalās te// BY_21.6

dantamūlapariṇāhadīrghatāṃ dviḥ pramucya parato 'sya kalpayet/
śyāvāpūtimalaraktadarśanaṃ pāpasattvasadṛśaṃ ca pāpadam// BY_21.7

pārthivopakaraṇākṛtiṃ yadā cihnam udvahati kalpite rade/
śrījayārthabalavṛddhayas tadā snigdhaśuklarucirāś ca śobhanāḥ// BY_21.8

dakṣiṇe śubham atīva śobhanaṃ pāpam apy ativirūpam anyataḥ/
yāpyatā bhavati tadviparyaye vistaro 'nyamunibhiḥ prakīrtitaḥ// BY_21.9

mūlamadhyadaśanāgrasaṃsthitā devadaityamanujāḥ kramāt tataḥ/
sphītamadhyaparipelavaṃ phalaṃ śīghramadhyacirakālasambhavam// BY_21.10

dantabhaṅgaphalam atra dakṣiṇe bhūpadeśabalavidravapradam/
vāmataḥ sutapurohitebhayān hanti sāṭavikadāranāyakān// BY_21.11

ādiśed ubhayabhaṅgadarśanāt pārthivasya sakalaṃ kulakṣayam/
saumyalagnatithibhādibhiḥ śubhaṃ vardhate 'śubham ato 'nyathā bhavet// BY_21.12

kṣīravṛkṣaphalapuṣpapādapeṣv āpagātaṭavighaṭṭanena\footnote{Bṣ 93.11béġvighaṭṭitena} vā/
vāmamadhyaradabhaṅgakhaṇḍane śatrunāśakṛd ato 'nyathāparam// BY_21.13

skhalitagatir akasmāt trastakarṇo 'tidīnaḥ śvasiti mṛdu sudīrghaṃ nyastahastaḥ pṛthivyām/
drutamukulitadṛṣṭiḥ svapnaśīlo vilomo bhayakṛd ahitabhakṣī naikaśo 'sṛcchakṛtkṛt// BY_21.14

valmīkasthāṇugulmakṣupatarumathanaḥ svecchayā dṛṣṭadṛṣṭir
yāyād yātrānulomaṃ tvaritapadagatir vaktram unnāmya coccaiḥ/
kakṣāsannāhakāle janayati ca muhuḥ śīkaraṃ vṛṃhitaṃ vā
tatkālaṃ vā madāptir jayakṛd atha radaṃ veṣṭayan dakṣiṇaṃ ca//E15 BY_21.15

chap.22 vājilakṣaṇeṅgita

āvartasattvadyutivarṇajātiyānasvarāṅgādiguṇopapannāḥ/
saṃkṣepato 'śvā vijayāya rājñām āvartaleśopanayo yato 'yam// BY_22.1

aśrupātahanugaṇḍahṛdgalaprothaśaṅkhakaṭivastijānuṣu/
muṣkanābhikakude tathā gude savyakukṣicaraneṣu cāśubhāḥ// BY_22.2

ye prapānagalakarṇasaṃsthitāḥ pṛṣṭhamadhyanayanoparisthitāḥ/
oṣṭhavaṅkri\footnote{Bṣ 65.céġsakthi}bhujakukṣipārśvagās te lalāṭasahitāḥ suśobhanāḥ// BY_22.3

vālāvakiraṇaheṣitadhūmajvālādi codyame lakṣyam/
turagāṇām atrāryāḥ prakīrtitā viṣṇuguptakṛtāḥ// BY_22.4

tatrotsargeṇāsanapaścimabhāgāśraye jvalanam eṣām/
neṣṭam itaratra śastam vāmetarapārśvayos tadvat// BY_22.5

samam anyat padakesarapuccheṣu jvalanadahanakaṇadhūmāḥ/
rāṣṭrabhayarogasambhramasapatnacakrāpamardakarāḥ// BY_22.6

prākphalatulyaṃ pṛṣṭhe jaghane vāleṣu caiva nirdiṣṭam/
antaḥpuraprakopo meḍhrajvalane sadhūme vā// BY_22.7

nityaṃ ca bālakiraṇe dāhajvālāsphuliṅgakaṇadhūmāḥ/
skandhāsanāṃsadeśe vadhāya bandhāya ca raṇeṣu// BY_22.8

vakṣokṣilalāṭabhujeṣv aśvānāṃ heṣatāṃ ca vadanebhyaḥ/
jvālotpattir jayadā dhūmotpattiḥ svāmino 'bhāvāya// BY_22.9

nāsāpuṭāśrupātaprothaśirolocaneṣu rajanīṣu/
vijayāya prajvalanaṃ tāmrāsitaharitaśavalānām// BY_22.10

vijayāya sarvaidaiva hi suśuklaśukavarṇayor jvalanam eṣu/
evaṃ ca yathāsambhavam anyeṣv api vāhaneṣu phalam// BY_22.11

iṣṭāniṣṭavyaṃjakam ataḥ paraṃ heṣitaṃ samavadhāryam/
tac ca prasāritācalaśirodharodbhūtam iṣṭaphalam// BY_22.12

grāsāntarvaktrāṇām uccaiḥ snigdhānunādi gambhīram/
dvijapūrṇabhājaneṣṭadravyasraggandhasuramūlaiḥ// BY_22.13

khalinānnapānavarmasvāmyupakaraṇābhinanditā caiṣām/
sarvārthasiddhaye syād dakṣiṇapārśvaṃ vilokayatām// BY_22.14

sandhyāsu dīptadiṅmukhasambhramagāḍhapranaṣṭanidrāś ca/
heṣanto bhayajananā vadhabandhaparājayakarāś ca// BY_22.15

vakrīkṛtavāladhayo dakṣiṇapārśvānuśāyino neṣṭāḥ/
vāmacaraṇaiḥ kṣititalaṃ ghnanto jñeyāḥ pravāsāya// BY_22.16

sajṛmbhaṇaṃ pṛṣṭhavidhūnanaṃ ca vālaprakāras tv asakṛl lilikṣoḥ/
pādena pādākalanaṃ prasaṅgaḥ senāsamudyogadṛśāṃ hayānām// BY_22.17

nidrānirodhālasanīlanetrāḥ pradhyānaśūnyasmṛtayo dineṣu/
niśāsu cānyonyavirodhanaṣṭanidrās turaṅgā na śivāya bhartuḥ// BY_22.18

jaṃghe liṃhannavraṇaromapaṅke pādau ca saṃhṛṣṭatanur jayāya/
viparyayaḥ paścimayoḥ prayatnāt svayaṃ tu yātrābhimukho niyamya// BY_22.19

muhurmuhur mūtraśakṛt karoti na tāḍyāmāno 'py anulomayāyī/
akāryabhīto 'śruvilocanaś ca śivaṃ na bhartus turago vidhatte// BY_22.20

ārohati kṣitipatau vinayopapanno yātrānugo 'nyaturagaṃ pratiheṣitaś ca/
vaktreṇa vā spṛśati dakṣiṇam ātmapārśvaṃ yo 'śvaḥ sa bhartur acirāt pratanoti lakṣmīm//E21 BY_22.21

chap.23 śakunaśubhāśubha

anyajanmāntarakṛtaṃ puṃsāṃ karma\footnote{Bṣ 85.5b karma puṃsāṃ} śubhāśubham/
yat tasya śukunaḥ pākaṃ nivedayati gacchatām// BY_23.1

grāmyāraṇyāmbubhūvyomadyuniśobhayacāriṇaḥ/
rutayātekṣitokteṣu grāhyaḥ puṃstrīnapuṃsakāḥ/ BY_23.2

pṛthagjāty anavasthānād eṣāṃ vyaktir na labhyate\footnote{Bṣ 85.7d lakṣyate}/
sāmānyalakṣaṇoddśe ślokāv ṛṣikṛtāv imau// BY_23.3

pīnonnatavikṛṣṭāṅgāḥ\footnote{Bṣ 85.8a -aṅgāḥ} pṛthugrīvāḥ savakṣasaḥ\footnote{Bṣ 85.8b sthiravikramāḥ}/
svalpagambhīravirutāḥ pumāṃsaḥ sthiravikramāḥ// BY_23.4

tanugrīvaśironāsāḥ\footnote{Bṣ 85.9a tanūraskaśirogrīvāḥ} sūkṣmāsyapadavikramāḥ/
prasanna\footnote{Bṣ 85.9c prasakta-}mṛdubhāṣiṇyaḥ striyo 'to 'nyaṃ napuṃsakam// BY_23.5

grāmyāraṇyapracārādyaṃ lokād evopalakṣayet/
saṃvikṣipsur ahaṃ vacmi yātrāmātraprayojanam// BY_23.6

pathyātmānaṃ nṛpaṃ sainye pure coddiśya devatām/
sārthe prdhānaṃ sāmye tu\footnote{Bṣ 85.11d syāj} jātividyāvayodhikam// BY_23.7

muktaprāptaiṣyasūryāsu\footnote{Bṣ 85.12a -arkāsu} phalaṃ dikṣu tathāvidham/
aṅgāradīptadhūminyas tāś ca śāntās tato 'parāḥ// BY_23.8

tatpañcamadiśāṃ tulyaṃ phalaṃ\footnote{Bṣ 85.13b śubhaṃ} traikālyam ādiśet/
pariśeṣadiśor vācyaṃ yathāsannaṃ śubhāśubham// BY_23.9

śīghram āsannanimnasthaiś cirād unnatadūragaiḥ/
sthānavṛdhyupaghātāś ca tadvad brūyāt phalaṃ budhaḥ\footnote{Bṣ 85.14d punaḥ}// BY_23.10

kṣaṇatithyuḍuvātārkair daivadīpto yathottaram/
kriyādīpto gatisthānabhāvasvaraviceṣṭitaiḥ// BY_23.11

daśadhaivaṃ praśānto 'pi saumyas tṛṇaphalāśanaḥ/
māṃsāmedhyāśano raudro vimiśro 'nnāśanaḥ smṛtaḥ// BY_23.12

harmyaprāsādamāṅgalya\footnote{Bṣ 85.17a -maṅgalya-}manojñasthānasaṃsthitāḥ/
śreṣṭhā madhurasakṣīraphalapuṣpadrumeṣu ca// BY_23.13

svakāle giritoyasthā balino dyuniśācarāḥ/
klīvastrīpuruṣāś caiva balinaḥ syur yathottaram// BY_23.14

javajātibalasthānaharṣasattvair balānvitāḥ\footnote{Bṣ 85.19b svarānvitāḥ}/
svabhūmāv anulomāś ca tadūnāḥ syur vivarjitāḥ// BY_23.15

ka(ms.ku)kkuṭebhacirillyaś\footnote{Bṣ -pirilyaś} ca śikhivañjulacchikkarāḥ/
balinaḥ siṃhanādāś ca kūṭapūrī ca pūrvataḥ// BY_23.16

kroṣṭukolūkahārītakākakokarkṣapiṅgalāḥ/
kapotaruditākrandra(ms.ākranda)krūraśabdāś ca yāmyataḥ// BY_23.17

gośaśakrauñcalomāśahaṃsotkrośakapiñjalāḥ/
viḍālotsavavāditragītahāsāś ca vāruṇāḥ// BY_23.18

śatapatrakuraṅgākhumṛgaikaśaphakokilāḥ/
cāṣaśalyakapuṇyāhaghaṇṭāśaṃkharavā udak// BY_23.19

na grāmyo 'raṇyago grāhyo nāraṇyo grāmasaṃsthitaḥ/
divācaro na śarvaryāṃ na ca naktaṃcaro divā// BY_23.20

dvandvarogārditatrastakalahāmiṣakāṃkṣiṇaḥ/
āpagāntaritā mattā na grāhyāḥ śakunāḥ kvacit// BY_23.21

rohitāśvājavāleyakuraṅgoṣṭramṛgāḥ śaśāḥ/
niṣphalāḥ śiśire jñeyā vasnate kākakokilau// BY_23.22

na tu bhrādrapade grāhyāḥ sūkarāś ca\footnote{Bṣ 85.27b sva} vṛkādaya/
śarady abjādagokrauñcāḥ śrāvaṇe hasticātakau// BY_23.23

vyāghrarkṣavānaradvīpimahiṣāḥ savileśayāḥ/
hemante niṣphalā jñeyā bālāḥ sarve vimānuṣāḥ// BY_23.24

aindrānaladiśor madhye tribhāgeṣu vyavasthitāḥ/
kośādhyakṣānalājīvitapoyuktāḥ pradakṣiṇam// BY_23.25

śilpī bhikṣur vivastrā strī yāmyānaladigantare/
parataś cāpi mātaṅgagopadharmasamāśrayāḥ// BY_23.26

nairṛtīvāruṇīmadhye pramadāḥ sūtitaskarāḥ/
śāktikaḥ\footnote{Bṣ 85.31c śauṇḍikaḥ} śākunir hiṃsro vāyavīpaścimāntare// BY_23.27

viṣaghātakagosvāmikuhakajñās tataḥ param/
dhanavānīkṣaṇīkaś ca mālākāras tataḥ param\footnote{Bṣ 85.23d paraṃ tataḥ}// BY_23.28

vaiṣṇavaś carakaś caiva vājinām rakṣaṇe rataḥ/
evaṃ dvātriṃśato bhedāḥ pūrvadigbhiḥ sahoditāḥ// BY_23.29

rājā kumāro netā ca dūtaḥ śreṣṭhī caro dvijaḥ/
gajādhyakṣaś ca pūrvādyāḥ kṣatriyādyāś caturdiśaḥ// BY_23.30

gacchatas tiṣṭhato vāpi diśi yasyāṃ vyavasthitaḥ/
virauti śakuno vācyas taddigjena samāgamaḥ// BY_23.31

bhinnabhairavadīnārtaparuṣākṣamajarjarāḥ/
svarā neṣṭāḥ śubhāḥ śāntā hṛṣṭaprakṛtipūritāḥ// BY_23.32

śivāśyāmāralāchucchupiṅgalāgṛhagodhikāḥ/
sūkarī parapuṣṭā ca punnāmānaś vāmatah// BY_23.33

strīsaṃjñā bhāsabhaṣakakapiśrīkarṇacchitkarāḥ/
śikhiśrīkaṇṭhapippīkāruruśyenāś ca dakṣiṇā// BY_23.34

kṣveḍāsphoṭitapuṇyāhagītaśaṃkhāmbuniḥsvanāḥ/
satūryādhvayanāḥ puṃvat strīvad anyā giraḥ śubhāḥ// BY_23.35

grāmyau madhyamaṣaḍjau tu gāndhāraś ceti śobhanāḥ/
ṣaḍjaumadhyamagāndhārā ṛṣabhaś ca svarā hitāḥ// BY_23.36

rutakīrtanadṛṣṭeṣu bhāradvājājabarhiṇaḥ/
dhanyau nakulacāṣau ca saraṭaḥ pāpado 'grataḥ// BY_23.37

jāhakāhiśaśakroḍagodhānāṃ kīrtanaṃ śubham/
rutasaṃdarśanaṃ neṣṭaṃ pratīpaṃ vānararkṣayoḥ// BY_23.38

ojāḥ pradakṣiṇaṃ śastā mṛgāḥ sanakulāṇḍajāḥ/
cāṣaṃ sanakulaṃ vāmaṃ bhṛgur āhāparāhnataḥ// BY_23.39

chitkaraḥ\footnote{Bṣ 85.44a chikkaraḥ} kūṭapūrī ca pirilī(?) cāhni dakṣiṇāḥ/
apasavyaṃ sadā śastā daṃṣṭriṇaḥ savileśayāḥ// BY_23.40

śreṣṭhe hayasite prācyāṃ śavamāṃse ca dakṣiṇe/
kandakādadhinī paścād udag gā viprasādhavaḥ// BY_23.41

jālaśvacaraṇau neṣṭau prāg yāmye śastraghātakau/
paścād āsavaṣaṇḍau ca khalāsanahalāny udak// BY_23.42

karmasaṅgamayuddheṣu praveśe naṣṭamārgane/
yānavyatyastagā grāhyā viśeṣaś cātra kathyate\footnote{Bṣ 85.47d vakṣyate}// BY_23.43

divā prasthānavad grāhyāḥ kuraṅgaruruvānarāḥ/
ahnas tu prathame bhāge cāṣavañjulakukkuṭāh// BY_23.44

paścime śarvarībhāge naptṛkokūkapiṅgalāh/
sarva eva viparyasthā grāhyāḥ sārtheṣu yoṣitām// BY_23.45

nṛpasandarśane grāhyāḥ praveśe 'pi prayāṇavat/
giryaraṇyapraveśeṣu nadīnāṃ cāvagāhane// BY_23.46

vāmadakṣiṇagau śastau yau tu tāv agrapṛṣṭhagau/
krīyādīptau vināśāya yātuḥ praighasaṃjñitau// BY_23.47

tāv eva tu yathābhāgaṃ praśāntarutaceṣṭitau/
śakunau śakunadvārasaṃjñitāv arthasiddhaye// BY_23.48

kecit tu śakunadvāram icchanty ubhayataḥ sthitaiḥ/
śakunair ekajātīyaiḥ śāntaceṣṭāvirāvibhiḥ// BY_23.49

visarjayati yady eka ekaś ca pratiṣedhati/
sa virodho 'śubho yātur grāhyo vā balavattaraḥ// BY_23.50

pūrvaṃ prāveśiko bhūtvā punaḥ prāsthāniko bhavet/
sukhena siddhim ācaṣṭe praveśe tadviparyayāt// BY_23.51

visṛjya śakunaḥ pūrvaṃ sa eva niruṇaddhi cet/
prāha yātur arer mṛtyuṃ samaraṃ\footnote{Bṣ 85.56d ḍamaraṃ} rogam eva ca// BY_23.52

apasavyās tu śakunā dīptā bhayanivedinaḥ/
ārambhe śakuno dīpto vṛṣānte\footnote{Bṣ 85.57d varṣāntas} tadbhayaṃkaraḥ// BY_23.53

tithivāyuarkabhasthānaceṣṭādīptā yathākramam/
dhanasainyabalāṅgeṣṭakarmaṇāṃ syur bhayaṃkarāḥ// BY_23.54

jīmūtadhvanidīpteṣu bhayaṃ bhavati mārutāt/
ubhayoḥ sandhyayor dīptāḥ śastrodbhavabhayaṃkarāḥ// BY_23.55

citākeśakapāleṣu mṛtyubandhavadhapradāḥ/
kaṇṭakīkāṣṭhabhasmasthāḥ kalahāyāsaduḥkhadāḥ// BY_23.56

aprasiddhiṃ bhayaṃ vāpi niḥsārāśmavyavasthitāh/
kurvanti śakunā dīptāḥ śāntā yāpyaphalās tu te// BY_23.57

āsiddhisiddhidau\footnote{Bṣ 85.62a asiddhisiddhidau, āsiddhisiddhidauéīéġôṅé“éK‍h̲éóéṝéīüCBṣéḵÅ]éŚéŌôṅé—üB} jñeyau nirhārāhārakāriṇau/
sthānāt krośan\footnote{Bṣ 85.62c ruvan} vrajed yātrāṃ śaṃsate tv anyathāgamam// BY_23.58

kalahaḥ svaradīpteṣu sthānadīpteṣu vigrahaḥ/
uccam ādau dhvaniṃ\footnote{Bṣ 85.63c svaraṃ} kṛtvā nīcaṃ paścāc ca doṣakṛt// BY_23.59

ekasthāne ruvan dīptaḥ saptāhād grāmanāśakṛt\footnote{Bṣ grāmaghātakaḥ}/
puradeśanṛpāṇāṃ ca ṛtvardhāyanavatsarāt// BY_23.60

sarve durbhikṣakartāraḥ svajātipiśitāśanāḥ/
sarpamūṣikamārjārapṛthuromavivarjitāḥ// BY_23.61

parayoniṣu gacchanto maithunam deśanāśanāḥ/
anyatra veśarotpatter nṛṇāṃ vājātimaithunāt// BY_23.62

bandhaghātavadhāni\footnote{Bṣ 85.67a -bhayāni} syuḥ pādorumastakābhigaiḥ\footnote{Bṣ 85.67b pādorūmastakāntigaiḥ}/
apsasyapiśitānnaādair vargamoṣakṣatagrahāḥ// BY_23.63

iṣṭaṃ vā gorasānnaṃ vā bhāradvājasya darśane/
cāṣasya pūrṇavaktrasya mahān lābhaḥ pradakṣiṇe// BY_23.64

vāmadakṣiṇagaḥ śreṣṭhaḥ purastāc ca kapiṃjalaḥ/
tittiriḥ pṛṣṭhataḥ śreṣṭhaḥ sarvatrānyatra garhitaḥ// BY_23.65

anulomo vṛṣo nardan dhanyo gaur mahiṣas tathā/
gamanapratiṣedhāya kharaḥ pratyurasi sthitaḥ// BY_23.66

ulūkī vāmataḥ kṣemyā dakṣiṇena ca kokilā/
śarkariś ca (?) mayūraś ca śasyate dakṣiṇe sadā// BY_23.67

vṛkāḥ śṛgālāḥ śārdūlā viḍālā gardabhāḥ śunaḥ/
vāmato 'rthakarā jjeyāḥ kuraṅgā dakṣiṇena ca// BY_23.68

riktakumbo 'nukūlaś ca śasto 'mbhorthī yiyāsataḥ/
cauryavidyāvaṇigvittam udyatānāṃ viśeṣataḥ//E69 BY_23.69

chap.24 śivāruta

pṛṣṭhataḥ pūjitā śāntā śivā māṃsāsthivarjitā/
krūraśabdātidīptā ca krūrakarmaṇi pūjitā// BY_24.1

pūrvodīcyoḥ śivā śastā śāntā sarvatra pūjitā/
dhūmitābhimukhī hanti svaradīptā digīśvarān// BY_24.2

[rājā kumāro netā ca dūtaḥ śreṣṭhī caro dvijaḥ/
gajādhyakṣaś ca pūrvādyāḥ kṣatriyādyāś caturdiśam//] BY_24.3

sarvadikṣv aśubhā dīptā viśeṣeṇāhnyaśobhanā/
pure sainye 'pasavyā ca kaṣṭā pūrvonmukhā śivā// BY_24.4

yāhīty agnibhayaṃ śāsti ṭāṭeti mṛticoditā\footnote{Bṣ 89.6b mṛtavedikā}/
dhigdhik duṣkṛtam ācaKṣe sajvālā deśanāśinī// BY_24.5

naiva dāruṇatām eke svajvālāyāḥ\footnote{Bṣ 89.7b sajvālāyāḥ} pracakṣate/
arkādyanalavat tasyā vaktrāj jvālā svabhāvataḥ\footnote{Bṣ 89.7d vaktraṃ lālāsvabhāvataḥ}// BY_24.6

anyapratirutā yāmyā sā bandahavadhaśaṃsinī/\footnote{Bṣ 89.8b sodbandhamṛtaśaṃsinī}
vāruṇyābhirutā\footnote{Bṣ 89.8c anurutā} saiva saṃsate salile mṛtim// BY_24.7

akṣobhyaśravaṇaṃ ceṣṭaṃ dhanaprāptiḥ priyāgamaḥ/
kṣobhāt pradhānabhedaś ca vāhanānām asampadaḥ\footnote{Bṣ 89.9d ca sampadaḥ}/ BY_24.8

phalam ā saptamād etad agrāhyaṃ parato rute/
yāmyāyāṃ tadviparyastaṃ phalaṃ ṣaṭpañcamād rute\footnote{Bṣ 89.10d ṛte}// BY_24.9

yā romāṃcaṃ manuṣyāṇāṃ śakṛnmūtraṃ ca vājinām/
rāvāt trāsaṃ ca janayet sā śivā na śivapradā// BY_24.10

maunaṃ gatā pratirute naradviradavājibhiḥ/
yā śivā sā śivaṃ sainye pure vā saṃprayacchati//E11 BY_24.11

chap.25 vāyaseṅgita

śasto nīḍas tu vaiśākhe padape nirupadrave/
deśotthānaṃ tu valmīkacaityadhānyagṛhādiṣu// BY_25.1

kākānāṃ śrāvaṇe dvitricatuḥśāvāḥ śubhāvahāḥ/
gairikaśvetacitrāś ca varṇāś caurāgnimṛtyudāḥ// BY_25.2

aṇḍāvakiraṇe dhvāṃkṣā durbhikṣamarakāv ubhau/
śāvānāṃ vikalatve vā niḥśāvatve kṛtāthavā// BY_25.3

hared upanayed vāpi yad dravyaṃ vāyaso 'grataḥ/
tan nāśalabdhau vijñeyau hemapīte vinirdiśet// BY_25.4

raktadravyaṃ pradagdhaṃ vā nyasan gehe 'gnidaḥ smṛtaḥ/
tṛṇabhasmāsthikeśāṃś ca śayane svāmimṛtyudaḥ// BY_25.5

purasainyopari vyomni vyākulair anilād bhayam/
savyamaṇḍalagaiḥ svārtham apasavyaiḥ parodbhavam// BY_25.6

akāryasahitair bhedo rodhaś cakrākṛtisthitaiḥ/
vargataś cābhighātaḥ syād ripuvṛddhiś ca nirbhayaiḥ// BY_25.7

upānacchatrayānāṅgaśastracchāyāvakuṭṭane/
mṛtyuṃ tatsvāmino brūyāt pūjā syāt tatprapūjane// BY_25.8

kāṣṭharajjvasthiniḥsārakeśakaṇṭakabhṛd ruvan/
vyālāhivyādhiśastrāgnitaskarebhyo bhayaṅkaraḥ// BY_25.9

yuddhaṃ senāṅgasaṃstheṣu moṣakṛt svāvalekhane/
caran niśi vināśāya durbhikṣaṃ dhānyamoṣakṛt// BY_25.10

vāmapārśvasthitaḥ śreṣṭho dakṣiṇād vāpi vāmagaḥ/
dhvāṃkṣaḥ pārśvadvayenāpi śasto yātrānulomagaḥ// BY_25.11

yātuḥ karṇasamo dhvāṃkṣaḥ kṣemyo nārthaprasādakaḥ/
vāmādakṣiṇago neṣṭo vā samānaḥ pratīpagaḥ// BY_25.12

viruvan cāgrataḥ pakṣe dhūnvan dhvāṃkṣo bhayapradaḥ/
pratyurasy upasarpan ca saṃsparśan ca tathā bhavet// BY_25.13

ekapādo calatpakṣaḥ kāko 'vaskandakheṭakaḥ/
vadhabandhakaro vāśan kharasūkarapṛṣṭhagaḥ// BY_25.14

paṅkadigdhaśarīrasya varāhasyoparisthitaḥ/
vāyasaḥ śasyate yātus tūṣṇībhūto ruvann api// BY_25.15

kṣīravṛkṣājamahiṣīgosthito gorasapradaḥ/
annadaḥ parṇavicchedī pānado jalakuṭṭanāt//E16 BY_25.16

chap.26 śveṅgita

nṛhayātapavāraṇebhaśastradhvajadehān avamūtrayan jayāya/
sabhayo vicaran vinā nimittaṃ na śubhaś cābhimukho bhaṣan likhan gām// BY_26.1

uccair bhaṣaṇaṃ samāgatānāṃ dīnaṃ vābhirutaṃ raviṃ nirīkṣya/
saṃgharadanajṛmbhaṇe ca neṣṭe prasthāneṣu tathā vidhūnanaṃ ca// BY_26.2

pūrṇāsyatvaṃ ghrāyakatvaṃ ca yātuḥ prādakṣiṇyaṃ maithunaṃ cānulomam/
yātrākāle sārameyasya śastaṃ padbhyāṃ mūrdhanaḥ svasya kaṇḍūyanaṃ ca//E3 BY_26.3

chap.27 maṅgalāmaṅgala

siddhārthakādarśapayoṃjanāni baddhaikapaścāmiṣapūrṇakumbhāḥ/
uṣṇīṣabhṛṅgāranṛvarddhamānapuṃyānavīṇātapavāraṇāni/ BY_27.1

dadhimadhughṛtarocanākumāryo dhvajakanakāmbujabhadrapīṭhaśaṃkhāḥ/
sitavṛṣakusumāmbarāṇi mīnā dvijagaṇakāptajanāś ca cāruveṣāḥ// BY_27.2

jvalitaśikhiphalākṣatekṣubhakṣyā dviradamṛdaṅkuśacāmarāyudhāni/
marakatakuruvindapadmarāgasphaṭikamaṇipramukhāś ca ratnabhedāḥ// BY_27.3

svayam atha racitāny ayatnato vā yadi kathitāni bhavanti maṅgalāni/
sa jayati sakalāṃ tato dharitrīṃ grahaṇadṛgālabhanaśrutair upāsya// BY_27.4

kārpāsauṣadhakṛṣṇadhānyalavaṇaklīvāsthitailāvasāḥ
paṅkāṅgāraguḍāhicarmaśakṛtaḥ kleśāya savyādhitāḥ/
vātonmattajaḍendhanaṃ tṛṇatuṣakṣutkṣāmatakrārayo
muṇḍābhyaktavimuktakeśapatitāḥ kāṣāyinaś cāśubhāḥ// BY_27.5

paṭupaṭahamṛdaṅgaśaṃkhabherīpaṇavaravaṃ sapatākatoraṇāgram/
pracurakusumatoyaśāntareṇuṃ surabhisuveṣajanaṃ vrajec ca mārgam//E6 BY_27.6

chap.28 dhvajātapatrādiśakuna

dhvajātapatrāyudhasannipātaḥ kṣitau prayāṇe yadi mānavānām/
uttiṣṭhato vāmbaram eti saṅgaṃ patec ca vā tannṛpateḥ kṣayāya/ BY_28.1

dadrupratiśyāmavicarcikāḥ syuḥ karṇākṣirogā piṭakodbhavo vā/
prāyo bale netari vā nṛpe vā jānīta rājño bhayakāraṇaṃ tat// BY_28.2

uttānaśayyāsanavātasarganiṣṭhyūtadurdarśanakāsitāni/
neṣṭāni śabdāś ca tathaiva yātur āgacchatiṣṭhapraviśasthirādyāḥ// BY_28.3

kāryam tu mūlaśakune 'nyataraje tadahni vidyāt phalaṃ niyatam evam ime vicintyāḥ/
prārambhayānasamaye tu tathā praveśe grāhyaṃ kṣutam na śubhadaṃ kvacid apy uśanti// BY_28.4

krośād ūrdhvaṃ śakunavirutaṃ niṣphalaṃ prāhur eke
tatrāniṣṭe prathamaśukune mānayet paṃca ṣaḍ vā/
prāṇāyāmān nṛpatir aśubhe ṣoḍaśaivaṃ dvitīye
pratyāgacchet svabhavanam ato yady aniṣṭas tṛtīyaḥ// BY_28.5

cakre varāhamihiraḥ śakunopadeśam uddeśato munimatāny avalokya samyak/
yad granthavistarabhayād avijānato vā noktaṃ tad anyakathitād api cintanīyam//E6 BY_28.6

chap.29 niveśa

snigdhā sthirā surabhigulmalatā sugandhā śastā pradakṣiṇajalā ca nivāsabhūmiḥ/
neṣṭā viparyayaguṇā kacaśarkarāsthivalmīkakaṇṭakavibhītakasaṅkulā ca// BY_29.1

gatvālayaṃ suragurudvijasādhumitratīrthetihāsajayapuṇyakathāsu tiṣṭhet/
hatvā paśuṃ ripugṛhākṛtam udyame ca prāsyātha vānnamayam asya vidhāya rūpam// BY_29.2

ekatrādhyuṣitasyātrigautamacyavanā jaguḥ/
yātrāṃ tripañcasaptāhāt punarbhadreṇa yojayet// BY_29.3

tac cāyuktam iti prāhur horāśāstravido janāḥ/
vāṃchitārthaphalāvāptau yātrā parisamāpyate//E4 BY_29.4

chap.30 abhiyojya

akṣepaśīlaḥ paruṣābhidhāyī viraktabhṛtyaḥ paradāragāmī/
lubdho 'sahāyo vyasanī kṛtaghnaḥ sthitiprabhettā karaśīrṇarāṣṭraḥ// BY_30.1

visrambhahā krodhavaśo nṛśaṃsaḥ kṣudraḥ pramādī na bahuśrutaś ca/
divyāntarikṣakṣitijair vikārair nipīḍito yaḥ sa tu daivahīnaḥ// BY_30.2

ato viparyastaguṇena rājñā tādṛgvidho 'ristv abhiyuktamātraḥ/
tarur ghunair jagdha ivāttavīryo mahān api kṣipram upaiti bhaṅgam//E3 BY_30.3

chap.31 senāvātavṛṣṭyulkābhūgarjitasandhyā

vidviṣṭapravaranarapratāpahīnā niḥśaucā mṛtavaravāraṇāś ca yodhāḥ/
sotpātaprakṛtiviparyayānuyātā śokārtā ripuvaśam āśu yāti senā// BY_31.1

saṃgrāme vayam amaradvijaprasādāj jyoṣyāmo ripubalam āśv asaṃśayena/
yasyaivaṃ bhavati bale janapravādaḥ so 'lpo 'pi pracurabalaṃ ripuṃ nihanti// BY_31.2

protkṣiptakṣupapāṃśupatravihagacchatradhvajāgrāntakṛd
durgandhiḥ karidānaśeṣajanakaḥ sāvarttaloṣṭotkaraḥ/
yātur vāyur aniṣṭadaḥ śubhakaro yātrānulomodyamaḥ
prahlādī surabhipradakṣiṇagatiḥ svāduś ca siddhipradaḥ// BY_31.3

pṛthughanam anulomaṃ snigdham ambhodavṛndaṃ tarunaganagareṣṭadravyasatvānukāri/
jayadam ubhayapārśvādhiṣṭhitaṃ pṛṣṭhato vā na śubhakaram ato 'nyad yānakāle nṛbhartuḥ// BY_31.4

ninditasattvapiśācavicitrāḥ piśitamṛgākṛtayaḥ paruṣāś ca/
vajramucaḥ kṣatajāśmamuco vā balabhayam āśu janāḥ kathayanti// BY_31.5

bhṛśaṃ kṣaranto rudhirāruṇā vā saśakracāpā khararūkṣanādāḥ/
raṇopayojyākṛticitrarūpā raṇāya dṛṣṭā gagane 'mbuvāhāḥ// BY_31.6

saptāhāntarbalabhayakarī vṛṣṭir anyartujātā
kecid yātrām asitajaladaiḥ protthitāṃ pūjayanti/
citrābhrāyāṃ balapativadho ruk ca pītāmbudāyāṃ
kṣc coṣṇāyāṃ bhavati na cirād ambudāyāṃ vināśaḥ// BY_31.7

vāhanāni savyago hanti yoṣito 'nyathā/
paṃjarākṛtisthitaḥ sarvato baleśvaram// BY_31.8

cāpam aindram anulomam akhaṇḍaṃ projjvalaṃ bahulam āyatam iṣṭam/
sphūrjanaṃ salilakumbhaniṣekaṃ kṣobhitārṇavasamaṃ vijayāya// BY_31.9

tanvī pralambā vijayāya dīrghā taḍid ghanasphūrjathuvarjitā ca/
śastāśaniś cāpy asamīpajātaḥ pradakṣiṇenāpsyati pātaśabdaḥ// BY_31.10

lagne 'rkendū nighnatī śasti paurān ulkā hanyād yātupaurān grahāś ca/
yātuḥ śastā sambhṛtā vā dhruvarkṣe neṣṭāto 'nyā dhūminī śyāvaraktā// BY_31.11

hanyān nṛpapaurarāṣṭrikān bhṛtyāmbhoruhataskarān dvijāṃś ca/
velā kramaśo dināditaḥ kāṣṭhāyāṃ ca sa yatra bhūsvanaś ca// BY_31.12

śastā śāntadvijamṛgaghuṣṭā sandhyā snigdhā mṛduṣavanā ca/
pāṃśudhvastā janapadanāśaṃ dhatte rūkṣā rudhiranibhā vā//E13 BY_31.13

chap.32 utpāta

pariveṣo 'rkaśaśinoḥ śatrupakṣagrahaiḥ saha/
snigdho 'khaṇḍaś ca jayadaḥ pāpado bahumaṇḍalaḥ// BY_32.1

pratilomo 'tibahulo neṣṭa iṣṭaḥ pradakṣiṇaḥ/
nīhāraḥ pāṃśupātaś ca hitaḥ snigdhaḥ pradakṣiṇaḥ// BY_32.2

gandharvanagaraṃ hanti prākprabhṛty avanīśvaram/
baleśaṃ yuvarājaṃ ca purohitam iti kramāt// BY_32.3

sitādyaṃ brāhmaṇādīṃś ca vidikṣu varṇasaṅkarān/
pradakṣiṇaṃ tu yātrāyāṃ jayadaṃ neṣṭam anyathā// BY_32.4

diśāṃ dāho 'tha jayadaḥ pradakṣiṇa upāgataḥ/
śvabhronnate vadho rājño jayāya vyatyayena ca// BY_32.5

ghṛtāmbupayasāṃ srāve cyute vṛkṣāc ca tatkṣayaḥ/
taile ca nāśo mukhyānāṃ rakte śastrakṛtaṃ bhayam// BY_32.6

madyena tu mitho bhedo rugbhayaṃ dadhinisrave/
kusumāt kusumotpattau paracakrāgamaṃ vadet// BY_32.7

bahutoye 'tisaṃśoṣaḥ kūpe 'sṛkpūrtivisravaḥ/
rājño 'bdārdhād vadhaṃ kuryuḥ sroto 'lpatve parāgamaḥ// BY_32.8

vṛṣṭividyutsvanair vyabhre carasthiraviparyaye/
dinolkāyāṃ ca pīḍyante janā bhūpatibhiḥ saha// BY_32.9

saptāhaṃ santatāny ato vṛṣṭir hanyān narādhipam/
anagnijvalane puṃsāṃ vyādhir āśv eva jāyate// BY_32.10

pīḍā rāṣṭrasya ṣaṇmāsād uṣṇaśītaviparyaye/
māse 'ṣṭame nṛpasyānto nināde paśupakṣiṇām// BY_32.11

nagarāraṇyasattvānām araṇyapurasevane/
rāṣṭrapīḍādhike varṣe mukhyalokasya ca kṣayaḥ// BY_32.12

stambhopalakusūlārcāpīṭhaśayyāpasarpaṇe/
gadane cāpi deśasya nāśaṃ māsatrayād vadet// BY_32.13

gonāgāśvavadho 'bdārdhe vyatyayo vā nṛpāntakṛt/
deśanāśas tathā strīṇāṃ khagāhipaśusambhave// BY_32.14

dhānyarasamadyabhojanaphalapuṣpasnehamāṃsavastrāṇām/
sikatārajorasātmakasaśarkarāṅgāravarṣeṣu// BY_32.15

sutapatnī kṣudrājñā nṛpadeśacamūpamaraṇasaṃkleśāḥ/
bhedo 'pado 'tha mantrivyādhivināśabhūpakrodhāḥ// BY_32.16

niśi suracāpaṃ sitavarṇādyaṃ janayati pīḍāṃ dvijapūrvāṇām/
bhavati ca yasyāṃ diśi taddiśyaṃ narapatimukhyaṃ na cirād dhanyāt// BY_32.17

mṛgapaśurāsabhavājigajānāṃ viyataravo na cirād bhayadātā/
vibudhapatidhvajatoraṇapātaḥ phalam idam eva karoti nṛpāṇām//E18 BY_32.18

chap.33 puradurgālabdho

śuddhair dvādaśakendranaidhanagataiḥ pāpais triṣaṣṭhāyagair
lagne kendragate 'thavā suragurau daiteyapūjye 'thavā/
sarvārambhaphalaprasiddhir udaye rāśau ca kartuḥ śubhe
svagrāmyasthirabhodaye subhavanaṃ kāryaṃ praveśo 'pi vā// BY_33.1

krūrodaye tadahani vyatipātayoge rikte tithāv ṛtusamāptiṣu vaidhṛte vā/
tīkṣṇograbheṣu ca hutāśaviṣābhighātaraudrāṇi siddhim upayāny asite ca pakṣe// BY_33.2

ketūlkārkajarāhukīlakakujā bimbapraviṣṭā yataḥ
sūryendvoḥ pariveṣakhaṇḍam athavā dṛśyeta yasyāṃ diśi/ BY_33.3

kroṣṭuśvāhipipīlikāśaśamṛgādhvāṃkṣādayo vā pure
sainye vāpi yato viśanti hi tataḥ śastroḥ puraṃ ghātayet// BY_33.4

pātālarkṣe rāhuketvoḥ pure 'res toyocchittiḥ sālapātaś ca kāryaḥ/
jāmitrasthe bhūmije 'syāṃśake vā putreṇendor vīkṣite 'gniḥ pradeyaḥ//E5 BY_33.5

chap.34 jayottara

digdāhakṣatajarajośmavṛṣṭipātair nirghātakṣiticalanād ivaikṛtaiś ca/
yuddhānte mṛgaśakunaiś ca dīptanādair no bhadraṃ bhavati jaye 'pi pārthivasya// BY_34.1

śubhā mṛgapatatriṇo mṛdusamīraṇo hlādakṛt
grahāḥ sphuṭamarīcayo vigatareṇudiṅmaṇḍalam/ BY_34.2

yadānyad api vaikṛtaṃ na vijayāvasāne bhavet
tadā sukham akaṇṭakaṃ nṛpatir atti deśaṃ ripoḥ/
udvāham akālotsavam abhiṣekaṃ cātmajasya yaḥ kṛtvā/
prasthānāvihataḥ so 'bhyeti tataś cotsavadineṣu// BY_34.3

paraviṣayapurāptau sādhudevadvijasvaṃ
kulajanavanitāś ca kṣmādhipo noparundhyāt/
vigajaturagaśastrānnārtibhītāṃś ca hanyāc
chubhatithidivasarkṣe hṛṣṭasainyo vaśec ca// BY_34.4

svaviṣayam upagamya mānavendro 'valim upayācitakāni cādhikāni/
nigaditavidhinaiva saṃpradadyāt prathamagaṇāsurabhūtadaivatebhyaḥ// BY_34.5

iti manujapatir yathopadeśaṃ bhagaṇavidāṃ prakaroti yo vacāṃsi/
sa sakalanṛpamaṇḍalādhipatyaṃ vrajati diviva purandaro 'cireṇa//E6 BY_34.6