13. ორქოშ თომამ ძღაბიშ არიკი

teiHeader

ორე ართი დედიბი დო ბადიდი. თენენქ დირჩინუ დო სქუა ვოუხედეს. ბოლოს გეურჩქინდეს ართ ოსურსქუაქ. თენა მიშუხენა სერით შქვილერი ბანბეშა დო ლოგინიშა გილუხენა, დღაშით მუთუნს ვაქიმინაფუანა - სერით ჯანჷ, დღაშით თეშ გილახე ლოგინს. აქ დიდა დო მუმა მუშენს. მუმა მუკორე ჸვანას, ხაჩქუნს, ობარგუს მუკორე. ათე დედიბიქ სადილი გა̄კეთუ დო მეუღჷ კარაჩხათ სადილი. ათაურე წისქვილიშ მაშორას ქა̄ფჷ მუშ ჸუდეშე. ათე შქა დო თიშქას წყარი ვარე მინალჷ. ქჷმაჸუმენ თე ოსურს. ჩხოუშ კუჩხიშ დინნაბიჯგეფ ვარენო შარას, ათეს წყარი დინოდგჷ, გეუჭირინუ̄ დო გეშჷ თენა თე ოსურქ. გეშუნ, ჩხოუო გინი̄რთჷ, უჩა ჩხოუთ, თე ოსურქ. არექ ჩხოუთ გინი̄რთჷ, მარა კოჩიშ ჭკუა უღუნ დო ათულუ̄ქა დო კარაჩხა მიდედჷ; ქიმერთჷ ღობერიშა დო ართი ქიმიოღვარუ̄.

- აშ, აშ, ღობერი ვაგომიტახა, მეუ იშოვა, - დუ̄ძახჷ ბადიდიქ.

ათულუ̄ ქა დო ჟი ჯგუნს ქჷმკაბუმუ̄ კარაჩხა ჩხოუქ. ჭკუა ვოუღუნო კოჩიში! თე ბადიდის ქჷმა̄შქირენ აწ დო ამარი გილართა ქორენ დო, გედირთჷ: - "ღობერიშა ქემურქ, დაბა თი ჩხუ ღვარანდჷნ, აშო ვამჷნოტახუკოვა!"ქემერთუნ, კარაჩხა ქოძირჷ.

- საწყალ ოსურს კარაჩხა ქუმუღალუნ დო მუს იშო მიდურთუმუნია, - იფიქრჷ.

ოჭკომჷ თექ სადილი თაქ. სადილი ვარი, ოსერშე ქო რე ანწი მოხოლებული. გეჭოფჷ კარაჩხა, ათულუ̄ბერგი დო მოლართჷ ჸუდეშა. ათე ღობერწკჷმა ღვარანდჷ ჩხოუნ, თინა მუშ ოზეშ კარს ქიგეჯანუნ, ქოძირჷ.

- აშ, აშია, - უწუ̄ დო ჭინჷთ იშო ქა̄რაჸჷ.

გაჯჷ კარინ, მუშ წოხოლე გიმნირულჷ ე ჩხოუქ ოზეშა. და̄ჭყჷ თე კოჩქ ულა დო ჩხოუ წოხოლე აწოთხოზჷნ თეში, ჸუდეკარიშა ქიმერთჷ ჩხოუქ დო სუმიშახ ქიმიოდვარუ̄. დი̄რთჷ თე აბარწას თე ჩხოუქ სუმიშა დო ოშე ქა̄შენჯირჷ. ხე ქჷგა̄იჯჷ ბადიდიქ კარს დო კითხჷ ძღაბის: - სო რე სქანი დიდავა?

ჩქიმი დიდას სადილ მეიღუნ უკული ვამურთუმუნია, - უწუ̄ ძღაბიქ. იახან, ასე თეკოჩქ, ვაუჩუო გური, მუჭო თე ჩხოუ მუდგარენ შხვანერი ენ. ე ძღაბი კაბეტი რე ანწ დო მუთუნ ვაუქიმინჷ დღას. გილაჸუნს თე ჩხუ ოდიარეშა დო არზენს ჯგჷრ-ჯგჷრ ოდიარეს. უწი̄ ოსურენქ თე კოს:

- სი აშ ვერგჷქ, სქანი ძღაბიქ ოკო გილეჸონას ე ჩხოუ ოდიარეშა, ჸუდეს კოჩი ვარჸუნს დო ქირხი̄ ოსურია. ვარია თქუ̄ ე კოჩქ, მარა ვადუჯერეს დო ქიმიჸონჷ ართი ოსური, ძღაბი მოჸუნსჷნ ფერი. თაქ ვადოხვადუო ართ ძღაბიქ? თის ქიმიანწყჷ თე ოსურქ დო უოაგადჷ საჸალეს თე ძღაბის, ჩხოუო რე გინორთელი თე ოსურიშ სქუას. ქიმეჩანს ათე ძღაბის მონტყორს დო ოჭკომალო მეჩანს ჟირი კვერს - ართი ოკო ოჭკომას, მაჟია კჷნი აშო ოკო ქიმიღას. ქოთი ოკო დოთუხას, ქოთი ოკო დოზუას დო ქოთი ირფელი ოკო ქოღოლას თე მონტყორს.

მუჭო ღოლას ე ძღაბიქ თესჷნ, ვო უჩქჷ. იგარს დო წუხენსჷნი, დიდაქ ქემეხვარჷ, ქაჩამაფუ̄ გური დო პიჯიშა ქიმლედჷ მონტყორი, დოლაგუ დო შილო გეკა̄ჸოთჷ აშო. უკული დანახვაფუ̄ დო ქჷმორთჷ ჸუდშა ენა სქჷრაფილო, ირფელამო ქჷმორთჷ. ათე ძღაბი მეურს შარას დო მეთუხუნს ჩერიათ მონტყორსჷნ, ართ ინჭაწკჷმა გამოლჷ წყურიშიქ დო იშო ქენოლჷ. დინა̄ჯინუ̄ო, ართი დედიბი ქენოხე. ურაგადჷ მორიდებულო:

- დედავა, თი წყურიში აშო ქომუჩია, სქანი ჭირია.

- მავა რჩინ ვორექ, ნანავა, დო სი ქჷმორთი დო გეშეღია, - უწუ̄ ათე დედიბი ინოხენ თექ. ინი̄ლჷ თე ძღაბიქ წყურიშიშ ეშაღალჷშა.

- აკა, ნანაგე, დუს ქოშმოჯინია, - უწუ ძღაბის დედიბიქ. ქაშა̄ჯინჷ დო თქუ̄: - დითა საყვარელია, სქანი მახელა დედიბის მუ სუფთა დუდი ნორღვენია, უწუ̄ (ჩინჩიშ ეფშა აფუდჷ დუდი, მარა იშენ თაშ უწუ̄).

- ჯგირია, ნანავა, აკა ეთექ დერგიშ ჸვალი კინოდგჷნ, ქჷგომჯინია თიშავა, - უწუ̄.

ქიმერთჷ დო ქჷგა̄ჯინჷ ე ძღაბიქჷნ, ართო მუნტურის გოფსა ქორე.

- უი, შური საყვარელია, მუშ მასქვამა ჸვალი გიზირუნია! აკა ხალირი ღუმუ ქომუჩანიე, მუშ მაჯგირას ოპჭკუმუნდი თესია.

იახან, ეშე ეშელჷ თე ძღაბიქ, - მეუა, ნანავა - უწუ̄ დედიბიქ, - წყარეფი არხვადჷნიე, არძას ელულევა დო ართია ოქროშ ფერი წყარი არხვადჷნიე, თის დუდი ეთულევა, დაბა უკული მუ ძირევე.

ქიმერთჷ ათე ძღაბიქ დო არძა წყარეფი მიკი̄შქუ დო ათე ოქროშ წყარს ეშულუ̄ დუდინ, ოქროშ თომაქ ქა̄ჩანუ.

მოლართჷ ასენ, ეშ მაგირძა თომა მუნერო ფუბლავა მადო, იუკა გამკინწყუ დო თით გოჯვანჯვილო ქჷმორთჷ ჸუდშა. აკა კაკალი თომა გაითორჩქინენ დო ქოძირჷ დიდაჸონერქ.

- უი, სი მიქ მერჩჷ ენავა. აჯღვაბუ დო ეშე გეიოსოფუ ენა. დუს გა̄კირუნ, ექ გოლჷ დო გეგლაშქვართუ თომაქ.

- სი მუშო გოკონიავა? ქიმი̄დჷ მარგატელი დო ჯინს ქიმიოღაჭჷ.

- ჩქიმი ცოდა უღუდას, ინა მა მუჩუე, მა მუშო მოკოდჷ ინავა, - თქუ̄ ძღაბიქ.

გოღაჭჷ ე თომან, კჷნი უჯგუშიქ მა̄რდუ. უწუ̄ დიდა-ჸონერქ:

- მიდეჸონი თე ძღაბი დო მუჭო სი ქიმინინ თეშ, თეს ხოლო ქაღოლინაფე ვარა ცოცხალს ვამ(ჷ)გაშქვა აშოვა.

- ინა ჭე გურამი ქორენ დო ეგებ ვემიქცას თეშ, მუჭოთ საჭირო რენიე.

- მეუ, მიდეჸონია! - დო მიდართეს ჟირხოლოქ. მეუღჷ თეს ხოლო ჩერია დო წყურიში იშო ქენა̄ჸოთჷ თე ინჭას ძალით, დინა̄ჯინუ დო უწუ̄ დედიბის:

- აშო ქომუ, დედიბი, მუჭო დინოჩვაგუქიე, თი წყურიშია!

- აშო ინი̄ლჷ, ნანა, სი, მა ვეშემლებჷ ედგინავა დო სი გეშეღია. ინი̄ლჷ ძღაბიქ, დიდა-ჸონერიშ სქუაქ.

- მორთი, ნანაგე, დო აკა დუს ქიშმოჯინია, უწუ̄ დედიბიქ.

- ტფუ, სქანი ოსურობას, მუ ორე დუდი ართო ჩინჩის ეფსა გაფუნიე?

- ჯგირი, ნანა, ჯგირია! აბა ასე აკა თი დერგიშა ქენომჯინია, - უწუ̄.

ქემერთჷ ძღაბიქჷნ, იშო ქენაფურტინუ.

- ჸვალი მიქ მირჩჷ სია, ენა მუნტურიშ ეფშა რენია, ართო უგვარგუასია, - უწუ̄.

- ჯგირი, ნანა, ჯგირია. აბა, მა მუჭო გიწინქინ, თეშ ქიმინია. მეუა დო მუთ წყარეფი აიხვადჷნ, არძას ელულე დო ვირიშ წყარიშა ქემერთე, თის ეულე დუდია.

მოლაოთჷ ძღაბიქ დო თაშ ქოქიმინუნჷ, ვირიშ საონჯღოროქ ვაგეურთუო დუს!

და̄ჭყეს ულა დო ქიმერთეს ჸუდეშა. მიოჯინუნ, ქოძირჷ დიდაქ, მუჭო ჩხოუშ სქუას კჷნი მორდუ̄ მუშ ოქროშ რომა დო მუშ ოსურსქუას ვირიშ საონჯღორო ქეკა̄ბუ. მოუნჭჷ ე ოსურქ დო მუთ გიაშქვინედჷნ, თინა ქიგიასქუ ე ოქროს თომამ ძღაბის.

- ჯიმა ღურელი, მა მუ ბრალი მიღუნია, მუქ ვაუწუა ჯგჷროვა დო მა მუ შქას ვორექია.

ქჷდელახუ̄ თე ოსურქ დუდი. გიაკითხუ̄ ქომონჩქ: - მუ ამბე, მუშა რე საქმევა?

- სქანი ჩხოუ დოჸვილი დო თიში გური დო ჩხონჩხი ოკო ქოფჩევე, ვარა ჩქიმი მუკოსქილადა ვეჸი̄ნია, - თაშ იჩიებჷ მაკითხევა, რაგადუ̄ ოსურქ.

ბოლოს ქიმიორინუ̄ უბედურება დო დოჸვილჷ თე ჩხუ. მარა, სონდარო ჸვილუნდესჷნ, თეიშახ უწუ̄ ჩხოუქ თე ძღაბის, მუშ სქუას:

- სია ჩქიმი დუდი, კუჩხეფი დო ტყები მოლეღია დო საფულე, და̄თხორაფევა მუასქანსია დო თექ ქენანწყი̄ თენეფ ირფელია. ირო მუმაკითხე, მავა, სი ძალამი ცხოვრება აწორძჷნია, ხოლოთია სი გიჩქუნია.

თანაფაქ გოითანდჷ ჯგჷრო დო ათე თანაფას ირფელი მუშუშ რიგო ოკო ქოღოლას თე ძღაბიქ. დიდა-ჸონერქ დუჩინჷ: - ქუმუ ქუმუო გაიშანწყი̄ დო ღუმუ ღუმუო გაგმანწყია. ირფელი ართო მუშუშ რიგო ქჷდმოხვამილევა, ვარა სქანი უჩა დღავა.

მოლართჷ ე ძღაბიქ ნგარებულო დიდაშა. დიდაქ ქჷდა̄გურუ̄, მუჭო ქიმინუკონ: - სქანი ბიცოლენს ქემუღია ენეფია დო თინეფი გაიშანწონანია, ოჭვალს დაიხაზჷრენან დო საწბელს დაგიმზადენანია. ათენეფი ირფელი დაამზადია დო უკული ჩქიმდა ქჷმორთია. ღუმუა ჟი ქჷმკობუდას თეშია, დოკჷლე კარია დო ჩქიმდა ქჷმორნა, ირფელს მა მერჩანქია დო წირვაშა გოიტალენქია.

მიდართჷ ძღაბიქ დო ირფელი გა̄კეთჷნ, ქჷმორთჷ კჷნი დიდაშა. გაგმან წყუ̄ ირფელ ოქროში ტანისამოსით დო რაშის ქიგიოხუნუ დო გუ̄ტუ̄ წირვაშა. ორე თექ ამსერი, ხენწჷფეში სქუა რე მულირი ოსურიშ მაგორალი. ეხერხებჷ თესჷნ ფერ ოსურსქუაქ ვეშუ̄ დედამიწას.

კუჩხის ორქოშ მაშაია, თეს ოსქუნ, თი ბარგი ქჷმკაქუნუ დო გუ̄ტუ̄ წირუაშან, უწუ̄: - მინილე, დინახლენ, პირჯვარი დეწერია, მარდი გინაგია, აშო მიკილევე, ართი მაშაია კარ გჷმოლჷს ქიდი̄ტევა დო კჷნი ქჷმორთი აშო ჩქიმდავა, - უწუ̄.

და̄ჭყჷ ულა თე ძღაბიქ დო მუჭო უწუ̄ დიდაქჷნ თეში, ართი მაშაია თექ ქჷდი̄ტუ̄ დო ქჷმორთჷ მუში დიდაშა.

- ართი მაშაია ხენწჷფეშ სქუას გეუჭოფუნ დო გორუნსია, ნამდგა ცირას მა̄ლე თენავე. - დიდაქ, უწუ̄: - ინა მოლურსია აშოვა დო ჸუდშა ქუმულანია; სია კალათის ქიმთგოხვილანანიე, ხენწჷფეში სქუა თი კალარის ქიგედოსოდუნია; სია ლიში ქაძგვიტაფე თუდოშევა დო კალარის გამნგოწყუნანიე, ვაქორძირუნანიავო? მაშაიას ქჷმგოზჷმუანანიე, სქანი კუჩხიშ იჸი̄ნია დო ხენწჷფეშ ოსური იჸი̄ქ სია.

ანწ გილურს ნასადილს ხენწჷფეშ სქუა დო ეკოჸუნს ბრელი კათა, თე მაშაია მიდგას მა̄ლე ცირასქუასჷნ, თეშ ოგორუშა. თე ძღაბის დასურო ქჷმნა̄ხუ̄ე ოსურქ კალათი დო მუში ოსურსქუა გჷმონწყილო ქედახვამილუ̄ ხენწჷფეშ სქუას. მა̄ზიმუ̄ ე ოსურქ მუშ ოსურ-სქუას ოქროშ მაშაია, მარა მუთუნ ნერო ვამურთჷ; კალათის ვეგედოხოდუო თე ხენწჷფეშ სქუაქჷნ, თუდოხშე ლიში გაძგვიტაფუ̄ დო გეიოლჷ ბოშიქ. ძირესჷნ, ძღაბი ქიმთოხე. გაითიჸონეს დო მა̄ზიმეს მაშაიან, გვალო თეშ კუჩხიშიქ იჸუ̄.

- თენა ჸოფე ჩქიმი ბედია, - თქუ̄ ბოშიქ.

- ენა ჩხოუშ სქუა მუ ნერო იჸი̄ სქანი ოსურია?

- ჩხოუშ სქუა რენო, მუდგა რენ, თენა ჸოფე ბედია, - დო მეუკინჷ ბოშიქ.

- ტანისამოსის მიბღა მა დო იპონანქია, - თქუნ. - მა მიღჷ ირფელი მუკაქუნალია! - მოლართჷ დო მუთ წირუას მუკა̄ქუნდჷნ, თინეფი ქიმკიქუნ ირფელი დო თეშ მიდეჸონჷ - ირფელი ოქრულობა რე მუკაქუნსჷნ, ვარა ახრებული ენო? მუშ რაშის გეხენ დო თეშ. დო ძღაბი მიდეჸონჷ დო ჸუნს ი კოს თექ. ონ ძღაბიქ ძიმეთ ქიჸუ̄, ძღაბიქ ძიმეთ ქიჸუ̄ნ, ბოშის ქჷმოხვადჷ სადლათუაქ. ძღაბიქ ძიმეთ ქჷდოსქიდჷ დო ბოშიქ მიდართჷ სადლათო. ბოშიქ და̄ბარუ შური დო გურით მუშ დიდა დო მუმას თე ძღაბი. ჭარილო ქუდუტუ̄ ვეზირს ირფელი. მუჟანს ქჷმორთჷ დროქჷნ, გუ̄ტუ̄ ხენწჷფექ მუში ვეზირი ბოშიშა დო მიდაჸუნუ̄ ნაჭარა. ქეკა̄სერჷ ვეზირს თე ძღაბიშ ჸუდეს.

- სერი გჷმოთანაფერია.

- ჯგჷრია, - დო მინაშქვეს.

ქიდი̄ირჷ ექ დო ლურსჷნ, თე ოსურქ დულუ ჯიბე დო ქაღარდი ქოძირჷ. წ, კითხუნ, ენა დოსოფჷ დო შხვა დოჭარჷ დო ქიმშადჷ. ითამ დიდა დო მუმას უჭარუდას თეშ გაგმუნწყუ̄ თე მაზაკვალ ოსურს, ნამდა - ენა ჩხოუშ სქუა ჸოფე, თეჯგუა ჸოფე, თენერია დო მუ შქას რეთ ართიანწკჷმა სი დო ენავა!

- მუდგაშ სქუა რდას, ჩქიმი ბედი თინა რენ დო ჩქიმი მეულაშა თექ ქორდას, ჯგჷრო ქეშემნახითია. - ჭარუნს სქუა.

მოლეღჷ ქარღადი ხენწჷფეშა ვეზირქ. ოსურქ ქიკითხჷ ვეზირიშე ანდრესი, - ჩქიმი სქუა სქიდჷნ, მა თექ ოკო ვორდევე - დო სქჷლადას ქომორთჷ. თეს მიანებეს ოსქჷლადარო. ქა̄სუ̄ ჟირ ქომოლსქუაქჷნი, ჟირხოლო წყარს ქინა̄ჸოთჷ დო ჟირი ლაკვი ქიმეუხუნუ̄ ძღაბის. ენა ვაუჩქჷ ხენწჷფე დო მუშ ჩილს. ე ძღაბი ორწყე ეს, მარა ვაარაგადენ დო მუ ქიმინას. მინი̄ლჷ ე ოსურქ ხენწჷფეშა დო მუშ ოსურიშა დო უწუ̄:

- მომიხვამუნია, სქანი ნოსასია ჟირ თოლ უხუ ლაკვიქ ქაშუა.

- მუდგა რდასია, ჩქიმი სქუაშ ბედი თინა რენია დო ოქროცალო მიბღენთია.

ქიმეჭარეს ნაჭარა სქუას. შარას გისერუ̄ ვეზირქ კჷნი თი ოსურიშ ჸუდეს. სქუაშ ნაჭარა ქაღარდი დოსოფჷ ე ოსურქ დო დოუჭარჷ შხვა, სქუა ჭარუნდას თეშ:

- ხელეფი დუჸიჭკჷმა მეკვათითია, დო გეგმაჸოთით, ვამოძირათ ჩქიმი ოსურია, - ჭარუნს ბოში.

ინარღეს ბრელი ხენწჷფე დო მუშ ოსურქ, მარა მუ ქიმინან? შეასრულეს ბოშიშ სიტყვა დო გუ̄ტეს ე ძღაბი.

მეურს შარას დო ხაბურზაკის ჭკომუნს ართ დიხას სერ-სერით, ქჷდუდირთეს მუკ-მუკი̄ დო დუყარაულეს თოფამ კათენქ. კურგომ ქუგუდირთესჷნ, მუდგაქიენ დუდი ქიმნირაგუ̄ ოხაბურზაკეშა დო დუძახეს - მინ ორექჷნ, ქოთქვი ვარა, დორჸვილუნთია.

- მა ვორექია, - უწუ̄ ძღაბიქ.

ქჷმორთეს დო კირხეს: - მინ ორექ სი, მუქ გაღოლჷ?

ათაშიე ჩქიმი საქმე, ათაში, ათაშ მაღოლჷ, ათაშ მაღოლუა. მეუკირთი ჸუდეშა მარა, ვედჷ ექ. ქიდი̄ტეს თექ დო ფეშერს ქეშენჯირჷ ე ძღაბიქ.

გედირთჷ მაჟია დღას დო მეურსჷნ, სუმი ოსური ქჷმულან, ქოძირჷ. ათაშიე ჩქიმი საქმევა დო ვაიჩქუნანიავო მუთუნია, - უწუ̄.

წოხოლე მურსჷნ, თიქ უწუ - უკახალენ ოსურს ქოკითხი დო თინა ქოიწინსია, - უწუ̄.

- წყარი მეურსჷნ, თის ეშულევა დო ხე ქჷგაშინია.

ეშულუ̄ ხე დო ჟირხოლოქ გეთელჷ.

ეზმა ხანს თეშ და-ჸონერი ვარდუო რდჷნ, თინა ქიმეჩჷ მაზაკვალ ოსურქ ქომონს, თი ბოშის. ათე ბაღანეფი ვენაჸოთუო თე ოსურქ წყარს? თენეფი წისქვილიშა ქემკუხინჯუნ დო მეწისქვილეს გეშუჸონაფჷ.

დედიბი დო ბადიდი ჸოფენა თენეფი დო უსქე; მურდჷნა თე ბაღანეფიმუჭო შვენუნა თენენსჷნ, თეშ, ნაბონა წყარი ოქროთ გინმირთუნ დო ოქროთ გინოჭკადილიენა გვალო ართო.

ასე ბოლო-ბოლოს უკული, ათე მეწისქვილეშა ქჷმოხვადჷ თე ოსურს მულაქ. ირფელი ქეჩუ̄ თე მეწისქვილეს. მეწისქვილექ ირფელი იშო ქაწურუ̄ თეს-მუჭო ჟირი ბაღანეფი წყარიშე ეშეჸონჷ დო დედიბი დო ბადიდის მეჩჷნ. და̄ჭყჷ ულა თე ოსურქ დო ქიმერთჷ რექ. ბაღანეფი ქენორე თაქ ოქროჯგუა.

- თქვა დიდა დო მუმა დო მა სქუავა. ჩქიმი სქუალეფი თქვანწკჷმა ჸოფფენია დო მუნერო აღოლჷ, მუნერო ვარინ, ირფელი ქუჩიებინჷ.

მი̄ღეს ე ოსური ე დედიბი დო ბადიდიქ ოდო, მუჭო სქუან თეშ. ირფელი ოქროთ რე ეშაჭკადილი. ინჭაში ჯაჭვი ხოლო ოქრო რენი, თეშ ირფელი. ამდღა ეჩშა ბონან ბაღანეფინ, ირო ოქრო აშაცენს დო მუშე ვაქიმინუნს ეს?

ათე ძღაბიშ ქომონჩქ ვემიჸონუო მუში ოსურიშ და-ჸონერი? ვოუჸორს ეს ე ოსური დო მიდართჷ ოგორუშა, მუში დინაფილი ოსურიშა. ბრელი ხანიშ უკული ქიმერთჷ ართ დიხაშა, ირფელი ოქრო რენ ფერ ჸუდესა. წოხოლე ჟირი ბაღანა ქიმწილაჸაფჷ, ოქროშ ბურთი ქუღუნა.

- აკა წყარი ქოფჩითია, - უწუ̄ ბაღანეფს.

მიდართეს დო ოქროშ ჭირქათ წყარი ქოჩჷ. წყარი გ,შჷ თე ბოშიქ დო მუშ სახელი დო გვარი გეჭარუნ ფერ ბეჭედი ქედნაჸოთჷ ოქროშ ჭირქას დო უწუ ბაღანენს: ათენა ქემუღით თქვანი დიდასია.

ქოძირჷ ოსურქ თე ბეჭედინ, - იდუ, ნანა, თი კოჩქია?

- ემერი ენია. მერთჷ ე ოსურქ დო ძირეს ართიანინ, ვაქიჩინესო? ექ აურე იგარჷ, იქ თეურე იგარჷ. მეთხჷ ხე დო გემნიჸუნჷ იშო დო, მუჭო ჩილ დო ქომონჯი გიძირუნ თეშ, გეუნწყჷ ირფელი. დაჭყჷ ულა თი ბოშიქ დო მიდართჷ კჷნი მუშჸუდეშა დო მუშ ოსურიშ დიდა - ჸონერი დო თიში ოსურსქუა ჟირხოლო ქაკა̄კირჷ რაშიშ კუდელს, გოუტუ გინაკვათა თხირიშ არდგილს დო თექ აკოქექჷ ინეფი, ქიმიჸონჷ მუშ ჩილი დო სქუალეფი, დო დუმა თექ ვორდი, ამსერი თაქ ვორექ.