Der Siben Weisen in Grecia Sprichwörter / In Rheimen gestelt. Auß dem Spil Chasparis Brusch ij.

Der Erst.

Solon von Athen.

Sprich niemand selig vor seim end /
Vnglück kompt vnuersehens bhend.
Vnd wiltu leut zusamen gebn /
Gib gleich vnd gleich zusamen ebn.
Denn gleich vnd gleich vereint sich wol /
Sonst ists vnraths vnd jamers vol.
Einn gůten freund straff du alleyn /
Wilt loben in / thůs vor der gmeyn.
Edel geborn ein schlechtes ist /
Tugent adelt zu aller frist.
Wer sich kümmert eins übels hart /
Das doch sein můß / derselbig narrt.
Doch ist der noch vil thorechter /
Der sich im vnglück förchtet sehr.
Vertraw nit leichtlich iederman /
Du wissest denn vor was er kan.
Wer lügen reden darff / vnd kan /
Der darff gwiß alles anders than.
Für bösen leuten hüte dich /
Denck nit / daß etwas bleib heymlich:
Gott weyß vnd sihet alle ding /
Wie klein vnd gring sichs auch anfieng.
Wider die Göttlich Maiestet /
Nichts args bei leib vnd leben redt.
Wem Gott schutz helt / der bleibet wol /
Wer auch die gantz welt krieges vol.
Noch hab ich einen spruch gefürt /
Der billich zu den andern ghört /
Den wil ich euch auch hören lan:
Bedencks end / das ist wolgethan.
Denns leben hie auff diser erd /
Gewißlich ists / nit ewig werdt.
Wir müssen sterben allzumal /
Wir hie / vnd andre überal.
Drumb wer nun wol vnd seliglich
Gestorben wer / vnd hette sich
Gethan von disem jamerthal /
Zur ausserwelten Engeln zal.
Dem wer am besten / Hie auff erdn
Wirt vnd kan es nicht besser werdn.
Wolan jr habt mich wol gehort /
Lebt wol vnd volget meinem wort.
[385]
Es ist nit gnůg / daß mann hör vil /
Wers thůt / der trifft das rechte zil.

II.

Thales von Mileto.

In aller sünd vnd missethat /
Dich selbs am meysten förcht / gerad.
Als werestu selbs richter / der
Dich straffen würde nach der schwer.
Das lebn ist ein vergengklich ding /
Es hat sein end / wie sichs anfieng.
Zucht aber / tugent / ehr vnd rhům /
Bleibt ewig in seim eygenthumb.
Nichts nützers hie auff erden ist /
Dann halte maß zu aller frist.
Denn bald mann jm zu vile thůt /
Bringt es kein frommen / noch kein gůt.
Gott nit alleyn sicht / was du thůst /
Sonder was du auch denckest sust.
Befleiß dich nit auff schöne gstalt /
Sondern daß dein hertz schon sei gmalt.
Sich lernen selbs erkennen wol /
Ist warlich müh vnd arbeyt vol.
Was du an andern tadeln thůst /
Sich / daß auch dich des selbn nicht glust.
Wie du gegen deim vatter dich
Erzeygst vnd heltst / so werden sich
Auch deine kinder gegen dir
Verhalten / das glaub endtlich mir.
Alt leut die aller ehren werdt /
Solln allzeit von dir werden geehat.
Wer sein Oberkeyt in ehren hat /
Der ehrt Gott selbs. Drumb ist mein rath
Mann thů jr gůtes / als mann sol /
Dasselb gfellt Gott im himel wol.
Noch hab ich einen spruch / dem solt
Ihr warlich sein von hertzen holdt.
Der laut also: Wilt schadloß sein /
Vnd bleiben bei ehr vnd gütern dein /
So hüt dich / daß du für iemand
Versprechest was mit deiner hand.
Gott gsegen euch jr lieben herrn /
Halt glerte leut vnd künst in ehrn.
Kein höher schmuck auff erden ist /
Glaubt mir / ich sags on allen list /
Denn wer für andern etwas kan /
Den mag mann nenn einn Edelman.
Damit kan mann sich auch mit ehrn /
Auffrichtig vnd gar leicht ernern.

III.

Chilon von Lacedemon.

So weng sich ein geringer man /
Für mir darff förchtens vnderstan /
So wenig sol auch der jhenig /
So mächtig ist / verachten mich.
Hastu eim lieb vnd dienst gethon /
So rhüm dichs nit / vergißes schon.
[386]
Gott stürtzt was hoch auff erden ist /
Erhebt nidrigs zu aller frist.
Ein lester maul das vmb sich beißt /
Schadt jme selbs am allermeist.
Dann es auch můß einnemen wort /
Die es gewiß nit geren hort.
Eim todten übel reden nach /
Ist über dmaß ein grosse schmach.
Das gold probiert mann an eim steyn /
Des menschen hertz am golde reyn.
Hüt dich / vnd sih allzeit für dich /
Daß nit dein zung vorn sinnen flieg.
Dann reden (sagt mann) vnbedacht /
Hat leuten gar bald schaden bracht.
Betrüglichs lästern / wort verkern /
Schendt manchen man an leib vnd ehrn.
Ein lästerzung / ist nicht ein zung /
Was denn ein schwert vnd schlange jung.
Mein liebster spruch ist diser gewest /
Lern kennen dich selbst auff das best.
Behüt euch Gott / ich far daruan /
Vil klůgheyt habt jr ghöret an.
Wer nun rechtschaffen klůg wil sein /
Beweiß es nit mit wortn allein.
Sonder beweiß es mit der that /
Die leer ist herrn Chilonis rath.

IIII.

Bias von Prienen.

Avff erden ist kein edler haab /
Denn daß mann gůts gewissen hab.
Das gröste vnglück das da kan
Auff erd einn menschen übergan /
Ist dises / daß zu mancher frist /
Ein mensch des andern teuffel ist.
Wer lauter gar nichts mehr begert /
Der mag gnent werden reich auff erd.
Hergegen arm der jhenig ist /
Der mehr begert zu aller frist:
Das ist ein fromm rechtschaffen hertz /
Welchs / ob es wol möcht / iemād schmertz /
Jamer / zůfügen / vnd vnglück /
Braucht es doch gar kein arge dück.
Der aber ein boßhafftig man /
Der gern wolt iemand schaden than /
Wenns jm nur werden möcht so gůt /
Wie offt mancher gottloser thůt.
Was gůt that hast empfangen du /
Schreib Gott alleyn dem schöpffer zů.
Vnd weil noch starck vnd jung du bist /
Schaw daß du dich vffs alterrüst.
Das darff gar vil / drumb lern / dauan
Du möchst einmal dein narung han.
Keuscheit vnd zucht du allzeit hab /
Fürd aller höchste morgengab.
Was du auff erd wilt fahen an /
Darinn solt nit bald schliessen than.
Weg mans / nit wags / bedenck mans wol /
Als denn mans bhend vollenden sol.
Glück laß du dich nit wunder nemen /
Es kan hofiern vnd wider klemmen.
[387]
Ein lüg des hertzen diebstal ist.
So vil hab ich zu diser frist
Euch sagen wölln. Gehabt euch wol /
Vnd nempt für gůt zu disem mol.
Die tugent ehrt / vnd laßts euch sein
Vilköstlicher denn edelgstein.
Gold / silber / edle stein vergehn /
Zucht / kunst vnd tugent ewig bstehn.

V.

Pittacus von Mytilenen.

Wer künstlich wil / vnd reden wol /
Derselb eh schweigen lernen sol.
Mir sol gar nichts zuschaffen gebn /
Wenn lose leut tadeln mein lebn.
Tausent mal lieber wil ichs han /
Daß mich lob nur ein Biderman.
Dann wenn der bösen bůben mich
Vil hundert rhümpten vestiglich.
Hast geben andern ein gesetz /
Schaw auch du selbs es nit verletz.
Fromm sein / nicht falln in schand vnd schmach /
Ist ein fast wichtig gůte sach.
Neid böse nicht / spot frommer nicht /
So bleibstu auch vnaußgericht.
Sichstu daß geht den bösen wol /
Neid jn nit drumb / denns so sein sol.
Den bösen geht es wol auff erd /
Als die hie seind auff jrem herd.
Geht es eim frommen übel hie /
Verspot sein nit / du weybt nit wie
Gott seltzam geht mit dseinen vmb /
Sie haben hie kein eygenthumb.
Ins ewig reich gehören sie /
Dann sie ja nur seind frembdling hie.
Drumbs ists nit wunder / daß sie han
In diser welt kein platz noch plan.
Jamer / not / widerwertigkeit /
Probiert freundtschafft zu aller zeit.
Wie iederman geartet sei /
Spürt mann in ehrn vnd ämptern frei.
Ein klůger man verhüt das böß /
Ein mannlicher tregt dultig es.
In allen dingen ist es gůt /
Die glegenheyt mann hab in hůt.
Wil iemand auch beweiben sich /
Der wehl vnd neme seines glich /
An gschlecht vnd gůtern / daß er nicht
Ihm selbs sein leyd hab zůgericht.
Nichts lieblichers auff erden ist /
Dann ein Ehbett / welchs on falsch list /
Rechtschaffen keusch vnd züchtig bleibt /
In frid vnd eynigkeyt verleibt.
Noch ein sprichwort hab ich im brauch /
Das můß ich hieher setzen auch:
Hab gůt acht auff gelegenheit /
Dann sehr vngleich seind stund vnd zeit.
Noch eins habt auch on zweifel jr
Bei dem Terentio gespürt.
[388]
Das laut also. Sih wol für dich /
Daß du ja nichts thůst vnzimlich.
In allen dingen halt ein maß /
Gehabt euch wol / vnd mercket daß /
Weil jr auff erden seit vnd lebt /
Allzeit nach ehrn vnd tugent strebt.
Dann was auff erden ist / vergeht /
Lob / ehr vnd tugent / ewig bsteht.

VI.

Cleobolus Lyndius / auß der Insel Rhodis.

Je gwaltiger du immer bist /
Dest weniger stoltz dir ehrlich ist /
Eim gwaltigen vnd geleerten man /
Steht demůt über dmaß wol an.
Andern vergib willig vnd gern /
Dir aber selbs mit grossem bschwern.
Lastu den sünden jren gwalt /
So schadet es der tugent bald.
Zeitliche güter erbet man /
Zucht / tugent / kompt nit also an.
Für freunds list / feinds vnbillicheyt /
Hüt du dich wol zu aller zeit.
Hör vil / verantwort aber weng /
So bistu dir vor vil gedreng.
Das höchste werck der tugent ist /
Laster fliehen zu aller frist.
Der wollust volgn vnd gůtem můt /
Bringt args mit sich / thůt nimmer gůt.
Wer seinen fürwitz zäumen kan /
Der ist alls lobs ein wirdig man:
Kein grösser reichthumb ist auff erd /
Denn gschicklicheyt / kunst / gůt geberd.
Kein grewel ist so hoch vnd groß /
Als wann ein man wirt treweloß.
Eins můß ich hie erzelen auch /
Halt maß / das ist ein löblich brauch.
Lebt jr im frid: Ich far daruon /
Gesagt ists gnůg / wer es wil thon.

VII.

Periander von Corinth.

Der ist fürwar vnd gwiß nit klůg /
Der nutz vom erbarn scheyden thůt.
Denn nutzlich ist zu keiner frist /
Das nit auch recht vnd erbar ist.
Den tod soltu dir wünschen nicht /
Solst dich auch drob entsetzen nicht.
Was tragen du vnd leiden solt /
Das leid mannlich vnd mit gedolt.
Vor wem sich ieder förchten thůt /
Dem thůt er nit allein kein gůt /
Sondern haßt vnd verfolget jn /
Wünscht jm den tod in seinem sin.
Schaw würd nit stoltz / wann dir das glück
Zůfellt / du kennst noch nit sein tück.
Bekümmer dichs auch nit zu fast /
Wann vnglück du vnd trübsal hast.
[389]
Wollust vergeht wie schne vnd eiß /
Tugent vnd kunst bhält ewigen preiß.
Verheyssen magst eim etwas wol /
Doch wiß / daß es on sünd sein sol.
Was wider erbarkeyt geschicht /
Bistu zuhalten schuldig nicht.
Nichts ist so fest / so groß vnd hoch /
Der fleiß gwinnts vnd eroberts doch.
Im zaum halt du dich alle zeit /
Daß du nit / was habn ander leut /
Betastest oder greiffest an /
Dann solchs gibt gar einn bösen lon /
Böse begird thůt nimmer gůt /
Alls übel sie mit bringen thůt.
Es ist nit gnůg / daß die hand sei
Vnschuldig / wann nit auch dabei
Das hertz fromm vnd on allen list /
Auffrichtig vnd rechtschaffen ist.
Ein gůtes sprichwort merck hiebei /
Halt inn den zorn / laß jn nit frei
Seins gfallens farn / danns ist nit gůt /
Wo iemand auß zorn etwas thůt.
Es ist aber ein anders wort /
Das man von mir hat offter ghort.
Zu aller zeit bedencken sol
Ein ieder sich in allem wol /
Was er thůn vnd anfahen wil /
Dennocht gerädt es wie es wil.
Wolan jr habt gehöret an /
Die frommen herren / die euch han
Ir weise leer getheylet mit /
Die wöller ja verachten nit.
Vil löblicher vnd gůter lehr /
Die wirdig sein alls preiß vnd ehr /
Haben sie bracht hier auff die ban /
Vnd solches euch zulieb gethan.
Wenn gůte lehr wer noch so gůt /
Wann man sich nit auch hält vnd thůt
Nach solcher klůgheyt / ists verlorn /
Wann mans nur wil außwendig hörn /
Nit pflantzen in das hertz hinein /
So ists nur ein vergebner schein.
Es ist nit gnůg / daß man vil hort /
Man thů auch nach dem ghörten wort /
Man richt das leben gantz vnd gar /
Nach solcher ghörten gůten lahr.
Wil es hie also bleibenlan /
Dem höchsten euch befolhen han.
Der geb euch / was zu aller frist /
Zu leib vnd seel euch nützlich ist.
Lebt frölich lieben herrn / vnd seit
Der tugent günstig alle zeit.
Den gůten künsten deßgeleich
Wölt freudtlich jr erzeygen euch.
Die weißheyt auch für augen han /
So wirts euch allzeit glücklich gan.

Ende.

M.D.LII. [390]

License
Der annotierte Datenbestand der Digitalen Bibliothek inklusive Metadaten sowie davon einzeln zugängliche Teile sind eine Abwandlung des Datenbestandes von www.editura.de durch TextGrid und werden unter der Lizenz Creative Commons Namensnennung 3.0 Deutschland Lizenz (by-Nennung TextGrid) veröffentlicht. Die Lizenz bezieht sich nicht auf die der Annotation zu Grunde liegenden allgemeinfreien Texte (Siehe auch Punkt 2 der Lizenzbestimmungen).
Link to license
Citation Suggestion for this Edition
TextGrid Repository (2012). Egenolff, Christian. Der Siben Weisen in Grecia Sprichwörter - In Rheimen gestelt. TextGrid Digitale Bibliothek. https://hdl.handle.net/11858/00-1734-0000-0002-9434-9