Wann mann eim einn finger beut / wil er die faust gar haben.
Post folia cadunt & arbores.

Lassest dir vff die achseln sitzen / so sitzt mann dir gar auff den kopff. Wann mann den Teufel in die kirchen laßt kommen / so wil er gar auff den altar. Nach den blettern fallen die bäum. Gedult sigt / das ist war vnnd der rechte sig vor Gott / aber nit hie / sonder den gedultigen nimpt mann alles das sie habenn / heyßt sie narren / vnd gůte leut / vnd wil jederman an jn geritten / zum ritter werden. Laßt jm einer den mantel nemen / mann nimpt jhm bald den rock darzů. Im bart grasen / Mann hofiert jhm bald gar auffs maul. Ein Lantz knecht nam eim Mönch ein kutten / der lidts mit gedult / appelliert alleyn für das jüngst gericht. Der Lantzknecht sprach: Harr wilt du mir borgen biß an den jüngsten tag / so gib mir den rock darzů. Christus hat mit gedult vor Gott gesig / Pilatus / Julius Tiberius / Herodes / mit gewaltiger faust vor der welt. Wer den andern überbösen / vnd inn sack schiebenkan / der ist meister. Wer baß mag / der thůt baß. Gewalt geht für recht. Gedult aber lädt gewalt zu hauß Lassest du dir auff die achseln sitzen / mann nist dir bald auff den kopff.

Wann mann dem Teuffel eins nachgibt / so wil er das ander auch haben / Laßt mann jn in die kirchen /er hat kein růw biß er auff den [49] altar kompt / Gibst jm nur einn bösen gedancken nach / er hat halb gewunnen / Er steigt in den tempel deines hertzens auff Gottes altar / vnnd wil da sein Meß lesen. Leidstu daß dich einer fasse / so leide daß er dich auff den boden werff / darumb sol mann dem feind weren.

Lesche bei zeit / ehe das fewr zum tach hinauß schlag. Lassest einn ins hauß / er kompt bald in die stuben. Vnnd wer sigen wil vor der welt / der wehre sich bei zeit / Dann bald angerennt ist halb gefochten.