athātaḥ paśupateḥ pāśupataṃ yoga-vidhiṃ vyākhyāsyāmaḥ //

bhasmanā triṣavaṇaṃ snāyīta //

bhasmani śayīta //

anusnānaṃ //

nirmālyaṃ //

liṅga-dhārī //

āyatana-vāsī //

hasita-gīta-nṛtta-duṃduṃ-kāra-namaskāra-japya-upahāreṇa upatiṣṭhet //

mahā-devasya dakṣiṇā-mūrteḥ //

eka-vāsāḥ //

avāsā vā //

mūtra-purīṣaṃ na avekṣet //

strī-śūdraṃ na abhibhāṣet //

yady avekṣed yady abhibhāṣet //

upaspṛśya //

prāṇa-āyāmaṃ kṛtvā //

raudrīṃ gāyatrīṃ bahu-rūpīṃ vā japet //

akaluṣa-mateḥ //

carataḥ //

tato 'sya yogaḥ pravartate //

dūra-darśana-śravaṇa-manana-vijñānāni ca asya pravartante //

sarva-jñātā //

mano-javitvam //

kāma-rūpitvam //

vikaraṇaḥ //

dharmitvaṃ ca //

sarve ca asya vaśyā bhavanti //

sarveṣāṃ ca avaśyo bhavati //

sarvāṃś cā aviśati //

sarveṣāṃ ca anāveśyo bhavati //

sarve ca asya vadhyā bhavanti //

sarveṣāṃ ca avadhyo bhavati //

abhītaḥ //

akṣayaḥ //

ajaraḥ //

amaraḥ //

sarvatra ca apratihata-gatir bhavati //

ity etair guṇa-yukto [guṇair yukto] bhagavato mahā-devasya mahā-gaṇa-patir bhavati //

atra idaṃ brahma japet //

sadyo-jātaṃ prapadyāmi //

sadyo-jātāya vai namaḥ //

bhave bhave na atibhave //

bhajasva mām //

bhavodbhavaḥ //

vāmaḥ //

devasya //

jyeṣṭhasya //

rudrasya //

kalita-āsanam //

sārva-kāmika ity ācakṣate //

amaṅgalaṃ ca atra maṅgalaṃ bhavati //

apasavyaṃ ca pradakṣiṇam //

tasmād ubhayathā yaṣṭavyaḥ //

devavat pitṛvac ca //

ubhayaṃ tu rudre devāḥ pitaraś ca //

harṣa-apramādī //

caryāyāṃ caryāyām //

māhātmyam avāpnoti //

atidattam atīṣṭam //

atitaptaṃ tapas tathā //

atyāgatiṃ gamayate //

tasmāt //

bhūyas tapaś caret //

na anya-bhaktis tu śaṃkare //

atra idaṃ brahma japet //

vāma-devāya namo jyeṣṭhāya namo rudrāya namaḥ //

kālāya namaḥ //

kala-vikaraṇāya namaḥ //

bala-prathamanāya namaḥ //

sarva-bhūta-damanāya namaḥ //

mano-'manāya namaḥ //

avyakta-liṅgī //

vyakta-ācāraḥ //

avamataḥ //

sarva-bhūteṣu //

paribhūyamānaś caret //

apahata-pāpmā //

pareṣāṃ parivādāt //

pāpaṃ ca tebhyo dadāti //

sukṛtaṃ ca teṣām ādatte //

tasmāt //

pretavac caret //

krātheta vā //

spandeta vā //

maṇṭeta vā //

śṛṅgāreta vā //

api tat kuryāt //

api tad bhāṣet //

yena paribhavaṃ gacchet //

paribhūyamāno hi vidvān kṛtsna-tapā bhavati //

atra idaṃ brahma japet //

aghorebhyaḥ //

atha ghorebhyaḥ //

ghora-ghoratarebhyaś ca //

sarvebhyaḥ //

śarva-sarvebhyaḥ //

namas te astu rudra-rūpebhyaḥ //

gūḍha-vidyā tapa ānantyāya prakāśate //

gūḍha-vrataḥ //

gūḍha-pavitra-vāṇiḥ //

sarvāṇi dvārāṇi pidhāya //

buddhyā //

unmatavad eko vicareta loke //

kṛta-annam utsṛṣṭam upādadīta //

unmatto mūḍha ity evaṃ manyante itare janāḥ //

asan-māno hi yantrāṇāṃ sarveṣām uttamaḥ smṛtaḥ //

indro vā agre asureṣu pāśupatam acarat //

sa teṣām iṣṭa-āpūrtam ādatta //

māyayā sukṛtayā samavindata //

nindā hy eṣa ānindā tasmāt //

nindyamānaś caret //

anindita-karmā //

sarva-viśiṣṭo 'yaṃ panthāḥ //

sat-pathaḥ //

kupathās tv anye //

anena vidhinā rudra-samīpaṃ gatvā //

na kaścid brāhmaṇaḥ punar āvartate //

atra idaṃ brahma japet //

tat-puruṣāya vidmahe //

mahā-devāya dhīmahi //

tan no rudraḥ pracodayāt //

asaṅgaḥ //

yogī //

nitya-ātmā //

ajaḥ //

maitraḥ //

abhijāyate //

indriyāṇām abhijayāt //

rudraḥ provāca tāvat //

śūnya-āgāra-guhā-vāsī //

deva-nityaḥ //

jita-indriyaḥ //

ṣaṇ-māsān nitya-yuktasya //

bhūyiṣṭhaṃ saṃpravartate //

bhaikṣyam //

pātra-āgatam //

māṃsam aduṣyaṃ lavaṇena vā //

āpo va āpi yathā-kālam aśnīyād anupūrvaśaḥ //

go-dharmā mṛga-dharmā vā //

adbhir eva śucir bhavet //

siddha-yogī na lipyate karmaṇā pātakena vā //

ṛcam iṣṭām adhīyīta gāyatrīm ātma-yantritaḥ //

raudrīṃ vā bahu-rūpīṃ vā //

ato yoga pravartate //

oṃ-kāram abhidhyāyīta //

hṛdi kurvīta dhāraṇām //

ṛṣir vipro mahān eṣaḥ //

vāg-viśuddhaḥ //

maheśvaraḥ //

śmaśāna-vāsī //

dharma-ātmā //

yathā-labdha-upajīvakaḥ //

labhate rudra-sāyujyam //

sadā rudram anusmaret //

chittvā doṣāṇāṃ hetu-jālasya mūlam //

buddhyā //

saṃcittam //

sthāpayitvā ca rudre //

ekaḥ kṣemī san vīta-śokaḥ //

apramādī gacched duḥkhānām antam īśa-prasādāt //

atra idaṃ brahma japet //

īśānaḥ sarva-vidyānām //

īśvaraḥ sarva-bhūtānām //

brahmaṇo 'dhipatir brahmā //

śivo me astu //

sadā //

śivaḥ //