Wer Gott zu freund hat / dem schadet kein creatur.
Es ist besser alle welt zürne / vnnd Gott sei vnser freundt / dann daß Gott zürne / vnd alle welt sei vnser freundt. Der welt freundschafft hilfft allein / weil es vns wolgehet / aber in der not kan sie nit helffen. Gott aber hilfft allein in der not / in leiden vnd sterben /vnd ist der recht trewe nothelffer. Psalm. xcj. Der da wonet vnder dem schirm Gottes / der wirt im schirm des höchsten sanfft rühen. Es wirt dir kein vbels begegnen / vnnd kein plag wirt sich zu deiner hütten nahen. Esaias sagt / Wer wil Gottes willen widerstehn: Psalm. cxlnij. Wol dem volck das Gott zum Herzen hat. Roman. x. Wer wil vns absündern / daß vns Gott in Christo nit lieben solt: weder schwerdt /noch verfolgung / etc. Psal. v. Ich förcht mich nit vor hundert tausent / dann der Herr ist bei mir. Die Egypter schrien im Roten meer / Laßt vns fliehen / denn Gott streitet für Israel. Die natürliche erfarunge zeuget diß auch von Gott / Nemlich / daß Got kein leyd denen widerfaren läßt / welche er lieb hat. Widerumb / daß Gott denen feindt sei / vnnd sie straffe / welche sich auff jre stercke verlassen / denn sie seind vor jm wie ein staub. Also ist geschehen den Risen / da die Heyden [3] von sagen / die einn berg vff den andern trůgē / Got auß dē himel zustossen / die Gott mit dem donner aller erschlagē hat. Also můste zuruck gehn das fürnemen Nimroths / vnn seiner genossen / da sie den thurn in Babylonien bawen woltē. Also ist könig Pharao gestrafft worden. Also seind alle königreich allein auß Gottes krafft zerstöret worden / als Assyrien /Persen / Meden / vnn sonderlich der Römer. Also seind mechtige könig jres lands veriagt / vnd geschlagen worden. Die Christlich kirch / ein kleins heuflin /weil sie Got zū freund gehabt hat / ist bliebē. Abel lebt / Cain ist todt. Israel lebet / Pharao ist tod. Elias lebt / Baals priester sind tod. Joannes d' täuffer Christi lebt / Herodes ist tod. Christus lebt / Judas / Annas / Caiphas / sind todt / Dann diser aller freūd ist Got gewesen / vnd der andern feindt vnd straffer.