7. და დო ჯიმაშ არიკი

teiHeader

ორდეს ჟირი და დო ჯიმა, ნადირენდუ დო თეთ ოსქილიდუანდუ დას. ცხოვრენა თაშინი, ართი სერს შორიშე ჭრაქიში სინათლე ქიძირენი, ქომიოგეს თოლი. დაქ ქოთხუ მუში ჯიმას: - მიდამიჸონია თექ, სიდეთ თი სინათლე იძირენიე. დაჸუნუ ჯიმაქ დას. ეიყარეს დო მიდართეს. დაში სახელი ვაუჩქუ არიკის დო ჯიმას ლევანი ჯოხოდუ. მეულა შარასჷნი, ართი კოჩქ ქეშეხვადეს, ლაკვი მეჸუნსუნი ფერქი, - გამარჯობა, ჯიმა სქანია, - უწუ ლევანქ. - ღორონთქ გოგიმორძგვასია, - უწუ თი კოჩქ.

- ქუმოპიდი ათე სქანი ლაკვია, - უწუ ლევანქ, - ძალამი ჯგირი, ქიმერჸიდენქია, - უწუ თი კოჩქ დო ქიმეჸიდუ ლევანს მუში ლაკვი ჩხორო თუმანიშა.

მიდეჸონეს ლაკვი დო მიდართეს ლევანი დო მუში დაქ მუნეფიში შარაშა. ქეშეხვადეს შარას მაჟირა კოჩქ, ნამუსუქი ქირი ქიგუხე ხესა დო აშო ქუმურსჷნი. გამარჯობა, გუმორძგუა! - უწის ართიანს. - მოროვა, თე სქანი ქირი მა ქუმოპიდია, - უწუ ლევანქ, - ძალამი ჯგირია. - თქუ ქირიში მინჯექ დო ქიმეჸიდუ ლევანს ქირი ჩხორო თუმანიშა.

მეულა ამუდღა, ჭუმე, გეღანი დო ქიმიდირთეს ართი დიდი თის, ნამუშეთი სინათლე იძირედუნი. ქიმერთეს ეზოში ხოლოშანი, ქოძირეს, ნამუდა თე ეზოს მიკი-მიკი ქუაში ხიბირი გუჸუნსინი. ათე ქუაში ხიბირი ეფერი სქელი ქორე, ნამუდა ჟირი საჯენი ქუნოღვე განი. კარეფი არძა ეკილერი რდუ დო სოლეთინი ვემნირთედუ. დაქ უწუ ჯიმას:

- მიოგი, ჩქიმი ჯიმა, კილე დო ეკარღვი თე ხიბირია.

ლევანქ მიოგუ დასურო კილე დო ეკარღუ ხიბირი. მინილეს დინახალე დო მიოჯინესო - ჸუდე ქორე ანდა თოლი, ლევანქ მინილუ დინახალე დო არძა ოთახუეფი დილუ, მარა კოჩი ნამუთინს ვემლახვილუ, არძოქ ცარიელო ქუდოხვადუ. გეკილუ არძა ოთახუეფი ართიში მეტი. ათე ართი ოთახუს მუში და ქუდაბინუ, კილეფი თის ქიმიაბარუ დო უწუ სი თაქ ქორდეოკონია ჩქიმი მულაშავა, სოთინი ვეგნორთავა.

მუქ გიმელუ გიმე დო მითილუ ჸუდეში თუდო გვირაბიშა. მიოჯინუო, ართი ნდიქ ქეშეხვადუ, ართის მაჟირაქ გამკაჸუნუ, მაჟირას მასუმაქ დო გამკიწკარეს ვითოჟირი ნდიენქ. ჭიჭე წიმიკონუ დო დიდი კარდილათ ხორცი ქუმკობუნი, ქოძირუ, თუდო გარგანჩია დაჩხირი ქეთურზუ. გეკიბეს ათე ბოშიქ დო ნდიენქ. ბოშიქ ორჯგინუ არძას დო დუდი მეკვათუ. გილუ, მილუ დო გითილუ აშონი, ქირი დო ლაკვი მიდეჯუმუ დო ონადირუშა მიდართუ. კინოხ დას მეხასიათუ ოთახუეფიში ძირაფაქ. დილუ არძა დო გალე გიმილუნი, მუდგარენი ქოკუსანსინი, ქიგეგონუ. გიმელუნი, ქოძირუ, ღურელი ნდიეფი ქოწკარუნა ვითაართი დო მავითოჟირას ჭე შური ქუდგუიგი თიშენი ნამუდა, ათე მავითოჟირაში დუდი გვალო ვაჸოფე გოჸოთამილი დო ტანს ჩარცხუებული. ძღაბიქ ქიმერთუ ხოლოშა დო კითხუ:

- მუ გოსქილიდუანსია სია. ნდიქ უწუ.

- ათაქ თუდოლე კაკაბიჯგურა წყარი გითმურსუნი, თინა ორკოლით ქიმიღი დო მუჭოთი კისერს ვარენო ქიგნმობუნქიე, ხათე ხოლო ჯგირო გინიფრთუქია.

მიდართუ ძღაბიქ დო მუჭო ნდიქ უწუნ, თეში ქიმიღუ ორკოლით წყარი, ქიმერთუ ხოლოშა დო ქიგნაბუ კისერსჷნი, ნდიქ გეთელუ დო ეშე გამწოდირთუ. თე ნდიქ დო თე ძღაბიქ ართიანი ქიჸოროფეს. ნამუ შვანს ლევანი ქიმიშუნი, ძღაბი ნდის დატეობინუანდუ. ლევანი ონადირუშა მიდეშუნი, კინოხუ ნდის გამკიჸონანდუ თე ძღაბი დო ორდეს ართო.

ართიშახ ნდიქ უწუ ძღაბის:

- ლევანქ მა ქობძირასიე, დოპილუნსია, მუ ამუდღა დო მუ ჭუმევა; მორთი, უღალატათ ლევანს დო თეში დოპილათია.

- მუნერო პილათია, - უწუ ძღაბიქ. - სი ჯგირო გიჩქუნია, ინა მუ მანგარი კოჩირენიე დო აბა, მუ ოკო მუხერხათიე.

- მუნეროვა-და, მა დუგოგურუანქინი, თეშია, - უწუ ნდიქ.

- ათე დო ათე გოლას ართი დიდი კერი ცხოვრენს, ნამუსით ჩქვა უღუ ჟარნეჩიდოვითი საჯენიში მაგირძა დო ეჩი დო ვითი ხაჯენიში მაგანავა. სი ლახარა ქიმიგონი დო ლევანქ გიგაკითხუასინი, უწი ნამუდა: ათე დო ათე კერიშე ძაგარს ქუმომიღანქ-და ვარა, ჩქიმი მოხვარე ცა დო დიხა შქას ვარე მუთუნია. მუჭოთ ვარენო ლევანი ქემურს თი კერიშანი, ინა ლევანს გაკოსოფუნს დო ჩქი გემოშა იპითია.

მიდართუ ნდიქ დო დიტყობუ.

ქუმორთუ ლევანიქინი, დას მიოჯინუო, ლოგინს ქეითოჯანუ ლეხო. ეწყინუ ჯიმას დაში ლახარაქ.

- მუ გოსქილიდუანს ღადავა, - კითხუ ლევანქ, - თე დო თე გოლას ართი დიდი კერი ცხოვრენს, ნამუხით ჟარნეჩიდოვითი საჯენი ჩქვა უღუნი. მუ მუგოღალაფუანს, ვარა, ეთიში ძაგარს ქუმომიღანდე, დუდიშა ქიმიბდვან-დო, ხათე დოფსქიდუქია, - უწუ დაქ.

ლევანქ გიმილუ ხათე, მიდეჯუმუ მუში ქირი დო ლაკვი, გუდირთუ შარას. მეულა, მეულანი, ლაკვიქ უწუ ქირს:

- ქირი, მუჭო გეისვირთანს ნინძგინი, ვარწყექო მუ გაჭირება გიორე ლევანსჷნი? ტყურათ მეჩუო სქანი გურიშენი ლევანქ ჩხორო თუმანი? მეხვარი მუთუნია!

- მა მუ ოკო მუვოხვარევე, - თქუ ქირქ. ლაკვქ უწუ:

- მეუ დო კერს კისერს ქიგიოფურინი, კისერს მუჭო ქიგიოფურინე, ჸუს ქალაფურცქინი: ლევანი მურსუ სქანი დაჯიმალებუშა დო აბა, სი გიჩქუ, ჩქიმი კერიე, უწია. ვადაგიჯერუ სივა-და, მა ქიმეურქ დო მა ხოლო ქუწინქია. ინა თიწკუმათ გვალო ვადეჯერსია, მარა, ლევანი, სი ეფერი ქიგიოკიჟინი ნამუდა, კერს ოჭიშიქ მეხორცქასჷნი, დო ათენერო დევემოჯგირებუთ-და ვარა, მეტო ვარე ჩქინი საშველია, - თქუ ლაკვიქ.

ქუდანწყის თაში დო იდეს გოლაშა. იდეს დო მიანჭის კერიში ორენჯიშა. ე ჟირქ გაჩენდეს დო ქირქ მიდართუ დო ქიგიოფურინუ კერს კისერს, ჸუს ალაფურცქინუ ნამუდა, ლევანი მურს სქანი დაჯიმალყბუშავა. კერქ ენა ვედეჯერუნი, მიდართუ დო ლაკვიქ ხოლო რაში ქუწუ. კართი ასე ჯერდუ გჷალონი, ფერი ბორჯის ლევანქ ფერი ქიგიოკიჟინუ ნამუდა, ცას მურიცხიქ გამახორცქუ. ათეშვანს კერქ ქიდეჯერუ. ქოძირუ ლევანინი, ახიოლუ ძალამქ.

- ვაგაფჩენდიო, - თქუ კერქ, - ართი ხანი რე ნდიეფი ვამაწუხენსჷნი, თურმე ლევანს დუზღოდუაფუ. ლევანი მორდელენ დო ქუმოპჭიშაფუნი, აწი მა მუ მიჭირსია.

- მუშა რე საქმე, ლევან, მუ გაჭირება გიგორენიაა. - კირხჷ კერქ.

- ათაში დო ათაში რე ჩქიმი საქმევა, - უწუ ლევანქ, - აკა კაკალი დაში მეტი მუთუნი ვარე ჩქიმოთი დო თიქ ხოლო ქიდმელახუ. სქანი ძაგარქ ქემმაღინუ-და, ხათე ხოლო დოსქიდუნ დო, ვარ-და, ვარია.

- ძაგარი ვარიე, მა თვითონ მიდგაჸუნუქ გჷალოვა, - უწუ კერქ. მოლართეს ლევანქ, კერქ, დო ლაკვიქ. ქუმორთეს ყუდეშა. ნდიქ ენეფი ართო ქოძირუნი, ღურა გათუ. კერქ გაჩენდუ, გაჩენდუ გალე დო ლევანქ ძაგარამო მინილუ დინახალე, სოდერ მუში და ჯანუდუნი, თექ. ქიმწუდუ დუდიშა დას ძაგარი დო მუნენქ მიდართეს ონადირუშა. დირთუ ლევანქ ონადირუშენი, - მუჭო რექ ასე დადავა, - კითხუ.

- მუჭო-და უარესო ვორექია, - უწუ დაქ.

- მუ წამალი ოკო რდას სქანი მოხვარე, ჯიმა ღურელია, - თქუ ბოშიქ.

- ათე დო ათე ტყას ცხოვრენს ართი დიდი გერი, ეთიში თომას ქუმომიღანქი-და, დოფსქიდუქია, - უწუ ძღაბიქ. თენა ხოლო ნდის დუგურუაფუდუ, ვარა ძღაბის მუ უჩქუდუ.

გიმილუ ბოშიქ დო კერს უწუ - ათაში დო ათაში რე ჩქიმი საქმე დო ოკო იბდე თი გერიშავე. კერქ ხოლო მიდაჸუნუ დო მიდართეს. ქიმერთეს გერიში ხოლოშანი, მუჭოთ ვარდუო კერიწკუმა ღოლესჷნი, თეში ქიმინეს ირფელი. ათე შვანს გერქ მოლართუ ლევანიში დაჯიმალებუშანი, კერი ქიგერენი ქოძირუ. თურმე ათე კერი დო ათე გერი ჯიმალეფი ჸოფენა, ქარაგვეს დო გაჯუდეს ართიანს. ლევანს ხოლო დეჯიმალუ გერქ დო კითხუ: - მუშა რე საქმე, ვაიჭირს ხოლო მუთუნია. ლევანქ ქუწუ მუში გაჭირება. აბა, მა ხოლო მიდგაჸუნუთ დო ართო მიფშვათია, - თქუ გერქ. - ძალამ ჯგირია, თქუეს არძაქ დო მოლართეს ჸუდეშა. მინილეს ეზოშა დო ნდის გვალო დუღურუ გურქ. "იშენი ვაჸოფე ეში საშველია". ძღაბის უწუ:

- ასე მუთუნი ვარენო გიგაკითხუას გერიში თომათ ვასქიდუქჷნი უკულია-და, თუნთიშა ქაწურე, ჩხორო დღაში ოლუს გუმარე გოლასჷნი, თიშავა.

მიდართუ დო დიტყობუ ნდიქ. ბოშიქ გემნიღუ გერიში თომა დო ძღაბის დუდიშა ქემწუდუ. დირთუ დო მიდეჯუმუ არძა ონადირუშა. გილართეს ბრელი, ინადირეს დო ჸუდეშა ქუმორთესჷნი, ძღაბი უარესო გორთუმე.

- მუ ღორონთიში ჭყორინი რე, მუჭო ვემმაგორუ მა თეში წამალიშავა. - თქუ ბოშიქ.

- ასე ქომიჩქუ, მუ მოსქილიდუანსჷნი, მარა შორს ორენ დო მოშქურუნია, - უწუ ძღაბიქ. ითამუ ვაკოდუ ძღაბის რაგადი, მარა ბოშიქ ქარაგადაფუ. "ჩხორო დღაში ოლუს გოლას თუნთი გუმარე ართი დო ეთიში თომა უთუო დუმოსქილიდუანსია, " - თქუ ძღაბიქ. გიმილუ ბოშიქ დო ქუწუ მუში გაჭირება კერი დო გერს.

- გაჸუნუთ ჩქი ხოლოვა, - უწის ენენქ დო მიდართეს არძაქ ართო. მეულა, მეულან დო მაჩხორა დღას ქიმერთეს თუნთიშა. თუნთიწკუმა ხოლო თეში ქიმინეს, მუჭოთ კერი დო გერიწკუმანი. მუჭოთ კერი დო გერი ქოძირუ თუნთიქჷნი, გეხარუ, რადგანს თენეფი თიში ჯიმალეფი ჸოფედესჷნი თუნთიქ ხოლო დეჯიმალუ ლევანს დო უკული უწუ: - მუშა რე სქანი საქმე მუ გიჭირსია.

- ათაში დო თაშიე ჩქიმი გაჭირება დო აკა სქანი თომა ოკო გამკისოფე დო ჭიჭე ქომუჩათიე.

- მა გაჸუნუქ თვითონ დო იბდათი ართოვა, - თქუ თუნთიქ.

გიაჸუნეს არძაქ ართიანს დო ქიმერთეს ბოშიში ჸუდეშა. გაჩენდეს ენენქ ჸუდეში წოხოლე დო ბოშიქ მინილუ მუში დაშა, გელეღუ თუნთიში თომა დო ქიმწუდუ ორთუმელიშა. გიმილუ ბოშიქ დო მიდართეს ონადირუშა. კინოხუ ნდიქ მიკილუ ძღაბიშა დო უწუ ნამუდა: - ართი ფუთი საპონი ქუმაღალაფე სქანი ჯიმასია დო "დუდი გიბონი, ჯიმავე," უწია; მუჟანსჷთი დუს გეიჟვეპურანსიე, თოლეფიშა ხოლო გასუმალაფე საპონია დო მუჭთოლენს დოჭუნსჷნი, ხათე დოჭუტუნს ინა თოლენსია. ითიმწკუმა მა გაგმოვსხაპუნქ ოთახიშე. უცბათ მუკურთანქ დო კისერს გამკუტახუნქია; უკული იფცხოვრათ ჩქი ჯგირო დო სქვამას, მითინი ვეჸი ჩქინი უჩაშია.

- ძალაძი ჯგირია, - უწუ ძღაბიქ.

ქუმორთუ მაჟირა დღას ბოშიქინი, ძღაბიქ ქუმაღალაფუ ართი ფუთი საპონი დო ქასუმალაფუ, მუჭო ნდიქ დაგურუნი, თეში. ნამუშვანს ბოშიქ თოლეფი დოჭუტუნი, მიკილუ ნდიქ, მუკურთუ კისერს დო მიკი გამკუტახუ. კისერი მუკოტახილი ბოში გალე გაგმაჸოთეს. მუჭო თენა ქოძირეს-დო, დიჭყეს არძაქ გარა გერი ქოზურზულანს, ქინგარა ღეჯი, ქირი, ლაკვი დო თუნთი. ბოლოს ლაკვიქ უწუ ქირს:

- მუჭო გეისვირთანს, ქირი, ნინძგინი, სქანი გურიშენი ტყურათი იგუო ლევანქ ჩხორო თუმანი, ქიანას სი გილაფურინუნქ მიკი-მიკი დო ღურელიში ოსქილიდაფარი წამალი სი ოკონო ვაიჩქუდასიე.

ქირქ იფიქრუ, იფიქრუ დო თქუ:

- ქო, ქომიჩქუ დასურო ღურელიში გათელებერი წამალია. ათაქი ხოლოს ართი წყარი მეკანკალანს, ეთინა ქიმიბღათ, ქიგნუვობათ ლევანს დო ხათე ხოლო გეთელებუნია.

მიდართუ ლაკვიქ დო ორკოლი გეგმაკერკელუ, კერს ჩქვას ქუმაბუმეს დო მიდართეს წყარიშა. გეიობეს წყარი, ქიმიღეს დო ქიგნაბეს ლევანს. მუჭო ქიგნაბეს-დო, გეთელუ ლევანქ. გემნარაგუ ჸუდეშა დო დოჸვილუ ნდი. დას უწუ:

- სი ჩქიმი მოღალატე ჸოფერექია, მარა მა ვარჸვილუნქ სია. ქემეჩუ ჟირი ცალიორი სენი დო უწუ:

- მა ართი წანამოწანათ გემგეთხუებუქ სი დო ათე ჟირი სენს დოიტენქ. ართი სენს ჩქიმოთ გიობი ჩილამური დო მაჟირას ნდიშოთია. ართი წანაში უკული ქუმურქუნი, ჩქიმი სენს მეტი ჩილამური ქიგვოხვილევადა, მიდაგიჯუმანქ დათია, ვარ-და, ვარია.

გიმილუ ბოშიქ დო ეკაჸუნეს არძაქ უკახალე. იდეს, დო ართი ზღეა პის ქალაქიშა ქიმერთეს. ქალაქი ჸოფე დასურო ძალამი დიდი. მიშელეს მიშახალენი, ზღყა პის ართი ბარჯგი ქეკოშქუნ დო ბარჯგის ქიმკოკირუ ართი ცირა. ქიმერთეს ხოლოშანი, ათე ცირა ირიათო ქინგარს. ლევანქ უწუ:

- მუ გონგარუანს სია. ვარა მუშენი რე მუკოკირუქ ბარჯგისიე? ძღაბიქ უწუ:

- ვარწყექო, ქალაქი უჩათ გოქიტილი რენიე! ათე ზღვაშე გვერშაპი ეკმურსუ ირ დღას დო ხენწიფეშა აფუ მოჩინელი ნამუდა, თითო კოჩი დახვამილუას ათე მერჩქინელი ადგილსიე. ხენწიფექ ვარენო ვარია ქუწუასჷნი, თელი ქალაქის მოსპენს გვერშაპი, ფერი დიდი რე თინავა. ხენწიფეში ზოჯუათი, თითო ჸუდეშე თითო კოჩი გეგმიჸონეს დო არძა გვერშაპიქ გეჸინტუ. ასე მა ქუმმოჭირინუნი თენა რე, მა ვორექ ხენწიფეში ცირასქუა.

ქიმერთუ ლევანქ, გემკოწყუ ძღაბი, გეშათხორუ დიხა დო თექ ქედნახუნუ.

ლაკვიქ ქუდანწყუ მაჩხუბარო მუში მაჸალეფ:ი კერს უწუ" - სი ზღვა პის გაჩენდია, მუჭო ვარენო ხოლოშა ქუმორთას გვერშაპიქინ, სქანი ჩქვა ქუმკუჸოთი დო ეკი გეკაჸოთია.

თუნთის უწუ: - სი ქუმკუდვი სქანი თათი დო გერს ქაწურაგვე.

- გერი, სი სქანი მანგარი დუდი მიოგი დო ლევანს ქაწუჯგვაჯგვე.

- ლევანი, სი გიაშქვი სქანი ლეკური დო შქას გოჭკირი გვერშაპი. ნამუშვანს დოღურუ გვერშაპინი: - ქირი, სი ქიგიოფურინი დო ვამკიტუე თეში ჭკომი თიში ხორცია, - უწუ ლაკვიქ. ქუდუდოხოდუ არძას ჭკუაშა ლაკვიშ დუნანწყუა სიტყვაქ დო მუჭო თიქ თქუნ, თეში ქიდებარგეს.

ვაიშურთუმუ ბრელი ხანს დო გვერშაპი ქუმოჩურუნს ზღვათ, წყარს ოღურალო ქუმარჩანს. ჭე მაკინუ ხოლოშა დო მიოძახუ გვერშაპიქ: - მუ დო მუ სულიერი კოჩი რექი, მა ხენწიფექ კოჩი მიკომკირუ ბარჯგიშანი, თინაში მუკოწკუმა გაბედია.

- მუ კოჩი ვორექ-და, მა ვორექ ლევანია, - მინაძახუ ლევანქ.

- სი რექ-და, ოკო ქუგოძირე სქანი თოლისერია, - უწუ გვერშაპიქ.

- ქუმოძირანქ-და, ქუმოძირია, - აბა სი დო აბა მავა, - თქუ ლევანქ.

მოლასოფუ გვერშაპიქ გურმულირო დო მუჭო ძგას ეხოლუნი, მუკუდუ კერქ ჩქვა დო გეკაჸოთუ ეკი. გეკაჸოთუნი, თუნთის ქაწუოლუ წოხოლე. თუნთიქ მუკუდუ თათი დო გერს ქაწურაგუ, გერქ მიოგუ დუდი დო ლევანს ქაწუბაზუ. ლევანქ გიაშქუ ლეკური დო შქაბანიას გაჸოთინაფუ. ქირქ ქიგიოფურინუ დო მუთი ხორცი ქუღუდუ გვერშაპისჷნი, არძა ოჭკომუ. თიჯგურა დიდი ქოჸოფედუ თე გვერშაპი ნამუდა, ართი ჟირი საჯენი ქიჸუაფუდუ ზღვა პის ძვალი გეხიბუდუნი. ნამუ შვანს გვერშაპი დოჸვილესჷნი, ე ძღაბიქ გეხარუ დო ლევანს უწუ, დიხაშე გეშეჸონესინი, - ჸუდეშა მოლაზოჯითია.

მოლართეს არძაქ ართო დო ქიმერთეს ხენწიფეში დოხორეშა. ქიგეგეს გვერშაპიში ჸვილუანი, იჸუ დიდი ამბექ. თელი ქალაქიში კათა არძა გახარებული ორდეს დო ლევანს უმარდუდეს. ხენწიფექ ათე მუში ოსურსქუა ჩილო ქიმიათხუ ლვვანს. ორე ლევანი ხენწიფეში დოხორეს დო გილურს ონადირუშა. ათენერო მოკილუ ართი წანაქ.

ლევანქ უწუ კერს, თუნთის ლაკვის დო ქირს:

- მორთი, მიფშვათ დო ქიბძირუათ ჩქიმი და, მუჭორენ დო მუჭო ვარიე.

- ძალამი ჯგირია, - თქუეს დო მიდართეს, ქემერთეს დო ძირესჷნი, ნდიშოთი სენი დუტუნ, თინა დას დუდიშახ ეუშაფუდუ ჩილამურითი, ლევანიში სენიშა შურო ართ ჭვეთი ჩილამური ვეგეუბუმუდუ.

ეწყინუ ლევანს. მარა იშენით ეცოდუ მუში დაქ დო მიდეჯუმუ ხენწიფეში დოხორეშა. ორენა ხენწიფეში დოხორესჷნი, ართიშახ დაქ უწუ ჯიმას:

- მიდამიჸონი დო ქუმოძირი, ღორონდგიე, სი გვერშაპი გიჸვილუნი, თიში ძვალეფი ეკოხიბუ ზღვა პისია, იჩიებუნანი, თინავა.

- ჯგირია - უწუ ჯიმაქ.

მიდეჸონუ დო ქიძირუ გვერშაპიში, ძვალეფი. ძღაბიქ ქემერთუ, გაჯინუ ვიშოთ, აშოთ. უკული ქემერთუ დო ართი ჭიჭე ძვალი გემკოტახუ. ქელედუ თე მიკნატახა ძვალი ჯიბეშა ძღაბიქ დო დირთეს დოხორეშა.

თურმე ათე ართი ძვალს მითი დუდიშა ვარენო მიდვანსჷნი, არძა დუნოღურუე.

დოჭუ ძღაბიქ ბალიში, მიშახალე თე ძვალი ქიმშადუ დო ლევანს ქჷმუღუ საჩუქარო. ლევანქ მუჭო დუდი ქიგედუ თე ბალიშის-დო, ხათე შური გოფარსალუ. ქიგეგუ ქიანაქ ათეჯგურა ჯგირი კოჩიში ღურანი, აკიშაყარეს ირკოჩქ.

ვეზირენქ იჩის ბრელი: - მუ ბღოლათ ათეჯგურა კოჩიში სხეულსია.

ართიქ თქუ: - ჯას ქიგმაბდვათია, მაჟირაქ: - დიხას დოფთხორათია, მასუმაქ: - ოხვამეს ქიმლაბდგათია... მარა ლაკვიქ აკას ვედუჯერუ დო თქუ ნამუდა: კუბოს ქედნუოსვანჯუათ, ნიშის ქედნობდგათ დო ზღვას გილაჩურასია.

დეჯერეს თენა არძაქ. გეგმანწყის ნიში, კუბო, ქენასვანჯეს ღურელი დო გუტეს ზღვაშა. გილაჩურუნს ზღვას ნიში მიკიმიკი ქიანას. წანმოწანაშე ართიშახ ათე ქალაქის ქუმკადირთუდუ. მიდართეს ლაკვიქ, კერქ, გერქ, ქირქ დო ქიმიღეს მასქილიდაფარი წყარი. გეკაჸოთეს ნიში, გონწყეს კუბო დო ქეგნაბეს ლევანს წყარისი, გეთელუ ლევანქ.

ქუმორთეს ხენწიფეში დოხორეშა დო ირ კოჩი გახარებული რე, ლევანი თელი ქოძირესინი. ქიგეგეს, მუჭო დაში მუნანწყუა რდუ ლევანიში ღურანი.

ქუდოხოდეს ვეზირენქ. ართიქ შქვიდაფა გინუჭყვიდუ, მაჟირაქ ტყვიათ ხუალა.

ლაკვიქ ენა ვედეჯერუ. ლაკვიქ თქუ:

- ბუხარს ქიმშუაშენათია, თუდო დაჩხირი ქეთუერზათ დო თიში კუმათ დუვოშქვიდუათია.

თეში ქიმინეს: გაშენეს ბუხარი, ძღაბი ჟი ქიმშაშენეს, სოთინი ვარტნედუნი თეში, თუდო დაჩხირი ქეთურზეს დო დააშქვიდეს.

ლევანი, კერი, გერი, თუნთი, ლაკვი დო ქირი ხენწიფეში დოხორეს ცხოვრენდეს დიდებულო, ირ კოჩი გახარებული ორდუ დო მადლობელი ლევანიში მუში ჯგირი კოჩანაშენი, ჯგირიში ქიმინუაშენი.