არიკი

teiHeader

არიკი

ცხოვრენდუ თურმე ართ სოფელს ჩილ დო ქომონჯი. მართალ ამბე რე, ჯვეშ მონახვამილეფი ამბე. ათეს ჸუნს ართ ბოში ოდო თე ბოშიქ დიდი მონადირექ იუ დო ნადირენს თენა, გილურცუ დო თითქმის ნანადირევით არჩენს ოჯახის. ართი მშვენიერ დღას თენა დიდ ბოშიენ თეშ, თე ოჯახის ქეშეძინ ძღაბიქ ოდო გვალო გეგნილას ე ბოშიქ , და პუნსია დო ოხიოლ თენა, ჩქიმ პატონ სი რექჷნ დო ქიმურსუ თე ბოშ, ქიმიღანს ნანადირევს, დოხაშუნს დიდან, ქაწიხუნუანს თე დასჷ დო დაადიარუანს თეს, მუ ჭკომუნს ოჭკომალსი თეში.

დოღურ დიდაქ. ხოლო თაში ორთ თენა, ჩქიმ პატონ სი რექინ. მუკილ დროქჷნ, დოღურუ მუმაქ. ხოლო თაში ორთ თენა ოდო ესე იგი ა, შურს ეკმუჭკომუნა ართიანს. უკვე დეძღაბუ, ძღაბო გინირთჷ, ჩქიმ პატონ სი რექინ, მარა თენა ოჭკომალს ჭკომუნსუნ, ქაწიხუნუანს კინ დო ათაშ ულუანს თე დას დო და დო ჯიმას ართიანიშ ოსხუნურ ვაჸუნა მუთუნი. არ[თ] მშვენიერ დღას აუჩემ თე ძღაბიქ, ქიმიჸონია ოსურ. ვარია, ოსურია ოჯახის აკომრთინუანანია ჩქია, უწუ, სი გეთხუაფუქიე, უკულ ქიმიპონანქია. ვარია, იშეიშენ ქიმიჸონ-ქიმიჸონია დო ქიმიჸონ თექ ოსური.

ათე ოსური მიჸონუნ, კინ თაშ გაგრძელუ. ქაწიხუნუანს თე დას თენა დო დადიარუანს. არჩა, მაჟიაშა, მასმაშა, მაოთხაშან, თე ოსურსუ ვამეწონ თექ. ვამეწონ თექ დო გორჩქინდ დავაქ ჩილ დო ქომონჯ შორის. სია მა ვაიჸორქია_და მუშა მომიჸონია. თე დას გინმადჷნჷქია დო დას ინანქიე [მუკმულუანქიე], მა ოსური ვაორექიაო დო და დათ დეკინია დო ოსური ოსუროვა დო თაშია, მარა ჯიმაქ უწუ, თენა რენია ჩქიმ ნარდი, ოდო ვაგეთხუაფუნია, ათაშ ინანქია [მუკმულუანქია] მა თესიავა, უწუ.

არ[თ] მშვენიერ დღას ქეშეძინეს თენემს ბოშიქ, ანგილოზიჯგუა ბაღანაქ, თე ჩილ დო ქომონს. თე ბაღანას, თე ჯიმა ოქციუ დასჷნ, თეშ ოქციუ თე მამიდა თე ბაღანას. შურშა ქუსხუნ თე ბაღანა, ჯიმასკუა, ჩქიმ პატონ სი რექჷნ, თენა ქიმერთ თე ოსურქუ დო მარანი დოჭუ, მარანი, ქუმუნტუ მარანს დო ქიგიოჭუ. ქუმორთ ჯიმაქ ონადირუშე დო ხორც დოხაშ ე ოსურქ, ქაწიხუნუ თე და დო ოდიარუანს. ოვა, ოვა, ათაშ გათამამია სი სკანი დავა დო გოღა მარანი დოიჭუა დო ჭუმე მაღაზას ქიგეჲჭუანცია, უწუ. ეწყინუ, მარა მუ ქიმინას, გაჩერდჷ ასე. ქიმერთუ დო მაჟია მარას მიდართ თექჷნი, მაღაზა ქიგიოჭუ. ხოლო თაშ ქუწუ თე ბოშის, ქუმორთჷნ, ო, თაშ გათამამია დო ე მუ ქიმინუე, მაღაზა დოჭუა, და მუს ჭკომუნქია. სიმინდამო, ირფელამო დიჭუა, მუთუნქ ვამმახვარნესიე თეშ. ვარა მუშე ორთჷქ, ვარა მუშე ღოლ, ართ ნინა ვაურაგადუ თე ბოშის, ქაწიხუნუ დო დადიარუ კინ. ვართ თე და ურაგადუ მუთუნს, ნამდა მა ვამღოლამუ დო თენა-თინავე. ქიმერთჷ დო ქუხნა დოჭუ, თე ბოშიქ მიდართჷ. ქუხნას ქუმუნტუ დო დოჭუ. ქუმორთჷნ, ქუხნა ვარე. ქიმიხვარუ მეზობლები დო ქიგიაკეთ მუდგარენი. აკარძეს თაქ დაჩხირი, დოხაშეს თაქ ხორცი, ჩქიმ პატონ სი რექინ, დო ქიწიხუნუ თე და დო დადიარუ.

ჭუმევა ოდა ვეგეიჭუა-და, თის ქოძირუნქია, უწუ [ოსურქ]. გაჩერდ ე კოჩიქ, მუ ქიმინას დო ირ მარას გილურსუ, ჟირ მარას ვედ ასე, მარა თე ბაღანა დო მამიდაში ქცევა ვარაგადაფუანს თეს, მუშე ქიმინიე, მუშენდა დარწმუნებულიე თვითონ, ნამდა თე ოსური, თე და, თეს ვექჷნსჷნ თენა. ათეზმა ჸოროფა უღუ ბაღანაშინ, თენა თეს ვაგაკეთენსია, ფიქრენს თე ბოში გურსუ.

ქიმერთ ართ მშვენიერ დღას, მიდართ თე ქომონჯქჷნ დო თე ოსურქ ქიმერთუ დო დიდი დაჩხირი აკაარზუ დო ნორცხვაქ ქიგეციუ თაქ დო გუთუკუნუ თე ნორცხვას დო ჟირხოლო ხე ქიგუდუ ბაღანას დო ათეშ გიმე დოდგვარდგვალუ იშო ხე. გეგნილას ე მამიდაქ, ჩქიმ პატონ სი რექინ, რკიაფ ქიგიაშკუ, ქუდოციუ მეზობელემქ, ინა, მარა მუ გოკო, ა, მუ ღოლუა დო თეს ქიგნაბრალ აშო. მუ მიღოლუა ბაღანაშა დო ა, პილჷნქია დო, ინა დო ქუმორთ ჯიმაქ. ქოძირ თენა დო მუჭომ მდგომარეობა რე ასე, ანგილოზიჯგუა ბაღანას მუმაქ მიოჯინჷ, ტარიელჯგუა დიტუ დო ბაღანას ჟირხოლო ხე ჭვილი აფუნ დო. დოხაშ ხორცი დო ქაწიხუნუ თე ბაღანა, კინ თე და, დადიარუ თენა. გედირთჷ დო ხოჯ დო ურემ ჸუნსუ ოდო ათე ხოჯ დო ურემ... ქუსქუ ხოჯეფი დო მიდართჷ, მარა სო მეურსუნ მის გიჩქ, ე, მიდართ ე კოჩქ დო თე ურემი ეუშაფ ქობალით, ქუჸიდირ ქობალი, ეუშაფ თენა, ჩქიმ პატონ სი რექინ, დო ქომორთ ჸუჩა, ქიგიოხუნუ თე და დო მიდეჸონ ტყაშა. მიდართეს ტყაშა, ჩქიმ პატონ სი რექინ, დო ათაქ გაგთუუნწყუ ხოჯეფი თე ურემცჷ თე ურემიშ გაშა ქიგუდუ ხე თე დასჷ დო სიდე სქუას აფუდუ ჭვილ ხელეფი, თექ მეკვათ იშო ჟირხოლო. ასე ქაკო დაქ ქოთქუას თენა. [თე ბოში] მეურს იშონი, [დას ოკო] ქუჩქუდას [ჯიმას], მუი რენ, მარა ვარაგადაფუ მუდგაქირენ დო ვათქუ თენა მა ვამჷქიმინ, სკან ოსურ ორთუნია თენა. თე ჯიმას ჩილამურ გელუციუ. ნაწილობრივ დარწმუნებულიე, მუჭო თაქ ვარე [დამნაშავე] დან, მარა ათექ ვამათმინინ ასე, თე ბაღანაშ ხეშ ჭუალაქ დო აქ ქიმიარდ თე ხექ ჭიჭე დო ზისხირქ ულა მიოტუ, თენა-ინა. [თე ძღაბის] ქიმაშკირენ, მუდა დღა რე ოჭკომალ ვაუჭკუმუნ. ათაქ ქობალს გეჭოფუნს, ჩქიმ პატონ სი რექინ, დო ჭკომუნს თეს დო ამუდღა, ჭუმე, გეღან, თუთა, ჟირ თუთა დო გეთუ ე ქობალქ იშო. გეთუ ქობალ[ქ] დო ქომაშკირენ. ქომაშკირენ, მარა თიშ მანწარათ ქომაშკირენ, ა, ულა ხოლო ოზარ. მეურსუ, მეურსუ, მეურსუ დო ვაძირ მუთუნინ, მინ პანტე უშკური მიკოჩანს, მინ პანტე სხული, მარა მუ ინუას [ქიმინას] ენა, მუთუნ ვაქიმინე, ხე ვაუღუ დო.

თექ მიოჯინუო, არდიხას ქოძირჷ უშკურეფ ქინოჩანსჷ, სახეს გოძირანსჷნ ფერ, ჸურძენ გოჩანს, ესე იგი ზღაპრულ ბაღი ქორე, მარა ჩიტის ვემნაფურნენ თიჯგურა მასარეფით რე შემოღობილ თენა დო გილართ თექ მუკე-მუკე დო გილართ აურე-ეურე დო სოდგარე ქოძირ დუდიშ მითაღალარჯგუა. დო გემთიღ თაქ დუდი დო ჸურძენქ ვამკაწილ დო თე ით [პიჯით] ჭკომუნს, მიკოჩანცჷნ თეში თეს. გინილენს დო მოლურს აშო დო თე ის ვამაგუ ანწი, ეს სჷდე რდჷნი ექ დო თექ ჯაი ჯინს ქიქთინჯირუ იშო. კინ ქამაშკირენუ, კინ მინილენს. თენა ჸოფე თავადიში ბაღი, თენა შემოღობილ ჸოფ თე თავადის დო მცველეფი გეჸოფ ხოლო, ყარულეფი. თენეფი მარაშე არჩა ქუმულა დო გილენა თეს. ქოძირეს ათაქ თე ჸურძენ ჭკომილიენ თენა. ქუდუყარულეს თეს. ჟირიე თენეფი დო ქუდუყარულეს. ართ ყარაულენს, მაჟია ყარაულენს, ყარაულენა, მარა ვეჭოფ თაქ, მუთუნ ვაძირეს, მუთუნ ინა [საეჭვო] თაქ. კინი ვითოხუთიქ მუკილ დო ქომორთესინ, კინ ჭკომილ ქოძირეს თენა. ხოლო ყარულენა ინა, მარა ვეძირ მუთუნქ. ენა ორწყე, ღორონდგიე, ყარაულენანი დო იწკჷმა ვამურს ენა. მიდულან თიწკჷმა რე ინან [მურსუ] დო ანწი იძულებულიენა, [ქუწუანი], თენა თე თავადიქ ქიგეგასჷ დო ჩქი გეგმორღვან იშონ, [ფიქრენა], დო მეუდინჷნა [თინეფს] უკულ სამუშა დო ქუწუათი უჯგუშიენია დო გინოჭყვიდეს ქუწუანი დო ქჷმორთეს დო ქუწიის. ათაშიენია საქმე, ათაშია დო მიდგარე გერჩქვანილიენია სქან ის [ბაღის], მჷნალჷქ ხოლო ვამაგორესია, თაქ მუ გილურსუ დო მუ ვარიან, თექ.

გაძლიერ თავადიქ ყარული, მარა ართგანი ე ის ვეგიორინუ

შეღობილიშ ტერიტორიასჷნ, ჭე იქილე ქიგიორინუ ოდო თე იქილე გერენ თინემქ დოლანტეს ადამიანიჯგუა მუდგარენ; ქუჯინეს თეს, ქუჯინეს დო მოლართ თექ, მოლართ, ჩქიმ პატონ სი რექჷნ, დო ეთეურე სოდგარენ მითილ ექ, ბირგულ ქუდაშკუ. ე[ნა] მუ უჩქ ენემს, ეს ხე ვაუღუნი, ენეფ შორს რენა დო. ბირგულ ქუდაშკუ დო ქოჭკომუნსუ დო ქუმორთეს ხოლოშა, ქუმორთეს დო ქოძირესჷ, ხე ვაუღუნ თენა დო ეცოდეს, მარა მუ ღოლან?! ანგილოზიჯგუა ძღაბი, არაჩვეულებრივ მეჯინელიე ხოლო. ოჭოფეს დო ქუმუჸონეს თავადის თენა. თავადი რე ასე თენანი იშენი, ჩილამურქ გელუციუ, თეჯგუა ძღაბი [ქოძირუ] დო ქოკითხ თეს, მუი რე ტყას ცხოვრებაში მიზეზი დო მუი რე ხეშ კვათუაშ მიზეზი, მუქ მოხვადუ, მუქ იჸუ, მუ რენ თენა დო ვათქუ თექ, დაბადებულო მა ფშჷნ თაშ ვორექია დო მუთუნ ვამჩქჷნია, უწუ. თენა მუჭო მაღოლ, მუი რენ, მუთუნ ვამჩქუნია თექ. ათე თავადის ართ ბოში ჸუნცუ. თენა გურაფულენს რუსეთის, თე ბოში. ათე ბოშიქ ქიდელახ, ოდო დელოგინ იშო დო ლოგინს ჯან თენა, ათენა [თე ძღაბი] ხე კვათილი, ენა [ე ბოში] ლოგინს ეთმედირთ ვითოხუთშე არჩა, გედირთჷდა თენა [რე], ვარდა ნინას ვეჩიებუ, ლოგინს ვედირთჷ დო ჯან მიკორთელო კჷდაშე დო ათეს ქემუჸონანქია თეს ოსურო. რახან განგებაქ თაშ ისრულუა, ათექ ჩქიმ ჸუჩა ქიმიჸონუა თენა თაქია დო ქუმუჸონეს თე ბოშის ოსურო თენა.

ამსერ ქიდიჯირეს თენემქ, ჭუმსერი, ართ მარაქ მუკილ დო გედირთ ე ბოშიქ, ჩიება ქჷდიიჭყჷ, ქიგლუურსუ ინა დო წარმოწანაქ მუკილ დო თე ბოშიქ მიდართუ დო გაგრძელ გურაფა დო გურაფულენს თე ბოშ. დროქ ქუმორთ, მუჲ დროქ დო ქიდებად ანგილოზი ბაღანაქ, უნახავი, ვარა მუთუნ ინავო. გვერდი ოქრო დო გვერდი ვარჩხილიენიე _ იჩიებუ ბაბუ. ათეჯგუა ბაღანაქ ქიდებადჷ თაქ. გეჭოფ თე მოახლე ჸუნსუნი თენა დო დოჭარ წერილ: `მართალიენია, სკან ოსურს ხელეფ ვაუღუნია, მარა ბაღანაქ ქიდებადუა გვერდი ოქრო დო გვერდ ვარჩხილქ ოდო ქჷმორთ დო ქოძირია სკანი ბაღანავა“.

მიდართ თე ბოშიქ (=მოახლექ), ქიდეკინ წერილი, გედოხოდ ცხენს დო მეურცუ დო სოფელი გიშალ აფ ასე, სოდგარენ სოფელ ადგილი დო ათე სოფელიშ ბოლო ოჯახიშა ქიმერთჷ დო ისერუ. სო იდას ასე, იშო ტყაჯგუა ირწყებე დო მინიბლენქია დო ქჷდიძახ: ეი მენძელ, ეი მენძელ! გინარჩქილ ოსურქ. ამსერია ქიგმოსერაფეთია, უწუ [თიქ] ოდო მოზოჯია პატონია, უწუ ე ოსურქუ. ქომონჯ ვარენია ჩქიმ, მარა... ენა ონადირუშა გილურს. ვემუტებ ე კოს ნადირება. ენა ჸოფე თურმე ათე ოჯახ, თე ძღაბი[ს] ხე კვათჷნ თი ოჯახი ჸოფე თენა. ქჷდოდოხოდეს ასე. ოსერშე გამკუღ, ჩქიმ პატონ სი რექინ, ენა, ინა დო ქომაჸუნეს ჩიებას, სოშა მეურქ, სონი ექ, მინ რექ, მუი რექჷნ, ქუწუ თექ ათაშ, ათაშ, ათაშ მოხვადუა დო თენა ირფელ ქეჩიუ თექ, თენა დო თე ბოშ გურაფულენდჷ, დეინვალიდჷ, ლოგინს ჯანჷდჷ, ხეკულე ძღაბ ოჭოფეს, ქუმუონეს დო ქიდებად ბაღანაქ არაჩვეულებრივ, გვერდ ოქრო დო გვერდ ვარჩხილქჷნ ფერი დო ახიოლ თე ოსურსუ, შურ ქუნოდგენია ხოლოვა დო ღორონთქია ქომჩუა შურიშძიებაშ საშუალება. ათექ ახიოლ ასე, ქაშუოლჷნ, ქიმერთუ დო დოჭარუ თექ, გელეღუ თენა ამსერ, თე ნაჭარა, თე კოს ალუძუნ თენა ოდო დოჭარ: `თინა ვაბაღჷდუაო სკან ოსურ ხეკულე დუე, თოლი უხუ ლაკვიქ ქიდებადუა, ჯოღორიშ ჯიშიქია ოდო მუჭო ფქიმინათი ქუმომჷჩინია.“ ქალუდუ თენა დო ე კოჩქ ოჭუმარეს გედირთჷნი, პურ-მარილ გუნწყუ ხოლო ე ოსურქ, ჩქიმ პატენ სი რექინ, დო მეფურინჷნს ე კოჩი, ინა, ბოი, მერსუ, ოქროჯგუა ინა [ამბე] მეუღუ დო. ოდო მუდგარენი დროეფიშ ინასჷ [უკული], ქიმიოჭირინუ თექ თე ბოშიშა დო ქიმერთ; დაკინუ თენა, ჩქიმ პატონ სი რექინ, დო ქიმიახვამ დო ქიმეჩჷ დო ბოშის ჩილამურქ გელუოლ, ბოი, ქიგარც. გებორჷ ე კოჩქ, ბოი, მუ ოგარ ჯიმაღურელი, მუი რენია დო ინა, მარა ვაგაბედ ასე მუთუნიჲ რაგადი. თეს ასე ეწყინ, ვაკოდუა სკუავა დო ინა დო... ქიმერთჷ დო დოჭარ ბოშიქ წერილი: `მუაჩქიმია, ჯოღორიშ [ჯიშის] მოგენსინ ფერ ვარ, ჭერჭე გვერ ქორდასიე, ჩქიმ მულაშა ხე ვემეთხათია.“ ქიმეჩ თეს დო მოლართ ე კოჩქ. ათაქ ქიგჲასერ კინ აშონას. გელუღ თე ოსურქ, ხოლო ქომონჯ ვარე, გელუღ თექ ნაჭარა ამსერ დო დოჭარჷ: `გვერდი ოქრო დო გვერდ ვარჩხილ ვარი, ართო ოქრო ქორდასიე, კულახუნეთია ხუს, ქომაბუნეთია ორძოლი დო გოუტეთია“.

ქჷმიღეს თე წერილი, ჩქიმ პატენ სი რექჷნ, დო მუმაქ, დიდაქ გეგნინწერჷ, მოახლეემქ, ირკოს ოწყინ, მარა მუ ქიმინან, ბოშიშ ბრძანება რე დო თე ბაღანა ქჷკლახუნეს ხუცუ დო წოხოლე ქიგიობუნეეს ჩახვია დო გოუტეეს. მეურს, მარა შკირენს, მარა მუ ქიმინას ასე შკირენსჷ დო ბაღანა ვადახუნე, ქუდახუნუას, ვაკლახუნე, ენა ვეშაღინე ოდო მეურსუ დო ქუმაჸუმენ წყარქ, თიშ მანწარათ ქუმაჸუმენ წყარქ, ა ოჭკომალ[ს] შურო ვაჭკომუნს, წყარ ქოჩე; მეურს, მეურსუ დო ქოძირ მდინარე მეურს დიდი, წყარ მეურსი ოდო ახიოლ, ქიმერთ თაქი დო მიშელ წყარშა, ადო იკინანსჷნ თეში დო ინა [ჰა-ჰა, გითიანჭუ წყარს], მარა დიკინასინ, ბაღანა ქუდუოლ დო წყარშა მიშელ თექ, წყარ ვაჸაფე ნიჩვი გიანჭუნ თიზმა თექ; თეიშა ქათადირთას წყარქ, ნამდა პიჯქ ქიგიანჭასუ, თეზმა ვაჸაფე თე წყარ. ვარ მუ ქიმინას, ღორონდგიე, დო დიკინ თექ, ა, ქიდიჸუცუ დო თაქი ინა დო დიკინ დო ასე შუნსუ წყარს, შუნსუ დო იშო გააჭყორდ თეს [ბაღანაქ], თე წყარი თიზუმა ინა [მიმზიდველი] რე, დეხარბუ ინა დო ბაღანაქ იშ ქინუოლ წყარშა. ქინოლ ბაღანაქ წყარს, ჩქიმ პატენ სი რექინ, დო გამათხოზ თეს ოდო ითომუ დო წუმუპუტონუ ხე დო ჟირხოლო ხექ ქიმიარდ იშო, ხეთ გინირთჷ (=გეთელუ) დო ოჭოფუ, გეშეჸონ, ეშელ, დირძღჷ ოჭკომალით, ჩქიმ პატონ სი რექინ, დო ე სკანი თავადი დო ინა კუჩხიშა ქიგლებუნუ. ბაღანა ჸუნს ოქროჯგუა, მუს ხელეფ ჟირხოლო [უღუ] დო მეურცუ.

ქუმორთ მუჲ ჸუჩა. მინაჯინჷ ჸუდესჷნ, ქჷდიძახ იშო. ისერუ. აქ ჸუდე რე მუში დო ქჷდიძახუნი, გინარჩქილ თე ოსურქ, ქომონჯ[ქ] ამსერ მორთას ოკო. გინარჩქილ თე ოსურქუ დო ათაში ქინაჯინუნი, გებორჷ, ბოში. ა მუშ ოხორასკილი, ა, ბაღანა გადასარევი, მარა ხე უღუ ჟირხოლო. ათექ აბორჯ ასე, თე ხექ, ვარა ოხორასკილ მუში [რე] ოდო მოზოჯია დო გამნიჸონ. ელახენა, იჩიებუნა ეთეშ ქომორთ ქომონჯქ. ქუმორთ ქომონჯქინ, ვეჩინუო ე ჯიმა[ქ], ბაღანა დუო, ძღაბი’დ გოთქვიშინაფილ. ჯიმას გეუოლ გარაქ დო გალე გიმილ იშო. მუშ და ელახე ამარ დო ხე უღუ, მარა და რე მუშ სინამდულეს დო დეკმაყოფილ თე გარათ, დირძღუ დო მუნილ, ქუდოდოხოდეს დო ოსერშოს ხენა, ჩქიმ პატონ სი რექინ, დო ეი, მენძელია, ქიდჷძახ მიდგაქირენ დო გინარჩქილ თე კოჩქ. ქიგმოსერაფეთია ამსერ დო მოზოჯ პატონი დო...

ცხენ ქინკაკირესჷ დო თე ბოშიქ მინილ თე იშ წოხოლე, თე ხაზენიში დო ა, მუშ ოსურ ქელახე, ბოი, ამარი, ა, ბაღანა ამარ ქელახე, გვერდი ოქრო დო გვერდი ვარჩხილი, ა, უჯგუშ ვეი ბაღანან ფერი დო ა, ხე უღჷ ჟირხოლო. ათენა [რე გასაკვირი], მუჭო ნოგურაფუენია კოჩ კოსია, დირაგადუ ასე თე ბოშიქ. ექ ქიჩინუ, მუშ ქომონჯიენ დო ვეჩინუო ასე ე ოსურქ, მარა ვეჩიებუ მუთუნს. მუშენია, პატონია, უწუ თე ჯიმაქ ასე, თე ოჯახიშ კოჩქ. ოსურ პუნდუა ჸუდესია, უწუ, ოსურ პუნცია ჸუდეს ოდო ქეჩიუ ასე თექ მუჭო რე, მუ ვარ, ირფელ ქეჩიუ თეს ოდო ხე ვაუღუნია ჟირხოლოვა დო მუაჩქიმქ ქომოპჭარუა, ბაღანა დაბადებენია ათეჯგუავა დო ათაშიენია მოხვალამირია დო თექ მეურქია დო ათექია ამაბორჯუა, გვალო ჩქიმ ოსურიენია ჸვალ გოკვათე, ართიანს მეუდგე თიჯგუავა; ხოვა, სი ვარ მა ხოლო ებობრჯია, თე ბოშქ უწუ დო ექ მუში ამბე ქეჩიუ თაქ: და ჸუნდუ, ათაშ ორთუდუ, თაშ ორთუდუ, უკულ ჟირხოლო ხე მეკვათუ ბოლოსი დო ტყას გაჩემუ ურემი დო ქეჩიუ თექ დო ურჩქილ, ურჩქილ თე ბოშიქ ეჩიებუნ თესჷ დო თინა ვარდასია თენავა, თე სკანი და ვარდასია, ტყას რენია ნაჭოფავა ჩქიმი ოსურია დო მოლავა ოჭუმარეს მიდმაჸუნია დო ქობძირათია. მავა ათაში დიდი განთქმული კოჩიშ სკუა ვორექია დო გინოჭყვიდეს ასე ულა, ოჭუმარეს ქაჸუნას ოკო თე კოჩქ, თე ჯიმაქ ასე თი ჟანს თეშ, თე ოსურქ გედირთჷ დო თქვავა სოთინ ვაგაფუნანია ოლუა, უწუ, მა ვორექია თი სი ჩქიმ და რენიე იჩიებუქიე თინა დო მა ვორექია ჩქიმ ოსურიენიე, იჩიებუქია, თინა დო ქეჩიუ თექ მუჭო მოხვადჷ, მუჭო აღოლ, ასე თე გაჭირება ქეჩიუ ირფელ დო ათაქია მუთ მოთმოხვადუდუე, თესია ათე სკანი ოსური ორთჷდუა, მარა თქვავა აკოცენდითია დო ათე ბაღანაშ ჸოროფაჲ გურშენ ვევჩიებუდია მა თესია, უწუ.

გჷმილ თე კოჩქ, ჭიე ხანქ მუკილ დო ქიძახ, ქუდ[ჷ]ძახ ოსურს, ქიმიორკიუ ოსურქ, გაგმოლ თე ბოშიქ ხოლო, მარა ხამ გელენწყჷ, ვამორთა ვარა დორჸვილუნქია, უწუ ოდო ქეკუსკუ ცხენც თომათ თე ოსური, გეიონწყ თე ლაგამი დო ქაჸათუ ცხენქ, ინა ცხენქ მუი რე ეკმობუნია დო გეერიუ ცხენქ დო დუდი ეკაკვეწელუდჷნ თიშ მეტი ქეკისოფ იშო.

აქ ართ მარას [ი]ქეიფეს, ჭკომეს, შვეს დო მიდართეს თექ. ი კოჩქ გვალო გეგნილასჷ დო ართო მუშ გუბერნია ქუდაპატიჟუ ოდო იჸუ ქეიფიქ დო ათე ბაღანაქ მირდჷ, ჩქიმ პატონ სი რექჷნ, დო ართი-ართი მეფეში კარიშკაცო გინირთჷ თიქ. თიშ მამანგარა ნიჭიერ ბაღანაქ იჸუ დო კარისკაცი’დ მეფეშინ ფერქ დო ცხოვრენდჷ ი ჩილ დო ქომონჯი დო დოღურუდეს ალბეთ, აბა მუ იჸიდუ, დირჩინუდუ.

[თენა] ნამდვილ ამბავიენია, თქუანდ ჩქიმ ბები ჩხონაფილი.