[218] Es spilen sich eh zehen arm / dann einer reich.

Man spricht: Der ein gewinnt / der ander verleurt. Nun ists aber ein wunder / daß vnder zehen spilern kein gewinner / vnn nit ein reicher ist / sonder eitel arm tropffen / Wer gewinnt dann? keiner. Wo kompt dann das hin das der ander verleurt / můß ieder ander gewinnen? Neyn. Wo kompts dann hin? der wirt /Bippapp er / liecht / spilkart vnd würffel frißts. Item zum teyl der wein / zum teyl der müssiggang. Diß laster nimpt im werck wie andere zů / daß wie ein trunck den andern fordert / also ein spil das ander bringet / daß er morgen spilsüchtiger wirt dann heut. Dann beide tugent vnnd laster / seind deren art / daß sie sich nit vollkommen sättigen vnd thůn lassen /sonder immerzu von einer vntugent vnnd laster inns ander steigt. Die büberei / wo man jr nit wehrt / laßt sich nit genügen / biß sie nicht weiter mag. Die sünd vnnd lust der sünde / ja der Satan fahet vnnd bindet einn ie lenger ie mehr / ie mehr er jm dienet / ie lenger ie gefangner er wirt / ie mehr rechts hat der Satan vnd sünd über jhn / den knecht zu seim dienst nach all seim willen zutreiben vnd brauchen. Darumb gilt es sich nit erbůben das mütlin erkülen / sonder bei zeit fliehens vnd leschens / wehr dich des teufels ehe er dich fasset faßt er dich / so bistu gůt zuwerffen. Auß der gwõheyt wirt ein natur / vnnd wann das feur allenthalben zum tach hinauß schlegt / vnd das gantz hauß voll feur ist / ist böß leschen. Darumb můst du die laster alle / wie die Parther jr feind schlagen. Sie schiessen hindersich vnd fliehen gar schnell / vnd daß sie sigen / haben sie jhren füssen vnd pferden zudancken. Also můstu die laster fliehen / vnd bei zeit / das hilfft allein