24. სქვამი ჩხომი

teiHeader

რდჷ ართი რჩინ კოჩი. თის ჸუნდჷ ართი სქუა მეჩხომე. ართიშახ მეჩხომექ მიდართჷ ჩხომიში ოჭოფუშა; გილართჷ ბრელი, მარა ჩხომქ ვააჭოფუ. ბოლოს ოჭოფუ ართი ჭიჭე, მარა ძალამი სქვამი ჩხომი. მეჩხომეს შეეცოდჷ ე ჩხომქ დო ქიდნახუნუ წყარს კონი. ჸუდეშა ქუმორთჷნი, მუმაქ კითხჷ:

- ჩხომი ვაგიჭოფუნიავო? სქუაქ უწუ̄:

- ართი ჩხომი ოფჭოფი, მარა ძალამი სქვამი რდჷ, შემეცოდჷ დო კონი გუ̄ტევა.

მუმაქ გოლახჷ სქუა დო გეგნაჸოთ ჸუდუშე დო უწუ̄:

- მუშენი მიჸოთი ღორონთიში ჭყოლოფუა?

მეჩხომექ მიდართჷ. შარას ქაუხვადჷ ხარაზიქჷ დო იდეს, მიდართეს წორო. ენეფს ქაუხვადჷ მეწამალექ. მეჩხომექ, ხარაზიქ დო მეწამალექ დეემოჯგირეს ართიანსჷ დო პიჯი ქიმეჩეს ართი-მაჟირას, მუთი იშუანი მუშმუში ხელუათჷნი, ართი-მაჟირაწკჷმა შქაშა გიირთანი.

ათე დროს ართი მაფას ჸუნდჷ ოსურისქუა ლეხი. მაფაქ ბრელი ეცადჷ, მარა სქუაშა მუთაქ მაახვარინჷ. უკულინეშე მაფაქ გამაცხადჷ: "მით დაასქილიდუანს ჩქიმი ოსურისქუასჷნი, თის ჩქიმი ოსურისქუას ჩილო ქეკუხუნუანქ".

მეწამალექ მიდართჷ მაფაში სქუაში ოწამალუშა. მუჟანსით ქუმორთუ მაფაშანი, მეწამალექ გოლასირუ̄ ლეკური, ლეხის დუს ქიგიოდირთჷ, ხეს ლეკური უკინებუდუნი, დო თეში თქუ: "გვერშაპი, მა გიზოჯჷქ ლეხის დეთხუე, ვარა დუს მერკვათჷნქ".

გვერშაპიქ ეშეელჷ ლეხიში ქვარაშე დო გიმილჷ გალე. მაფაში ოსურისქუაქ დოსქიდჷ დო მაფაქ ქიმეჩჷ თინა მეწამალეს ჩილო. მეწამალექ მოლეჸონჷ ჩილი დო დიიშაყარეს სუმიხოლო თაბუნენქ. გირთეს, მუთი ნაში̄ბი უღუდესჷნი. მეწამალექ მუში ჩილი დო მუქით ქოხვადჷნი, ირიფელი მეჩხომეს ქიმეჩუ დო უწუ̄:

- ჩხომი, ნამუთი შიიცოდე დო გუ̄ტენი, მა ვორდი.

მუქ ათენა ქოთქუ დო უძირაფუო გორთჷ.