gale kalitakālima prakaṭitendu bhālasthale vināṭitajaṭotkaraṃ rucirapāṇipāthoruhe /

udañcitakapālakaṃ jaghanasīmni saṃdarśitadvipājinamanukṣaṇaṃ kimapi dhāma vandāmahe // LSiv_1 //

vṛṣopariparisphuraddhavaladhāma dhāmaśriyākuberagirigaurimaprabhavagarvanirvāsi tat /

rucirapunarumākucopacitakuṅkumai rañjitaṃ gajājinavirājitaṃ vṛjinabhaṅgabījaṃ bhaje // LSiv_2 //

uditvaravilocanatrayavisṛtvarajyotiṣā kalākarakalākaravyatikareṇa cāharniśam /

vikāsitajaṭāṭavīviharaṇotsavaprollasattarāmarataraṅgiṇītaralacūḍamīḍe mṛḍam // LSiv_3 //

vihāya kamalālayāvilasitāni vidyunnaṭīviḍambanapaṭūni me viharaṇaṃ vidhattāṃ manaḥ /

kapardini kumudvatīramaṇakhaṇḍacūḍāmaṇau kaṭītaṭapaṭībhavatkaraṭicarmaṇi brahmaṇi // LSiv_4 //

bhavadbhavanadehalīvikaṭātuṇḍadaṇḍāhatitruṭanmukuṭakoṭibhirmaghavadādibhirbhūyate /

vrajema bhavadantikaṃ prakṛtimetya paiśācikīṃ kimityamarasaṃpadaḥ pramathanātha nāthāma he // LSiv_5 //

tvadarcanaparāyaṇapramathakanyakāluṇṭhitaprasūnasaphaladrumaṃ kamapi śailamāśāsmahe /

alaṃ taṭavitardikāśayitasiddhasīmantinīprakīrṇasumanomanoranameruṇā meruṇā // LSiv_6 //

na jātu hara yātu me viṣayadurvilāsaṃ mano manobhavakathāstu me na ca manorathātithyabhūḥ /

sphuratsurataraṅgiṇītaṭakuṭīrakoṭau vasannaye śiva devāniśaṃ tava bhavāni pūjāparaḥ // LSiv_7 //

vibhūṣaṇasurāpagāśucitarālavālāvalīvaladbahalasīkaraprakarasekasaṃvardhitā /

maheśvarasuradrumasphuritasajjaṭāmañjarī namajjanaphalapradā mama nu hanta bhūyādiyam // LSiv_8 //

bahirviṣayasaṃgatipratinivartitākṣāvaleḥ samādhikalitātmanaḥ paśupateraśeṣātmanaḥ /

śiraḥsurasarittaṭīkuṭilakalpakalpadrumaṃ niśākarakalāmahaṃ vaṭuvimṛṣyamāṇāṃ bhaje // LSiv_9 //

tvadīyasuravāhinīvimalavāridhārāvalajjaṭāgahanagāhinī matiriyaṃ mamākrāmatu /

upottamasarittaṭīviṭapitāṭavīprollasattapasvipariṣattulāmamalamallikābha prabho // LSiv_10 //