10. ხენწფეშ უკულაში სქუა დო ჭყიშიშ არიკი

(ალეშ არიკი)

რდჷ ართი ხენწიფე, ჸუნდჷ სუმი ქომოლისქუა. ბოლო დროს თე ხენწიფესგეურჩქინდჷ ოსურისქუაქ. დაბადება დო ხათე მიდეჸონჷ მუდგაქჷრენი. ათე ხენწიფექ ქემიოდირთჷ ღურას, სუმი ხოლო სქუალეფი ქიმიჭანუ. უწუ სქუალენს:

- მავა ბღურუქ ასევა, ჩქიმი ქონება ოთხო გორთითია. ართი წილი მა ქეგმახარჯითია დო დომასაფულეთია. სუმი წილი თქვა გირთითია. მუჟანს მა დამასაფულენთიე, თითო სქუაქ თითო სერს ქომიყარულითია. ოდო, დოღურჷ ხენწფექ. დაასაფულეს. ათე სუმი ჯიმალეფიშე ჟირი ჯგირი რენ დო უკულაში ჩიჩიე რე. ათე უკულაშის ჯოხო ალე. ათე ალექ უწუ ჯიმალენს: - მეურთ ჯიმალეფ დო ქიყარულითია.

ათე ჩიჩიეს უჩაში ჯიმა სიტყვას ვარზენს. ოშქარ ჯიმაქ უწუ:

- მეუ, სი ჩიჩიე, მიქ რკითხჷ თენავა?

ათეშ უკული ალექ მიდართჷ. ქემერთჷ მუნეფიშ ჭყეშიშა: "თოფ მანგარო დომიკასია". ჭყეშიქ თოფი დუკას. მიდართჷ ათე ალექ დო მუში მუმაში სასაფლაწკუმა დიტყობჷ. შქასერი დროს ქუმორთჷ მუდგაქჷრენი. უჩა კოჩი, უჩა ტანისამოსიშ გჷმონწყილი, უჩა რაშით:

- ო, სი შური წაულირია, ცხორცხალო ვამაჭკომი, მარა ღურელო ორჭკუმუნქია.

ლაფათქი ქიგიაშქჷ, ოკო გეიოჸოთასუნი, თეში ალეიაქ თოფი ქაჸოთჷ, დოჸვილჷ. ქიმერთჷ ალექ დო ტანისამოსჷ გამკანწყჷ, ე ღურელი რაშიშა ქალეკჷრჷ, რაშ ოჭოფჷ დო მუნეფიში პაპას ქუმუჸუნჷ.

- ა, პაპავა, - უწუ, - შემინახი ათენავა! ართი სი, მაჟირა ღორონთი, მასჷმა მავა. თენავა ვაუწუა მითინს, უკული სი პაპათ ვარი, ეპისკოპოზო დოგორინუანქია.

- ჯგირი, ბაბა სქუავა, - უწუ პაპაქ.

ალეიაქ ქეგნიჸოთ მუში ჭითა ნაბადია დო მიდართჷ ჸუდეშა დო მუში ოთახჷს ქიდინჯირჷ.

მაჟირა დღა ონჯუას ჯიმალენს უწუ:

- ამდღა ვარა მეურთ ჯიმალეფი ოყარულებუშავა.

ოშქარი ჯიმაქ უწუ: - მეუ იშო, სი ჩიჩიე. მუ სქანი საქმე რე ენავა? [136]

ოკისერუნი, კინი მიდართჷ ალეიაქ, ქემერთჷ ჭყეშიშა, გაიწუღჷ თოფი, მუშ მუმაშ სასაფლას გააკეთჷ აკოპი, ჯგირო გაგმინწყუ. პირველ საათ ქორენ დო ქუმურს მუდგარენი, ქიანას ქუმოწყუნს ჭითა რაში, ჭირა კოჩი, ჭითა ტანისამოსიშ გჷმონწყილი. დიძახჷ:

- ჰო, ჰო, ჰო, ცხორცხალო ვამაჭკომი, მარავა ღურელო იშენი ორჭკომია.

გეგლასხაპჷ რაშისჷნი, ალეიაქ თოფი ქაჸოთჷ დო დოჸვილჷ. გამკანწყჷ ტანისამოსი, ტალიკე ღურელი ძიგირონიშა ქაჸოთჷ. რაში ოჭოფჷ, ქუმუჸონჷ პაპას.

- ა პაპავა, შემინახი ათენავა. ართი სი, მაჟირა ღორონთი, მასჷმა მა. მეტ კოჩი ვერჩქილე თესია! ვითოხუთიშახ ვაგაგიგან თენავა, ვარა მერსოფუნქ დუსია.

- აშო, ბაბა-სქუა, სქანი ჭირიმა, ვადოპილა, შეგისრულენქ ირფელსია.

- ვითოხუთის ვაგაცხადა, უკული იჸუაფუქ უჩაში არძა პაპეფიშ, - უწუ ალექ.

მუკირთჷ ალექ დო მიდართჷ მუში ჭითა ნაბადამო, ქედინჯირჷ მუშ ოთახჷს. მასუმა დღას გედირთჷ დო ონჯუას უწუ ჯიმალენს:

- თენა დიჩინუ ჩქიმი მუმაქია. ამსერ ვარა უყარულითია.

უჩაში ჯიმაქ რაგადი ვეშქიდუ, ოშქარ ჯიმაქ პასუხი მეჩჷ:

- გიწიმინდი თაურე, ვარა დორჸვილუნქია.

ალექ უწუ:

- ჯგირი, პატონია, - დო მიდართჷ.

ქიმერთჷ ჭყიშიშა, - "ქომუჩი თოფია".

ჭყიშიქ თოფ ქემეჩჷ. მიდართჷ მუშ მუმაშ სასაფლაოშა. ქენოდოხოდჷ მუში აკოპის. უყარულჷ ამ სერ ხოლო. მაჟირა სათიქ ქიჸუნი, ჩე რაშით, ჩე კოჩი, ჩე ტანისამოსიშ გომონწყილი ქუმურს, ქიანას ქუმონწყუნს, ქოთი ჭვინს, ქოთ კირცხანს, ქოთი თჷნს. გაგმასხაპჷ რაშიშე:

- ჰო, სი შურ წაულირჷ, ასე ხომ ქოგიძირი დროვა.

თეწკუმა ქაჸოთჷ ალექ, დოჸჷილჷ, გამკანწყჷ ტანისამოსი, ქაჸოთჷ ე ღურელი განიშე; რაში ოჭოფჷ, ბარგი მოლეღჷ.

- პაპავა, ჩებარი თენავა. გიჩქუდას, ღორონს უჩქუ, ვაგაცხადა თენა. ვარა მინუტის ვეჸუაფუქ. მა მუჟანს გიწუენი, რაში თიმწკუმა დამიბარი: ჩქიმ მულაშა მითინს თინა ვაუწუა!

მიდართჷ მაჟირა დღას, ჯიმალეფს ქაკათჷ. ჯიმალეფი გაზეთის კითხულენა დო დუს უქაცუანა.

- მუ ამბე ჯიმალეფია, უწუ ალექ, მუ ჭარჷ გაზეთისია?

ოშქარი ჯიმაქ უწუ - მუ სქანი საქმე რე, მიქ რკითხჷ ენავა?

- მუშენ, ჯიმალეფი, მუთუნი ჯგირ ქორენ-და, მა ხოლო მახიოლე ენავა.

ოშქარი ჯიმაქ უწუ: - მუ რენი ქოიჩქუნო, ალევა? არაბიში სახენწიფოს [138] სუმი ოსურისქუა ითხუაფუნიავა. ათენა დიჭყაფუნია ამუდღარი მავითაამშვა დღასია. ათენეფიშ გათხუალა იჸუაფჷ თენერო მაამშვა ატაჟას მუკიბუნუაფჷ უჩაშ ოსურსქუაში ბეჭედი; ეთინა მიდგას მუკაჸოთინე ლივერი დო თოფიშ ჸოთამათჷნი, თიშ იჸუაფუ თი ოსურისქუა; მაჟირა დღას - ოშქარი ოსურისქუაში, მასჷმა დღას - უკულაშიში. ათენა ჭარჷ თე გაზეთის: ენა მუშო გოკო, სი ჩიჩიევა.

ალექ უპასუხჷ: - მუჟანს მიდურთი, ჯიმალეფი, თქვავა?

- ჩქი გინიბლენთ ჭუმევა. ვითოხუთის შარას ვოკოთ, მავითაამშვა დღას თექ იპითია.

- ჯგირი, ჯიმალეფი, მეხვარითია. ოსურ გათხინედანი ვარა, მა უჯგუშო მახიოლენია.

დო ალექ მუკირთჷ მუშ ჭითა ნაბადამო, ოთახჷშა მინილჷ. მაჟირა დღაქ გოთანდჷნი, ჯიმალენქ გაგმინწყჷნ, ცხენეფი დოკაზეს, გედოხოდეს დო მიდართეს. ალე იჩიებჷ ვითოხუთის აქი მუ გაჩენდჷ? ჩქიმ რაში ურს ხუთ მინუტის. ვითოხუთი დღაშ ჯინათ, ვითოხუთი წანა კარტოღაქ აჸუ ალეს. ვითოხუთიქ გიშელჷნი, პაპაშა ქემერთჷ ალექ - ქომუჩი უჩა რაშია, - უწუ პაპას.

პაპაქ უწუ: - რაშის ცამეტი ქუგუოფუნევა. მა ვემმაჩე რაშია.

- სიდე რე ქუმოძირია!

პაპაქ ქაძირჷ. ალექ მიოგჷ კუჩხი, ქიმთატახჷ, გაკლეჸონჷ უჩა რაში; უჩა უნანგირით, უჩა ტანისამოსით გაგმინწყუ დო ქეგედოხოდჷ რაშის, პაპას დუჩინჷ: - შხვა რაშენქ ვერტასია.

ჭყვინდჷ მართახი, ქოფურინჷ რაშიქ. მინუტი დო თექ ქჷდაფურინჷ, სიდეთ ბეჭედი მუკობუნი. აქი ირ კოს აშქურინჷ, მუქ რე, მორთუე. ირ კოჩქ დიხას ქაშაციუ. ალექ ქუმორთუნი, დიძახჷ:

- ქუმარზენთო, ჯიმალეფი, ჸოთამაში ნებას?

მიდგაქრენი ართი კოჩქ; - მეხვარი, პატონია.

ალექ გელეღჷ ჯიბეშე ბრაუნიგი, ქაჸოთჷ ბეჭედის; ბეჭედიქ გამკოლჷ, ალექ ოჭოფჷ, ჯიბეშა ქალედჷ. თითო მათრახი მუშ ჯიმალენს ქიგიაშქჷ. მუკირთჷ დო მოლართჷ, ძღაბიშ მუმა ხენწიფე იჩიებჷ:

პაპენს ზაკაზჷ ქემეჩჷ - გეყიონწყით მონასტერეფი დო ოხვამეფი, ქიდიჭყით წირუავა, ჩქიმ უჩაში ოსურსქუა ქითხუ ღორონთქია.

ხენწჷფე სიხარულით ღურუ, პაპეფი რენა წირუას. ათე ალეში ჯიმალეფი იჩიებუნა:

- ღორონქ ქითხუ ხენწიფეშ ოსურსქუა, მარა ჩქი მუ შქას ვორეთია, მართახით ოჭიში გემიჭვესიე?

აწი ოჩერედი რე მაჟირა დღას მაჟირა ოსურსქუაშ გათხუალაში.

მიდართჷ ალექ, ქუმორთჷ ჸუდეშა. პაპას დაბარჷ რაში დო ტანისამოსი. მაჟირა დღაქ გოთანდჷნ, ჭითა ბარგი ქჷმკიქუნჷ, ჭითა რაშის ქეგედოხოდჷ, [140] მიდართჷ მაჟირა დღას, მეურს, მარა ქიანას მენწყუნს, ბეჭედ მუკობუნ ექ, გეურჩქინუნა ჸოთამ. კუმას ქემუღუ ქიანა, მარა ბეჭედ თექ ქუმკობუ. ქემერთჷ თექინ, ირ კოს ურზაფუ დო ქაშაციუ დიხას; - მუქ რე მორთუე?

- ქორთხინთ, ჯიმალეფია, ქჷმარზენთო ჸოთამაშ ნებას დო ვარია?

მიდგაქრენი ხეს დუქანცუ: - მეხვარი ჯიმავა.

გელეღუ ბრაუნიგი, ქაჸოთუ დო გამკაჸოთჷ ბეჭედი, ოჭო უ, ჯიბეშა ქალედუ.

ჟირ მართახი თიჯგუა ქიგიაშქჷ მუშ ჯიმალენს, ოჭიში გეუჭუ. - ბოში, (თე ჯიმალეფი იჩიებუ) ჩქი მუ შქას ვორეთია?

ხენწჷფე ხიარულენს, ზაბარზანებით ხარულენს: - ოშქარი სქუა ხოლო ქითხუ ღორონქია.

ალექ მიდართჷ, ქემერთჷ პაპაშა, დაბარჷ ჭითა რაში დო ჭითა ტანისამოსი. დოკაზჷ ჩე რაში. მასჷმა დღას რე აწი ოჩერედი უკულაში ოსურსქუაში. მუნოდოხოდჷ რაშის დო მიდართჷ; მიდართჷ, მარა მუს მეურს? მენწყუნს ქიანას. ბეჭედი მუკობუნ აქი, გეურჩქინჷნა ჸოთამა, დაჩხირო მეურს ქიანა, მარა ბეჭედ თაქ ქუმკობჷ. მუჭო თექ ქჷმორთუნი, არძაქ ართო დიხას ქაშაცუ: - მუ ცოდებიქ რე მორთუე?

ალექ დიძახჷ - ქუმარზენთო ჸოთამაში ნებასია?

- მეხვარი ჯიმავა! - მიდგაქჷრენი დუძახჷ. გელეღჷ ბრაუნიგი, ქაჸოთჷ. გამკოლჷ ბეჭედიქ. ოჭოფჷ, ჯიბეშა ქალედჷ; სუმ-სუმი მათრახი თიჯგუა ქიგიაშქჷ მუში ჯიმალენს, ოჭიში აფუნა ეტყაბარელი.

- ჯიმა ღურელი, ხენწიფეში ოსურსქუალეფი ითხუაფუნ დო ჩქი ჟირი კოჩი ვაფუთო გიშაგორილი ოჸვილარო? ჩქი მუ შქას ვორეთჷნი, ვა მიჩქუნი? - იჩიებუნა ენეფი.

მუკირთჷ ალექ დო მიდართჷ. თაშ ხოლო მასუმაშა ქიმერთჷ პაპაშა უკული დო პაპას უწუ: - დებარი რაში დო ტანისამოსია.

პაპა იჩიებჷ: - ჯიმა ღურელი, ენა ჩიჩიე მიჩქუდუ დო ქიანაში მანწყუალი ჸოფენო?

ალექ უწუ პაპას: - ვითოხუთიშახ ჩქიმი ჯიმალეფი ქუმურსია. ქჷდამპეჯი თინეფი სია. ქოკითხი ამბე, მუ ქიმინესჷნი. ინეფი სი ქოგიწინა ექიანი ამბეს. უკული სი ქომიკითხი ჯიმალეფი, რქვან უკულაში ჯიმას, ალეს მუთუნი მუში მუმაში წილს ქემეჩანთ დო ვარიე.

დო ქუმორთჷ ჯიმალენქ ღურელ-გათებულქ, ოჭიში ეტყაბარელი აფუნა ალეშ მართხაშიშ ნაღვენდეფი. ალექ უწუ პაპას:

- თინეფ სტოლს მუკიხვენუნი, თიმწკუმა უჩა ბარგიშ გუმონწყილო მა თეურე მუნიბლენქ; ჭითა ბარგით ხოლო მუნიბლენქ; ჩე ბარგით მინიბლენქ.

- აი, პაპა, მინ რე თენავა, - გიწინს სი თინეფი. მარა სი უწი: - სუთ, თინეფი წმინდანეფი რე. [142]

ბოლოს ქჷმორთჷ ჯიმალენქ. დაპეჯჷ პაპაქ. მუმოხენა სტოლს. კითხუ პაპაქ: - მუ ამბე. მუ ქიმინითია.

ე ჯიმალენქ უპასუხჷ: - დემეთხი პაპა, ღორონდგიე. ექიან ამბე ვაპკითხა, ინა ღორონთიშ სქუალენქ ქითხუა.

ასე პაპა ეკითხებჷ: -ჯიმალეფია, ღორონდგიევა, ალეიას მუშ მუმაშ წილს ვემეჩანთო მუთუნსია.

- უჰ, პაპა, საქმე ვაიღუნო, ღორონდგიე! ალეიას ართი ჭითა ნაბადი ქუღუ, დუხორცქჷნი, მაჟირას ქუჸიდენთ.

ათე დროს უჩა ტანისამოსიშ გომონწყილო ათაურე მუნილჷ ალექ.

- მინ რე, პაპა, თენავა?

- სუთ, ბაბა-სქუალეფი. ენეფი ხოლო ქორე ჟირი შხვა, წმინდანეფი რენა.

თე ბოშენქ უწუ პაპას: - ათენენქ რე ხენწიფეშ ძღაბეფი ითხისჷნი.

ჭითა ბარგი ქიმკიქუნუ, ათაურე მონილჷ.

- ათენა რდჷ, პაპა, ოშქარი სქუა ხენწიფესი ითხუნი.

თეში, ჩე ბარგით ქჷმკიქუნ, უკახალენ კარიშე მუნილჷ.

- ათექ რდჷ, უკულაში ოსურსქუა ითხუნი.

ქუმორთჷ ალექ დო ჯიმალენს დუს ქიმნადირთჷ.

- ჰატ, თქვა მამაძაღლეფი, მა რენო თქვა ჭითა ნაბადის მიჸიდენთჷნი?!

ე ჯიმალენს აშქურინუ, "თენა ალე ჸოფენიავო? ბირგულს ქეგიანთხეს დო ქოთხის ალეს: - ვადოპილათ, სქანი ჭირიმა, პატონი ალევა, დო კუჩხის გიბონთია.

ალექ უპასუხჷ: - თქვა მა ვარჸვილუნთ, მარა თქვა მიქცით ჩქიმწკუმა უსვინდისეთ. თიშენიდჷ ამშვი-ამშვი მართახი ჭკომითჷნი.

- გედირთით ეშევა, - დოხოდით სკამსია.

გელეღჷ ალექ უჩაშიშ ბეჭედი, უჩაში ჯიმას მიახვამჷ; გელეღჷ ოშქარიშ ბეჭედი, - ოშქარ ჯიმას მიახვამჷ:

- აბა, რაშის გეხუნა დო ულა ასევა; ეთი ბეჭედეფი სიდე მუკობუდუნი, თეურე რე მატაცებელი ძღაბეფია.

ჯიმალეფი იჩიებჷ: - ვავა, ჩქინ ცოდა, თექ თეურე ქიჸუ მატაცებელქდა, დო რაშიშა გიოხვენჩქ ქჷმაჸის-და, ჩქი იშენ მებდინაფეთ!

ალექ უწუ: - ვარი ვაგაშქურინანი.

გეგმიჸონჷ ალექ სუმი ხოლო რაში, დოკაზჷ, ტანისამოსეფ ქუმკიკირუ, ჯიმალეფ ქუმკიხუნუ, რაშეფ ქუმარქაფუ, ქოფურინჷ დო მიდართჷ. ხენწიფეში დოხორეს ხუთ ვერსის აქილე ქუდაფურინჷ, ქუდახუნუ ე ჯიმალეფი თაქ. ქჷმკიქუნჷ უჩა ტანისამოსი, ქჷმნოდოხოდჷ უჩა რაშის, მეუჩინჷ ხენწიფეს - უჩაშ ოსურსქუა ქეგლამხუნე ბალკონიშავა! [144]

ხენწიფექ დამზადჷ. მეუჩინჷ: - ხაზირ რენია, გეფურინჷ დო მიდართჷ. ძღაბი გილახე მაამშვა ატაჟას; ელულუ თეს, მიტაცჷ, მოლეჸუნჷ, მუშ ჯი მალეფიწკუმა ქჷდახუნუ. ქემკიქუნჷ ჭითა ტანისამოსი, ქჷმნოდოხოდჷ ჭითა რაშის, მეუჩინჷ ხენწიფეს: - ოშქარი ძღაბი დამიხაზირია!

ხენწიფექ მუჩინჷ: - ხაზირი რენია.

გეფურინჷ, მიდართუ, მიტაცჷ თენა ხოლო თაქ ქჷდახუნუ. ქჷმნოდოხოდჷ ჩე რაშის, მეუჩინჷ ხენწიფეს: დახაზირი უკულაში ოსურსქუავა!

მუჩინჷ ხენწიფექ: - ხაზირი რენია.

გეფურინჷ, მიდართჷ, მიტაცჷ თინა ხოლო თაქ ქჷდახუნუ. აწი ულა ოკონა. თეშ ხენწიფექ მუჩინჷ: - ჭიჭე ხანს მომიცადითია, ჭიჭე ჭყუდას მერჩანთი!

ჭყუდათ ხენწიფექ ქუმუჩქჷ სუმოშ-სუმოშ მახორო კათა.

აწი გინილეს, კუჩხით ოკო იდანინ, მულა ონჯუაშახ. გაკისერჷ. ათე სუმი ჯიმალენქ პალატკეფი გაკეთეს დო თაქი ქიმისვანჯეს. შხვა მინდორს წიმიფაფჷ. მუჟანს ქიმისვანჯესჷნი, მიდგარენი ართი დედიბი ოსურქ ქუმორთჷ. უჩაში ჯიმაშა მუნილჷ, დაჩხირ გომოტიბევა, - უწუ. უჩაში ჯიმაქ უწუ: - "ვარია, მეუ თაურეშევა". დო ვემნაშქუ. ოშქარიშა ქემერთჷ. ოშქარი ჯიმას ხოლო უწუ: - დაჩხირი გუმოტიბევა. თექ ხოლო გეგნაჸოთჷ. ეს ვაკო ე უჩაში ჯიმალეფიწკუმა მუთუნი, ექ ოკო საქმე აკეთას ალეწკუმა. მინილჷ ალეშა.

- მუ ამბე რე, ჯიმა, თაქია. სუმოში მახორო კოჩი დიბლი დო მითინქ ვემნუმაშქუნი, მაჭკომალი ხოლო ვავორექია?

ალექ უწუ: - აშო მორთი, სი ჩიჩიე, მის ოშქურუ სქანდავა, - დო მუნაშქ.

ქიდირულეს ამ სერინი, ათე დედიბიქ გინირთჷ დემო, ქიხვამილუ ალეში ოსური დო მიდართჷ, ალეს გიასიზმარჷ, ვითომ მუში ოსური მეჸუნს მიდგასირენი. გაკურცხინჷ ალესჷნი, ვართ მუში ოსურიე, ვართ თე მოხუცებული რე. გედირთჷ: - ჰაიტუა, - დიძახჷ.

გაკურცხინუ ჯიმალეფი, დირთჷ კვარჩხიშე, ქეგედოხოდჷ მუშ ჩე რაშის, უწუ ჯიმალენს.

- ოსური მიდამიღეს ღუმა ჩქიმია. მა ქომიჯინით ვითოხუთ წანას, ვითოხუთ წანას ვამმართუ-და, უკული მა ვამიჯინათ. ჩქიმ სუმოში მახორო კოჩი თქვა ქორჸუნდანია.

გინილჷ დო მიდართჷ. მეურს ამდღა, ჭუმე, გეღანი. მუზმა იდუნ, მის უჩქჷ? მეურს ართი გოლას ვართი გჷ ხორცის... ბოლო დროს ქიჩინჷ, მუჭოთ ადამიანიში ძუძუს მენოვენ. ძუძუში კითი ქოძირჷ. გეგლასხაპჷ რაშიშე დო ხათე კიბირი ქეგიაშქჷ ძუძუს.

- აბა, სქუავა! - დიძახჷ როკაპიქ, - მუშე ბღოლი თენა მავა.

ალექ უწუ:- სი დიდა დო მა სქუავა. როკაპიქ უწუ: [146]

- ვითოჟირი სქუა პუნსია, ზღვა დო გვალა შქას თინეფიში რე ირფელია; თინეფ სქანდა გომილუაფუნია, მარა სი გეჸუნქუნი. თი საქმეს ვახვარუქ მუთუნსია.

ალექ უწუ: - სი დიდა დო მა სქუავა.

როკაპიქ უწუ: - სქანი ოსური იჸონესჷნი, თი ქივანაშე ცხორცხალი კოს ვადურთინუნია.

- სი დიდა დო მა სქუავა, - ხოლო უწუ ალექ.

როკაპიქ უწუ: - სი სქუა დო მა დიდავა - დო კიბირი გუტუ ძუძუშა ალექ.

გედირთჷ როკაპიქ. დუძახჷ ვითოჟირი ხოლო სქუალენს.

- მორთითია. - ქუმორთჷ ვითოჟირი ხოლოქ. მარდი გინაგეს ალეს. როკაპიქ უწუ სქუალენს: - თქვანი მავითოსუმა ჯიმა რე თენავა. გაჭირება უღუ თეს რეჯგუავა, ოსური მიდუღჷ კაჟამ დიქ დო გეჸუნს თისია. მუთუნ მეგახვარინენა, სქუალეფი-და, ათაქ ოკო ასე რგებავა.

ვითოჟირი ხოლოქ კვარჩხიშე დირთჷ. ალექ უწუ: - ვარი, ჯიმალეფია. ნოდით საქვარი მა ვამოკო. მუს ფქიმინჷნქინ, მა ხვალევა. თქვა ქოპუნდათ, თაქ ჯიმალეფო; შვიდებით, გამჭირდას-და, ქჷმმეხვარით.

მუნოდოხოდჷ რაშის დო მიდართ. მიდართჷ, მეურს, მარა მეურს უბე დურო. მიოჯინუნ, ართ დიხას მასჷმა ატაჟას ძღაბი ქაწოხე, მაშინას ქუმ კუხე დო ოჭალს ჭანს. ათე ალე თაქ მიჟუმინ დო მეურსჷნი: - დითა, ჯიმა ალევა, მუ გოკოდჷ აქი სია?

ალექ უწუ: - სი მინ რექია?

- მა ვორექია სქანი დავა. დაბადება დო, ხათე მიჸონუნი, თინავა, ოდო ინგარს და. გიმელჷ რაშის, მინილჷ, ქაწაზადჷ დაქ, გაჯუდჷ, გასხუპჷ, დო ინგარს.

- მუ ორე, დაია, მუ გონგარუანსია?

- მუ მონგარუანს-და, სქანი ოსური ასე მიკიონეს ათაქია. სი თეურე მიდურქუ დო თეურე ქემკოდინუქ იშო. თიშენი იმგარქ მავა. თეურე კოჩქ მიდართჷნი, ცხორცხალო ვადურთინჷ მითინს.

ალექ უწუ: - ნუ გოშქურ სი იშავა, მა გაგმომინწყი მუთუნი ოჭკომალი დო ქოფჩი. მა იშენი სი ვაგაწუხენქია.

დო ალექ ოჭკომალი ოჭკომჷ, იშო ქელენჯირჷ, ონჯუაშა ლურდჷ. ქუმორთჷ დაქ დო გაკურცხინუ, და ქინგარს.

- მუ ორე, ძღაბჷ, მუ გონგარუანსია?

- მუ ორე ჯიმა-და, მურ ქოჭვინს დო ქოკირცხანსჷნი, ჩქიმ ქომონჯი რე თენავა დო ორჭკუმუნსია.

- ჯანგოჭე, ნუ გოშქურჷ. მა ის ვავაჭკომექ. დაქ შეხვეწუ ალეს:

- მუნილი ოთახშა დო თაქ გაჩენდი იშენია.

დიქ ქუმორთუ დო ქუმოხორხოშუ.

- მუ რენია, ართი წვადი ხორცი ქუმობძინუ გემუანია.

ოსურქ უწუ: - გახიოლენ ფერს გიწინქია.

- სი მა მუს მიწინქია, - ქომონქ უწუ. [148]

- ჩქიმი ოხორასქილენს აკას ვამართედჷ ალეში მეტის დო ალე დიო ბაღანა რენია.

- ალექ მორთუა.

- აბა, შორშე ქომოძირია, ვარა ქუმაჭკომინუაფუნია.

თეშ ალექ კარს მინილჷ. დიქ ჸინტუა მუდომჷ, მარა, ვააჸინტჷ. ათე დიქ უწუ: - დოხოდი, ჯიმა, სი თაქია, - უწუ.

გედირთჷ დიქ დო გვერდ სახენწიფო მუშის დუძახჷ, დოშაყარუ. ოდო: - "ქაჸუნით ასე ალესია". ალექ უწუ: - მა სქანი კოჩი ვამოკო, ვართი ართი დო ვართი შურო. მა ურქჷ ჩქიმით. მუს ფქიმინჷნქ მან, ხვალე. ვარა კოჩი ვამოკო მოხვარევა.

და ინგარს, ალექ რაშის ქჷმნასხაპუ.

- მომიცა, სი უჯერო ჯიმავა, - დაქ უწუ, - მა მერჩანქ სი ართი ფინიას. ათე ფინია აწკაჸუნუ წოხოლე, ნამ ჸუდეს სქანი ოსური მულახენი, ეთი ჸუდეს ელაჯინე. ათე ფინია გეჭოფი, რაშიშ ყუჯის ქალახუნე. ექ იჸუაფუ დიდი ჩხუბი აუცილებელი რე, სი თექ დორჸვილუნა; ეთი ფინია გელასხაპუნს დო მოლურს, ჩქი ცნობას ქომუჩანა. ჩქი ურთ უკული დო თი ღურელენს გაიშარგორუნთ, მოლაგიღანთ დო დაგასაფულენთ.

ჯიმაქ უწუ დას: - ჯგირი, მუს ბგორჷნქია.

ქემეჩჷ ფინია, ქაწიჸუნუ. მეურს ფინია, მეურს, მეთხოზჷ უკახალე რაში. ბრელი იდეს, ბოლო დროს თე ფინიაქ ელაჯინჷ. თიჯგუა ჸუდეს, ალექ დეშიშჷ. გიმლჷ რაშის, გეჭოფუ ფინია, რაშის ჸუჯის ქალახუნუ. რაშიქ გელარღჷ ჸუჯიშე ფულადი, დიარუა ქიდიჭყუ. ათე ბოშიქ გაჸუნუ თე ჸუდეს, მარა სოთინ კარ ვაძირჷ. სიმაღლეშ ბოლო ვაჩქჷ. დეფიქრუ დო ქჷდოდოხოდჷ მოწყინებულო. რაშის დიო სმა ვემუჩამჷ ბოშიშა. რაშიქ: "ვო ბოშია", - უწუ. ახიოლუ ბოშის დო უცებ ხიარულო უპასუხჷ: - "პატონი", სქანი ჭირუმავა, - ათე ჸუდეში მინჯევა თუდონ ქიანას რე ასევა. მეუ ჭკადუეფისავა, თითო კუჩხის ეჩდოხუთ-ხუთი ფუთიანი ნალეფი ქუმმოჭკადია. მუხამუზის მუმოგანდე, გური დო ჩხონჩხიშა ოკო ქიმერთასია. მათრახის გემაშქვანქიე, ვითოჟირი შორტი ტყებიქ გეინწყასია. ეთიწკუმა ათე ჸუდეს დოპტახჷნთ დო დოშქურონდჷ თეში მინჯე და, ვარა მუთუნ ვახვარუ თესია.

დუძახჷ ალექ ხელათ ჭკადეენს. მინუთის ქეთაჭკადეს ნალეფი. ქუმნოდოხოდჷ ბოშიქ დო ქეგიაშქჷ მართახი დო ქემიოგჷ მუხამუზი. რაშიქ მიორკიუ დო მიდართჷ დუდიშა. თექ ქუდუჭყჷ ტახუა. ოთხოლო ნალი გაათუ დო ჸუდეთ დოტახჷ. რაშიქ ვიშო ქოდანთხჷ, ბოშიქ ძღაბიწკუმა ქენასხაპჷ.

- ჰატ, ბოშია, - ძღაბიქ უწუ. - მა დინაფილი ვორდი დო სი ხოლო მუშე მედინია. "რახან სი ქორძირინჷ. აწ მათ ბდინავა". ქიდინჯირჷ ენენქ. მისვანჯეს. ეშელჷ თუდონი ქიანაშე თე ჸუდეში მინჯექ. ჸუდე ტახილი ქოძი რჷნი. - "ღორონქ დამიფარ ჟინი ქიანაში ცხოვრება სუმ თუთაში [150] ვადათია".- დო იშ დინილჷ კინი, შქასერი ქორენი, ეფერი დროს - ათე დიში უკული არაბიში ხენწიფეს უღუ ათე ძღაბიშ ინტერესი. ათე არაბის გვერდი სახენწიფო ჯარი ქუგურინუაფჷ თე ჸუდეშა. ძღაბის გიასიზმარჷ:

- დითუ, დითუ, ალევა, ჩქიმ ქომინჩქ მიდართჷ სუმი თურაში ვადათ, მარა არაბის უღუდჷ ჩქიმი ინტერესი. თიშ გვერდ სახენწჷფო ჯარი გომირენა ასევა; მარავა გავაშქურინასია; ჩქიმი ქომონჯიშ ლეკური მუკობ ემერი, თინა ქიდეკინი ხეს, ტყვია ვამორხვადჷ დო თი ლეკური ქოგიღუნი, ბრუო კოჩიშ მეტის არძას დუდი მეკვათია. ეთი ბრუო კოჩი ქეგიტე ამბეშ მაღალარო.

გოთანდჷ, ლეკური გამკონწყჷ ალექ, ქიდეკნჷ ხეს. გაანჯჷ კარი; - გამარჯობა თქვენია! - ჯარს უწუ. ჯარქ პასუხი ტყვიათ ქემეჩჷ. მიაჸუნჷ ექ დო ჭკირჷ დუდი. არძას დუდ მეჭკირჷ. ბრუო კოჩიშ მეტის. ათე ბრუო კოს უწუ - მეურთ დო ამბე ქემუღით არაბისია.

მიდართჷ ე ბრუო კოჩქ. ამბე ქემუღეს. მაჟირა სერს დოსქილადირი გვერდი სახენწიფო ჯარი მოლაჩქუ. თექ ხოლო ქუგუდირთჷ. სერით გიასიზმარჷ:

- დითუ, ალევა, გვერდ სახენწიფო ჯარი ხოლო გომირენანია, მარა ხოლო ქიმინინი, თეში ქიმინია. ხოლო თი ბრუო კოჩი ქეგიტევა. ამბე ქემუღანია არაბისია.

გოთანდჷ ოჭუმარეს. გაანჯჷ ალექ კარი.

- გამარჯობა თქვანია.

ინენქ ტყვია ოჸოთეს აშო. მარა ექ მიაჸუნჷ, ჭკირჷ დუდი, გოჭყვიდჷ არძა ათე ბრუო კოჩიშ მეტი. ათე ბრუო კოს უწუ: - მეურთ დო ამბე ქემუღით არაბისია.

მიდართჷ თე ბრუო კოჩიქ. ამბე ქემუღეს. დოშურდჷ აწი ალექ დო იშ ქიდინჯირჷ. ამუსერი ძოაბიქ ცხვანტალი ქიდიჭყჷ.

- მუ ორენია, - ალექ კითხჷ.

ძღაბიქ უწუ: - აიშახ ვაბდინაფეთია.

- მუშენია, - ალექ უწუ.

- მუშენი და, თი ბრუო კოჩი მურს დო მაჩხორათ თვითონ არაბი მოჸუნს. მუჭო გიმილენქჷნი, მეხვარი თი ბრუო კოჩიშ ჸვილუას. თი ბრუო კოჩქ დიჸვილუ-და, დოშქურონდჷ არაბიქ დო მიდართუა-და, ვარა ლეკურ ვამურქია არაბის, დო ვემედინა, ვარა ლეკური ის ვაკვათჷნს: მუჭო მურქენქ ლეკურსუნი, მეტირხჷ ლეკური დო არაბი სი დორჸვილუნსია.

გაანჯჷ კარი ალექ, გიმილჷ, გამათხოზუ ბრუო კოს. მარა ირო თე არაბიქ ქაწასხაპჷ. ვემიაჩჷ საშველქ. მოთვინებაშე გიშელჷ ალექ. გურმულირო, ლეკური მერქუ არაბის. ლეკურქ მეტირხუ. ლეკურიშ ნოტეხიქ ალეს ჸუჯი მეკვათჷ.

გელასხაპუ ფინიაქ რაშიში ჸუჯიშე. გოურქუ დო მიდართჷ დაშა, დაქჷდაჭყჷ რკიაფი. მოლართეს ეურე კათაქ. აწაჸუნჷ ფინიაქ. ქუმორთჷ თაქი. თეზმა კათა ჭყვიდილი რენ, თის გაიშაგორჷ თე ალე, მოლეღეს ჸუდეშა დო ქჷდასვანჯეს. რკიანს და, რკიანს სერი დო დღაშით. გვერდი კოჩქ [152] სიმწუხარეთ გოჭყორდჷ. ვითოხუთი რე, კოჩი ძჷნი. ქოჩქ ვაწართჷ. ღორონქ უწუ ანგილოზემს:

- წაჸონით თი კოჩი დო დოთხორჷნანია. ვარა გათელითია. ანგილოზენქ უწუ: - "გუვათელათჷნი მოკონანია". ღორონქ - აბავა. ათე პილატოკი მიდეღითია. აბარწას ქაწაჸოთითია, სიდე ღურელი სვანჯჷნი, თექია.

მოლეღჷ ანგილოზენქ პილატოკი. თაქ ქაწაჸოთეს აბარწას. გედირთუ ოჭუმარეს დაქ. მერკიანს გალენი. პილატოკი ქაწახვილუ სამაგალითო ჯგირი.

- ათე ჯგირი პილატოკითია, - თქუ დაქ, - ჩქიმი ჯიმაში ზისხირს მოფქოსჷნქია.

მეუს კისერს ჯიმასჷნი, ჯიმაქ გეთელჷ.

- მუ ამბე, ჯიმა, ბრელი ხანიე ლურსიე!

- ო, ჩქიმი და, მუს გიწინქჷნი, ქოიჩქჷნიავო? მარა ის მა მუთას ვოხვარჷქია. ოჭკომალი ქოფჩი მუთუნია. დას ოშქურჷ, კინი თექ მიდურსია დო, ათე დროს, ათე სინჯაშ ლეკური გამკონწყუ, ქიგილებუნუ ალექ:

- შვიდებით, დაიავა, - მა მალას ქოგიძირუანქია!

გინილჷ დო მიდართჷ, ათე ღურელი დუნი, თიმწკუმა გიასიზმარჷ მუდგაქირენი, დო ათე აზრით მეურს ამდღა. ჭუმე. მეურს შარასჷნი, ჯორით - პაპა მურს. ქაუხვადჷ თე ბოშიქ.

- გამარჯობა, პაპა სქანია!

- ღორონქ გოგიმორძგუ, ბაბა-სქუავა, - პაპაქ უწუ.

სო ურქ, პაპა, აურევა?

- სო ურქუ, ბაბავა და, გრანიცაშა, ბაბავა, - უწუ.

- მუშა ურქ, პაპა, გრანიცაშავა.

- მუშა ურქ, ბაბავა და, ართი შურიგეძგუმილქ ქუმორთჷ მიდგაქრენიე, სახელი ჯოხო ალევა. ჟირი სახენწიფო კოჩი გოჭყვიდუა დო კოჩი მოკო იფქირუევე. მარა თი ალე ხოლო ჩაძაღლესია.

ასე გუნებას იფიქრჷ ალექ: - მა გაჸუნუქ, პაპავა ღორღონჯი დო ღეჯი ვამოთხილაფუავა დო შხვა ირფერს ქიმიმნუქია.

- ჩხოულეფ მაფუ ოთხილარია!

- ჯგირი, აბა, გაჸუნუქია!

გეერიგეს დო მიდაჸუნჷ. ქემერთჷ პაპაშ ჸუდეშანი, გიჯინჷ ალექ; პაპას ჸუნს სუმი ოსურისქუალეფი, სამაგალითო სქვამი. ასე პაპაქ მიდაჸუნჷ. სადიარენი ქაძირუ, მარა ათე სადიარს ოდიარე ვეგეჩანს. ათეშ ხასილას ოთიფურე რე. - ეთექ ვემშართას, ბაბავა, ვარავა კერიში რე თინა დო აკოპჭყვიდჷნა ირ კოსია. [154]

ე პაპაქ ჸუდეშა მიდართუ. ე ბოში თხილანს ჩხოულენს. გილათხოზჷ თე ჩხოულენს. ვეჸუ საშველქ. დოშურდუ ბოშიქ.

- მეუ, თე ჩხოულენქ იდიარას თი ოდიარე, დაბა თი კერი მა მუს ბღოლანსიე, ოკო გუმორსე დუდიე.

მიშელჷ ჩხოულენქ. დირძღჷ ოდიარეთ დო რძღელი ჩხოულენქ ქიდიჯირჷ. ათედროს გეიარაგუ კერქ დო მოლართჷ.

- მუ ადამური სულიერი კოჩი რექია, ჩქიმი ოთიფურეს შეეხიე.

- მა ვორექ ართი ჭკოლა კაზახია.

- დოფხვადი აბა თექია, - კერქ დუძახჷ.

- გოხოლჷქ ამარია.

ქემეთხეს ხე ართიანს. ირკინეს ბრელი ხანს, იჩხუბეს, ბოლოს ჟირხოლოქ დოშურდეს. კერქ უწუ:

- ართი სუმი კაკალი კი გუმოხვატაფუნია ართი ოლონტყეს ქუმოლონტყუნია, სქანი ჸჷილუა მარდი რენია.

- ოოვა, ბოშიქ უწუ, - ართი გომინჯი ქობალი, ართი ორკოლი ღვინი, ართი პაპაშ ძღაბიშ ჯუნა, სქანი ჸვილუა მარდი რენია.

ბოლოს დეთხის ართიანს. ქუმორაჸჷ ბოშიქ ჩხოულეფი ჸუდეშა. პაპაქ. რკიაფ ქიდა ჭყჷ: - სო რჸუნდჷ ჩხოულეფი? ბჯაქ ვენტირჷ სოთინი.

- პაპა, მუ გაშერენსია! სურუ უცხოტი ჩხოულენსია, - უწუ.

პაპას ოშქურჷ, ქუჩქჷ, საქმე მუშა რენი, მარა მუთუნი ვაუწუ. დიჯირჷ ბოშიქ ამუსერი. ოჭუმარექ გოთანდჷნი, ჩხოულეფი მიდარაჸუ. ქემშარაჸჷ კინი თექ. კინ დირძღჷ ჩხოულენქ, ქაშენჯირეს თექ. პაპაქ მოლართჷ წოხოლე დო ძიგირს ქაშეტყობჷ. პაპას ოშქურჷ აწი, მარა ინტას დო კერქ ქჷმაჭიშუასჷნი, ვენტას დო თაქ ქემთაჭკომასჷნი, ვაუჩქჷ, მუ ქიმინასჷნი, კერქ დიძახჷ: - ქუმორთიო, ბოშია!

- ამარ ვორექ, მოზოჯია! - დუძახჷ ბოშიქ.

ქემეთხეს ხე კინი ართანს. დიდ ხანს ირკინეს, ართანიშა მუთუნქ ვაღოლეს. ჟირხოლოქ დოშურდეს, კერქ უწუ:

- სუმი კიში გოტკვარუა, ართი ოლონტყეში ლონფყაფა, სქანი ჸვილუა მარდი რე.

ბოშიქ უწუ: - ართი გირვანქა ქობალი, ართი ორკოლი ღვინი ქოფჩუნი, ართი პაპაშ ძღაბიშა ქუმოჯუდაფუნი. სქანი ჸვილუა მარდი რენია.

- აბა, შვიდებით აწი ჭუმეშახია.

ეს პაპა ირჩქილე. პაპაქ მიდართჷ ხათე ჸუდეშა. პაპა რე შიშიშ ღურელი, ჸუდეშა ქუმორთჷ. პაპას კითხეს: - მუ ამბევა?

მარა პაპაქ მითინს მუთუნი ვაუწუ. პაპა თეს ფიქრენს: - ერი ოდიარე გემოსქიდუდას ვარა, ჸუდეს პჭუნქ, ირფერს ფქიმინჷნქია. ქუმორაჸჷ ბოშიქ ჩხოულეფი. პაპაქ უწუ: - სო, რჸუნდჷ, სქუა, თე ჩხოულეფი?

- მუ სქანი საქმე რე, პაპა, ენავა! - ჯგირი, ამ-სერი დიჯირეს. [156] ოჭუმარეს თე ბოშიშ ედგინაშა პაპაქ ართი გორო ქობალი, ართი ორკოლი ღვინი დო ნამ უჯგუში ძღაბი რენ, გაიშაგორჷ. ე ძღაბი მიდეჸონჷ, ღვინი დო ქობალი მიდეღჷ, ეთექ ძიგირს ქჷმთოდოხოდუ ძღაბამო, ქობალამო დო დვინამო. ბოშიქ ჩხოულეფი ქუმორაჸჷ. ოთიფურეშა ქემშარაჸჷ ოდო ბოშიქ ქაშეჯირჷ თაქ. ჩხოულენქ დირძღეს, იშო ქეშეჯირეს. გეიარაგუ კერქ დო მოლართჷ: ქუმორთიო ბოშია, დუძახჷ!

ბოშიქ დუძახჷ: - გოხოლოჷქ!

გიშელეს დო ხე ქემეთხეს ართიანს. ბრელი ხანს ირკინეს. ბოლოს ჟირხოლოქ დოშურდეს. კერქ უწუ ბოშის:

- ართი კაკალი კიში გოტკვარუა, ოლონტყეში დინოჯირა, უკული სქანი ჸვილუა მარდი რე. ბოშიქ უწუ კერს:

- ართი ლუკა ქობალი, ართი სტაქანი ღვინი დო პაპაშ ძღაბიში ჯუდა უკული სქანი ჸვილუა მარდი რენია!

დეთხის ართიანს: იქ იშ მიკირთჷ, ბოშიქ აშო მოკირთჷ. გითილჷ პაპაქ:

- ა, ბაბა-სქუა ქობალია. ხეს ქჷდაკინუ. ენა ბოშიქ ოჭკომჷ, ართი ორკოლი ღვინი თეს ქიგიოჸუნუ.

- ა, ბაბა-სქუა, ჩქიმი ძღაბია, უწუ. ბოშიქ პიჯ გიქოსუ, პაპაშ ძღაბის ქააჯუდჷ. - მეურთ ასე, თქვა დიტყობითია, - უწუ, პაპაქ ძღაბამო დიტყობჷ. ბოშიქ დუძახჷ კერს:

კერ, დირთი აშოვა. აწ მუთა მაბანძღე მა სქანდავა. გუვათუათ ასე, ნამუ მერიებუნიე. კერქ უწუ: - ჭუმეშახ გინოდვალირი ენია.

ბოშიქ უწუ: - სქანი ოთიფურეს ხე იოღია.

კერს ონჯღორექ დაგურჷ. კინ ქემეთხეს ხე ართიანს. ბოშიქ ორჯგინჷ, ქჷდარაგუ, ლეკურით დუდ მეკვათჷ. პაპას უწუ - მეუ ჸუდეშავა. ურემი გამშეჸონია, ხორცი გაიშებღათია.

პაპაქ ირულჷ ხათე ჸუდეშა. ბოშიქ ენა გოტყაბარუ. ქორა გაგმიღჷ. ათეს ოქროში ტაბაშნიცაქ გაგმაჸუნჷ. ათე ტაბაშნიცა გონწყჷ თეს ალახე მაჭირხოლი. ათე მაჭირხოლიშ ქორას სუმი ჭანჯი. ათე მაჭირხოლი რე ათე არაბიშ თოლიშ სინთე; ათე ჭანჯეფი რე ათე არაბიში შური. მაჭირხოლს დუდ მესოფჷ. ტაბაშნიცას ქალაკილუ, ჯიბეშა ქალედჷ. იზმა ხანს ურემქ ქუმორთჷ. ხორცი ქიგიოწკარეს დო ჸუდეშა გაგშეღეს. ჸუდეშა ქჷმორთესჷნი, ამტონობილი კარს ქჷგერე.

- აბა, პაპა მოკონია, - იძახუნა.

პაპაქ უწუ. - მუშო გოკოთ, სქუავა?

უწის ნამდა, - ათე დო ათე არაბის შურქ ვეგეერყჷ დო ვართ მუთუნი ორკუნია. მაზიარებელო მოკოთია.

პაპა ეშმურს ამტონობილიშანი, ალექ უწუ: ვედა ჩქიმი უმუშოვა.

ალექ პაპას ქალუდოხოდჷ, მიდართეს, ოზეშა მინილეს არაბიშინი, არაბიქ დოუძახჷ ალეს: [158]

- თოლს სინთე მიდამიღი, მაჭირხოლი ჸვილინი თიმწკუმავა, მარა შური გობარჷ, სუმი ჭანჯი ჩქიმინი, თინა ვადომიჸვილავა, შური ვეეშამიღავა დო ართი ჯიმათ გორგუქია.

- ო, სი შურიწაულირი! ურჯულოშე გეშეპონი ჩქიმი ოსურია დო უკული ხოლო სი მიდამიღია! ბოლოს დუდი ხოლო მეპკვათია! მა სი ცხორცხალო დოგიტენქიავო, - უწუ!

ჭანჯენს დუდი მესოფჷ, დოღურჷ არაბიქ.

მოლეჸონჷ აწი მუში ოსური. ოჭოფჷ მუში რაში. ქუმორთჷ დაში ჸუდეშა. დას ახიოლჷ, მუ რაგადი ოკო. სუმ თუთას დიარა დჷ, სუმ თუთაშ უკული მიდეჯუმუ და დო სინჯა. მიდართეს, ვითოჟირი ჯიმა შიძინჷნი, თექ. ექ სუმ დღას რდჷ კამპანია, გინილეს დო მოლართეს ჯინჯი ჸუდეშა.

- გამარჯობა, ჯიმალეფი, თქვანია: - ალექ უწუ ჯიმალენს.

- მეუ სი დინაფილი! - უწუ ჯიმალენქ. - ჩქინი ჯიმაქ დინჷნი, გეეთუ ვითაამშვი წანაქ.

- ვარ, ჯიმალეფი! - ალექ უწუ: - მა ვორექ თქვანი უკულაში, მარსხებელი ჯიმავა.

- ვარექ სი ჩქინი ჯიმავა!

- ვავორექია აბა მა თქვანი ჯიმავა! - ალექ უწუ.

ათე ჯიმალეფი ჟირხოლო ქალეჭოფუ მელე-მოლე. ართი ოშფუთიანი ქუა გეძუ თაქინეშე. გეეჭოფჷ თენა, ხეს ქიდეკუ. თხუ ღორონს ალექ: - ათენეფი ჩქიმი ჯიმა ქორდასია-და, დო მა ვარიას ქომრაგადუნანია-და, თიმწკუმავა ქუოჸოთანქ თე ქუას ეშევა, გოსოფი თე ქუა შქასია, თენეფი ქალმოჸყილი დო მა ცხორცხალი ქუდომიტევა. ვარ დო, მა მტყუანი ქუორექ-და, მა დოპილი დო თენეფ ცხორცხალი ქიდიტევა.

ქაჸოთჷ ალექ ეშე ქუა. ქუაქ გოხორცქჷ შქას, ჯიმალეფ ქალაჸვილჷ ალეს დო ალექ ცხორცხალქ გინოსქიდუ. ალექ დუძახჷ მოჯგჷრენს, გაკეთჷ დიარა. სუმ წანას რდჷ შუმა.