Ein reudig schaaf macht ein gantze herd reudig.
Claudi uicinus, subclaudicare disces.

Ein faul ey verderbt einn gantzen kůchen.

Ein Narr macht zehen. Ein schalck macht den andern. Bei frommen leuten lernt mann frommkeyt. Bei krummen lernt mann hincken. Mit den frommen wirt mann fromm. Bei vollen lernt mann sauffen / Bei krämern kauffen. Böß geschwetz verderbt gůte sitten. Wer mit Katzen jagt / der fahet gern meuß. Wer mit hůrn zu acker geht / der egt mit gecken zů.

Wer sich vnder die kleien mischt / den fressen die sew.

Dum spectant oculi læsos, læduntur & ipsi. Bei statzlern lernt man gautzen. Ein böß aug verderbt das ander. Die sitten lernt mann von den die vmb vns sein. Wie nun etlich mängel ein leib vom andern empfahet / also mittheylt ein böß gemüt sein übel seinn nachbaurn.