Folgen etliche überschrifften oder Epigrammata:

Einem mahler ins stammbuch:

Was die mutter vieler nöhten
Die Melancholey genant/
Manchem/ mehr als gut bekant
Stifftt/ in ländern vnd inn stäten/
Was sie würgen/ was sie tödten
Wil durch jhre todes hand/
Wird erwehrt vnd abgewandt/
Durch euch/ mahler/ vnd Poëten.
Was sie raubet/ was sie drücket/
Jhr erstattet vnd erquicket:
Was sie quälet vnd bethört/
Was sie treibet/ was sie dringet/
Was sie martert/ was sie zwinget/
Jhr in lauter lust verkeert.

Einem Siegelschneider in's Stammbuch:

Vor alters war ein wort des mannes zaum vnd ziegel;
Die sporen lieb' vnd gonst; die spießruth' ehrbarkeit;
Der sattel gottesforcht; der schmuck war frömmigkeit:
Ein auffrichtiges hertz' vnd einfalt waren bügel.
Hernach/ wie mich bedünckt/ bekam die trewe flügel/
Vnd flog vns in die hand. Hierauff nach kurtzer zeit
Als sie die hand verließ/ verkroch sie sich in'n eidt:
Nun/ man sie da nicht findt/ so sucht man sie im siegel.
Die siegel grabet jhr/ vnd seyd darauff bedacht/
Wie jhr der trewe merck auff stahl vnd eisen macht/
Denn rechte deutsche trew' ist stahle zu vergleichen.
O trewe/ tewres gut/ wo bistu kommen hin?
Von dir weiss weder mund/ noch rechte hand/ noch sinn.
Der künstler sucht die selbst/ noch macht er deine zeichen.

Vber ein hochzeit geschencke:

Du wärest kein geschenck'/ vnd noch so schlecht vnd bloß:
Du wär'st ein klein geschenck'/ vnd wärstu noch so groß:
[100]
Du wär'st ein schlecht geschenck'/ vnnd wär'stu noch so prächtig:
Macht' ich dich schlecht vnd klein/ du wärest ganz verdächtig.
Nu bistu gut genug/ wie schlecht du immer bist/
Die weil ein gut gemüth' an deiner schlechtheit ist.

Kriegen:

Weil man im kriege nur wil für seinn kragen kriegen/
So muß man endlich auch mit lügen sagen siegen.
Vnd weil man friedessieg nur hasst vnd liebet krieg/
Drumb führet man viel krieg'/ vnd spüret wenig sieg.

Lernen:

Das lernen ohne lust ist eine läre last/
Denn lehre wird durch geist vnd lieb' ein lieber gast.
Doch wird die list vnd lust nicht ohne last gefasst.
Wo derowegen lust vnd last ist so verhasst/
Daß man der lehre thut mit list nur überlast/
In solchem stalle liegt manch laster in der mast.

An den edlen/ gestrengen hoch vnnd wolweisen herrn Arnhold von Holten Bürgermeistern vnd Oberschuelherrn zu Dantzig:

Der gantze Musen chor war gäntzlich/ mich/ entscheiden/
Den angebänten weg zu Pegasus-fontein
Zu leiten bey der hand. Da quillet milch vnd wein!
Wolt' ich mit wissenschaft nur viel gemüter weiden.
Nu wolt' ich zwar mit fleiß den müßiggang zu meiden
In meiner jugend noch der jugend müßig seyn/
Daß ich im alter nicht der faulheit arge pein/
Vnd miß-müthiger mueß' vnmaste müße leiden.
Mein wissen wolt' ich nicht nur mir zum wissen wissen
Sonst möcht vnwissentheit aus solchem wissen fliessen/
Denn wissen das man nicht zu weisen weiss/ ist eiß.
Wolt jhr (gemeiner schatz/ gemeiner stat geschencket.
Den Helicon gespeist/ den Castalis geträncket/
Jhr wissenschafft-beweiß) seyn meines fleißes preiß.

[101] In accissantem quendam Doctorandum:

Difficiles facilis tentâsti Heliconis alumnas,
Et te tentârunt difficilem faciles:
Sed cum difficilis facilis superaveris illas,
Difficilem faciles TE facilè, ecce beant.

An die Jugend:

Was in der erden gold; im golde goldestugend;
In der ein heller glantz; im glantze schönheit ist;
Vnd was im rohten gold' ein edler Amethyst:
Das ist die gottesforcht an dir/ o zarte jugend.

Tugend:

Was von der zeit der Mey; vom Meyen grüne garten;
Von garten blümelein; von blumen blumensafft;
Vom saft' ein schöner ruch; vom ruch' ein' edle krafft:
Das hat die jugend auch von tugend zugewarten.

Sonnet/ In eines mahlers konst-kammer oder Werckstäte:

Konst ohne geld vnd gonst ist donst vnd mag nicht gelten/
Wo sie jhr geld nicht gilt/ vnd wo jhr gonst gebricht
Ist alle müh' vmbsonst vnd vbel angerichtt.
Denn ohne gonst vnd geld wird dieser zeit gar selten
Was könstliches gedichtt. Wer fluchen wil vnd schelten/
Wenn geld zu geben ist/ der komme hieher nicht.
Denn/ solchen ist die konst auch nicht vmb geld verpflicht/
Wiewol sie sonst mit lust dient in des geldes zelten.
Wer nun aus freyen muth' vnd liebe zu der konst/
(Welch' ohne geld nichts ist als wind vnd lauter donst)
Jhm etwas zu der lust wil könstlich lassen mahlen/
Der sey auff geld bedacht/ so spürt man/ daß die gonst
Die er zu könsten trägt/ mit nichte sey vmbsonst
Die losung' hier ist geld. Man muss hier redlich zahlen.

[102] Sonnet/ vber die Preußnische Friedenshandlunge der durchleuchtigen vnd hochmächtigen herren Stände der vereinigten Provinzen in Niederland etc. etc. durch Die woledlen/ gestrengen vnd vesten herrn/ Rochum von Honart/ Rahtsherrn in dem hohen Rathe: Hn. Andream Bicker Bürgermeister der stat Amsterdamm: Hn. Simonem von Beaumont/ Rathsherrn in dem Committierten rathe von Holland/ Pensionarium der stat Middelburg:

Die nimmer ohne krieg/ vnd dennoch immer siegen/
Die nimmer krieg gesucht/ vnd haben allezeit
Gefunden/ der für sie vom hohen himmel streitt/
Die nimmer ohne sieg den friedefeind bekriegen/
Die nimmer ohne lob die fahne lassen fliegen/
Die nimmer ohne lust die last der dienstbarkeit
Das allzuschwere joch zu brechen seyn bereit/
Die nimmer ohne Gott für Gott zu felde liegen/
Vnd siegen auch mit Gott/ die 's hohe niederland:
Die krieges-hohe schuel'/ in aller welt bekant/
Frey vnd berühmt gemacht/ die Printzen der soldaten/
Die friedes halben nu so lange krieg geführt:
Die suchen vnsern fried'. Hieraus wird wol gespürt
Was krieg vnd friede sey/ weil die zum friede rahten.

Wieder die/ so faulheit vnd vnzeitigen schlaff lieben:

Jhr faulen saget mir/ wo faulheit was kan sagen/
Wo von seyd jhr so kranck/ was kranckheit mag euch plagen/
Euch ist nicht was jhr wisst/ jhr wisst nit was euch ist:
Jhr wisst nicht was jhr thut/ jhr thut nit was jhr wisst.
Jhr lebet mit verdruß: jhr sterbt in dem jhr lebet/
Weil euch ein kalter gifft in allen adern schwebet/
Ein starcker Circe-gift/ den vnlust beygebracht/
Der aus den menschen schwein'/ aus schweinen esel macht.
Der gift hat ewr gemüth' vnd sinnen überschwommen/
Vnd hat euch alle lust zur weißheit weggenommen:
Auf nichts in gantzer welt gebt jhr acht' vnd gemerck/
Als nur auf faulen schlaf vnnd Morphisch träume-werck.
Der gift der macht euch kranck: er macht dz jhr verarmet/
Der gift macht dz sich ewr kein mensche fast erbarmet.
Euch rewet/ was jhr thut/ jhr thut was euch gerewt:
[103]
Euch schewet ruhm vnd ehr'/ als jhr die arbeit schewt.
Gefällt euch sanfte ruh/ gefällt euch süsses schlafen/
So wisst/ dz faule ruh groß vnruh pflegt zu strafen.
Von arbejt habt jhr ruh/ vnd seyd mit euch im streit.
Jhr seyd nicht als jhr sollt/ jhr sollt nicht als jhr seyd.
Dis ist/ was euch betrübt/ sein vrsach' arth vnd wesen.
Wie schwerlich werdet jhr von ewrer qual genesen:
Jhr sollt nicht/ was jhr thut: jhr thut nicht was jhr sollt:
Jhr wollt nicht/ was jhr wisst: jhr wisst nicht/ was jhr wollt.
Lizenz
Der annotierte Datenbestand der Digitalen Bibliothek inklusive Metadaten sowie davon einzeln zugängliche Teile sind eine Abwandlung des Datenbestandes von www.editura.de durch TextGrid und werden unter der Lizenz Creative Commons Namensnennung 3.0 Deutschland Lizenz (by-Nennung TextGrid) veröffentlicht. Die Lizenz bezieht sich nicht auf die der Annotation zu Grunde liegenden allgemeinfreien Texte (Siehe auch Punkt 2 der Lizenzbestimmungen).
Link zur Lizenz
Zitationsvorschlag für diese Edition
TextGrid Repository (2012). Plavius, Johannes. Folgen etliche überschrifften oder Epigrammata. Digitale Bibliothek. https://hdl.handle.net/11858/00-1734-0000-0004-7C2F-6