Darnach es fellt.
Gladiator in arena consilium capit.

Wer recht beicht / dem gibt mann rechte büß. Wann die zeit kompt / so wöllen wir daruon reden. Darnach es mich ansihet / darnach thů ich. Was mich der marckt leret. Es seind etlich ding die lassen sich nit vor bedencken / oder berathschlagen / sonder nin der that můß man erst den rath fassen / Als so einer mit eim rennen / stechen / oder ringen wil / weyß keiner wie jhm der ander begegnen wirt / Oder ein artzt /was er dem krancken eingeben soll / biß er den brunnen vnn schaden sihet / den puls greiffet / darauß schöpffet er rath vnd sein Judicium. Wann wir dahin kommen / wöllen wir daruon reden / Es laßt sich ietz nicht anschlagen / Sihe vnn sag / Greiffe vnd red /Man můß sich in die zeit schicken / vnn nach der zeit den rath fassen oder ändern. Die that wirt den rath mit sich bringen.